Read TAITA BIBLE – Biblia Ilagho Jiboie Kwa Wandu Wose WAGALATIA 1 Bible Online

WAGALATIA 1 - TAITA BIBLE – Biblia Ilagho Jiboie Kwa Wandu Wose bible

WAGALATIA 1

¹Ini Paulo, mdumi usedumilo ni wandu, hata kudumwa kwa chia ya mdamu, ela kwa chia ya Jesu Kristo, na Mlungu Aba uo oremrukishireghe kufuma kwa wafu;

²ini chiaimweri na wanidu wose dikwanye aha, namuandikia inyo makanisa ghose gha Galatia:

³Mvono ndeghukaie konyu, na sere ifumagha kwa Mlungu Aba, na Bwana odu Jesu Kristo;

⁴uo orekufunyireghe moni kwa wundu ghwa kaung'a redu, upate kudikira na ngelo rizamie ra matuku agha, karakara na lukundo lwa Mlungu Aba odu;

⁵kwake uo ndeghukaie wubaa kwa kala na kala. Amen.

⁶Nashinika angu mwaghaluka shwa-shwa, na kumsigha uo oremmbangieghe andenyi ya mvono ghwa Kristo, na kujighalukia ilagho jiboie izima.

⁷Si angu wei jeko ilagho jiboie jingi izima, ela weko wandu wamu wawuyamjisha wasi na kukunda kujighalua Ilagho Jiboie ja Kristo.

⁸Ela hata ngera isi, angu malaika ufumagha mlungunyi, wamchilia ilagho jiboie izima jisefwananagha na ijo jeni deremchilieghe, ndewado ni njowe.

⁹Sa iji koni dereghorieghe imbiri, na idana naghora sena, ikakaia mndungi wawuyamchilia ilagho jiboie izima jisefwananagha na ijo jeni deremchilieghe, ndewado ni njowe.

¹⁰Wele naawuyakunda kukaswa ni wandu, angu ni Mlungu? Anguu, huwu naawuyatima kuwiboia wandu? Ngera nadadua ngiwiboia wandu, kumangu seredimagha kukaia mdumiki wa Kristo anduangi.

¹¹Nakundeghe mmanye huwu wanidu, kukaia, ijo Ilagho Jiboie nerejichilieghe, ndejerekoghe ja mdamu anduangi.

¹²Angu ini serejiwusireghe kufuma kwa mdamu, hata serejifundishiroghe, ela jedeecha kwa chia ya mafunuo gha Jesu Kristo.

¹³Angu mwasikire malagho gha irangi japo ja imbiri andenyi ya dini ya Kiyahudi, seji nerejikorongieghe ikanisa ja Mlungu na ndighi, na kutima kujinona;

¹⁴nani nerewichumbieghe wandu wengi wa irika japo jeni, kwa maza ra dini ya Kiyahudi aghadi ya wandu wapo; ngafunga ndighi loli-loli kuiwadia mizango ya weke aba.

¹⁵Ela Mlungu, uo orenisaghueghe imbiri nisevalo, na kuniwanga kwa mvono ghwake,

¹⁶uendaboilwa umfunukuo Mwana wake andenyi kwapo, eri niwonemchila aghadi ya iro mbari zima, serebonyereghe njama na mndungi;

¹⁷hata serejokieghe Jerusalemu kwa awo werezoeghe kukaia wadumi imbiri yapo anduangi; ela nereghendieghe noko cha Arabu, ima ngawuya Dameshki sena.

¹⁸Niko nyuma ya miaka idadu ngajoka Jerusalemu kumroghua Kefa, ngakaianya nao matuku ikumi na masanu.

¹⁹Nani seremmbonieghe mdumi ungi mzima, ela Jakobo moni, mruna Bwana.

²⁰Na agha malagho nimwandikiagha, niamghoria loli imbiri ya Mlungu, siwueghora tee anduangi.

²¹Konyuma nereghendieghe masanga gha Siria na Kilikia.

²²Ngelo iro, wandu wa makanisa gha Kristo ghiko Judea ndewerekoghe waniwona;

²³ela wedesikira malagho ghikighorwa wei, “Uo orekoghe ukidikoronga imbiri, idanaha waawuyajichila ijo irumirio oretimieghe kujinona ko imbiri.”

²⁴Nawo wikamkasa Mlungu kwa wundu ghwapo.