Read TAITA BIBLE – Biblia Ilagho Jiboie Kwa Wandu Wose 2 WAKORINTHO 8 Bible Online

2 WAKORINTHO 8 - TAITA BIBLE – Biblia Ilagho Jiboie Kwa Wandu Wose bible

2 WAKORINTHO 8

¹Wanidu, dakunde mmanye malagho gha mvono ghwa Mlungu ugho ghorenekeloghe makanisa gha Makedonia.

²Angu awo, hata ngera werekoghe andenyi ya matimo ghibirie gha wasi mungi, ela kuja kuboilwa kwawo kubaa, kwawibonyere wifunye mali rawo kwa wungi; hata ngera wukiwa ghwawo ghorekoghe ghuchumbie.

³Angu nawishuhudia kukaia werefunyireghe kunughana na kudima kwawo, hata na kuchumba uko kudima kwawo, kwa kukunda kwawo weni;

⁴wikidilomba nandighi diwirumirie wingie andenyi ya ugho wungara ghowitesia waeli.

⁵Iji ni ilagho diserejisuwirieghe; imbiri werekufunyireghe weni kwa Bwana, na kwa lukundo lwa Mlungu wikakufunya na kodu wori.

⁶Kwa wundu ugho, deremshashirieghe Tito uo oreizoeghe iyo kazi ya mvono aghadi konyu, uimerie.

⁷Idana angu mwachua maza rose, irumirio, kughora, kumanya, kufunga ndighi kose, na uko kudikunda isi; zighanenyi angu mkaie mchurikie andenyi ya ihi kazi ya mvono wori.

⁸Siwueghora agha sa kumfunyira momu, ela kwa kuwonyera seji wazima wiko na ngolo etesia; naawuyalola kuwona ngera lukundo lonyu ni lwa loli.

⁹Inyo mwaichi mvono ghwa Bwana odu Jesu Kristo, seji hata ngera orekoghe na mali, ela orewurieghe mkiwa kwa wundu ghonyu, eri kwa ugho wukiwa ghwake, mpate kukaia na mali.

¹⁰Nani kwa ilagho iji, namneka njama: ni nicha inyo mchimerie idana icho morechizoeghe mwaka ghusirie; si kwa uko kubonya koni, ela hata kukunda kubonya wori.

¹¹Idana katishenyi, ipate kukaia sa iji koni morekoghe tayari kukunda kubonya, huwo koni mpate kukatisha kunughana na icho muko nacho.

¹²Ikakaia ngolo efunya eko, icheni mundu uko nacho, nicho cheni chirumirilwagha ni Mlungu; hata si icho usewadie anduangi.

¹³Siwueghamba wei wazima wiinjiro msigo na inyo mdukishiro,

¹⁴ela eri kukaie kukatana, wungi ghonyu ghwa idana ghwafwaneghe ghutesie kusowekelwa kwawo, eri wungi ghwawo ghupate kutesia kusowekelwa konyu; nao kuakaia kukatana.

¹⁵Sa iji koni iandikilo, “Uo oreshoieghe vingi, nderesigharikieghe na kindo chingi na uo oreshoighe vitini, nderesowieghe anduangi.”

¹⁶Ela chawucha kwa Mlungu, uo wawuyamneka Tito ngolo iyo cheni efunga ndighi kumtesia.

¹⁷Si angu oorumiria ilombi jedu jeni, ela kwa kukaia uo moni ukunde na ndighi, wakufunyire moni kucha konyu.

¹⁸Dimdumanya na uja mwanidu umanyikie nandighi aghadi ya makanisa ghose kwa kuchila kwake ijo Ilagho Jiboie.

¹⁹Si huwo tu, ela chiaimweri na agho, uo moni wasaghulo ni makanisa, udambanye nesi kwa kazi ihi ya mvono dawuyaibonya kwa wundu ghwa wubaa ghwa Bwana; na kuwonyera angu isi diweni deko andwamweri nenyo.

²⁰Daawuyakunda mndungi useghore kiwiwi aighu yedu, kwa wundu ghwa wudumiki ghodu, kwa inosi iji ja kukufunya dawuyajidumikia;

²¹angu isi daawuyalola icho chiredagha ishima imbiri ya Bwana, na imbiri ya wadamu wori.

²²Na chiaimweri nawo, damduma mwanidu dimerie kumtima kalazi koni, na kummbona ni mundu urumirikie kwa maza ndazi; ela idana, wakufunya kuchumba angu wawuyamrumiria putu.

²³Kwa maza ra Tito, uo ni mngara wapo na m'bonyi kazi andwamweri nani kwa kumdumikia inyo; na awo wanidu ni wadumwa wa makanisa, nawo ni wubaa ghwa Kristo.

²⁴Kwa wundu ugho, wonyerenyi wuloli ghwa lukundo lonyu kwa makanisa, na kuja kukukasa kodu diko nako kwa wundu ghonyu.