Read TAITA BIBLE – Biblia Ilagho Jiboie Kwa Wandu Wose WAGALATIA 2 Bible Online

WAGALATIA 2 - TAITA BIBLE – Biblia Ilagho Jiboie Kwa Wandu Wose bible

WAGALATIA 2

¹Nyuma ya miaka ikumi na inya, nerejokieghe Jerusalemu sena, nikwanye na Barnaba; ngamdwa Tito andwamweri nani.

²Nani nerejokieghe kwa wundu ghwa agho mafunuo nerenekeloghe; ngawiwikia worinyi njamenyi awo werekoghe sa wabaa, malagho gha ijo Ilagho Jiboie nawuyajichila aghadi ya wandu wa mbari zima, isechekaia ngera kwa chia ingi, naawuyaghenda na iseghe, angu nedeeka ngighenda na iseghe duu.

³Ela hata Tito moni, uo derekwanyeghe, nderefungishiroghe ndighi kushamishwa anduangi, hata ngera saki orekoghe Mgriki.

⁴Ela kwa wundu ghwa awo wanidu wa tee werengiriloghe andenyi kwa kiviso, awo werengirieghe kuzighana wuhuru ghodu diko nagho kwa Kristo Jesu, eri widingire wuzumbenyi;

⁵isi ndederekuwikieghe aisi kwawo hata kutini, eri iyo loli ya Ilagho Jiboie ipate kulindilwa kwa wundu ghonyu.

⁶Na awo weretaliloghe sa wabaa (elaima ini siwonagha wuchumbano ghungi aighu ya seji werekoghe. Mlungu ndemtalagha mndungi kuchumba mmbao anduangi) ini niaghamba awo werekoghe wabaa, ndewerenichurieghe kindo chingi anduangi.

⁷Ela wulalo ghwaro, iji werewonieghe seji nerenekeloghe kazi ewichilia wandu wiseshamishiro ijo Ilagho Jiboie, seji koni Petro orenekeloghe kazi ewichilia ijo Ilagho Jiboie wandu wishamishiro,

⁸(angu uo orebonyereghe kazi ukimtumia Petro kwa wundu ghwa wudumiki ghwa wandu wishamishiro, nuo moni ubonyere kazi ukinitumia kwa wundu ghwa wudumiki ghwa wandu wa mbari zima);

⁹nawo iji wawona seji ninekelo ghuja mvono, Jakobo, Kefa na Johane, wandu weretaliloghe kukaia sa nguro, werediwadieghe mkonu ghwa kiwomi ghwa wungara ini na Barnaba, dipate kughenda kwa wandu wa mbari zima, nawo wighende kwa wandu wishamishiro.

¹⁰Ilagho jimweri weredizerieghe ni angu diwikumbuke wakiwa, najo ni ilagho ini moni nerefungieghe ndighi kujibonya.

¹¹Ela iji Kefa orechieghe Antiokia, neremkemieghe worinyi kwa kukaia orewonekieghe kukaia na makosa.

¹²Angu imbiri ya wandu wamu kucha kufuma kwa Jakobo, orekoghe ukijanya na wandu wa mbari zima; ela wiendacha, ukakuwunja nyuma na kukutanya nawo, kwa kuwiobua waja wandu wikundagha wandu wishamisho.

¹³Na Wayahudi wazima wikabonya wokoni, hata na Barnaba wori ukalaghashwa ni uko kuja kuwi kwawo.

¹⁴Ela iji nerewonieghe angu ndewereghendieghe nicha karakara na loli ya Ilagho Jiboie, neremzerieghe Kefa imbiri ya wose, “Oho ko Myahudi, elaima korekoghe kukikaia sa mundu wa mbari zima, hata si sa Myahudi anduangi; kwadima wada kuwilazimisha wandu wa mbari zima wikaie sa Wayahudi?”

¹⁵Isi diweni de Wayahudi kwa kuvalwa, hata ndediko wakaung'a wa iro mbari zima anduangi,

¹⁶ela sena daichi wori mdamu ndetalwagha kukaia na hachi kwa chia ya mabonyo gha Sharia anduangi, ela kwa chia ya irumirio jiko kwa Jesu Kristo. Hata nesi deerumiria kwa Kristo Jesu, eri ditalo kukaia na hachi kwa Kristo hata si kwa chia ya mabonyo gha Sharia anduangi; angu ndekuwadie mndungi uchaatalwa kukaia na hachi kwa chia ya mabonyo gha Sharia anduangi.

¹⁷Ela ikakaia kwa kufunga ndighi kodu, eri ditalo kukaia na hachi andenyi ya Kristo, dawoneka kukaia wakaung'a; welee, huwo Kristo waawuya ni mdumiki wa kaung'a sena? Hata kutini.

¹⁸Ela ngawoka kuagha iro maza nererivuchueghe, huwo idana niakuwonyera nimoni seji niko mkosi;

¹⁹angu ini cha sharienyi nafue, na iyo Sharia niyo cheni inibwaghie; eri nipate kukaia moyo kwa wundu ghwa Mlungu.

²⁰Ini namerie kusulubishwa andwamweri na Kristo, na si ini ungi nawuyakaia moyo, ela Kristo nuo uko moyo andenyi kwapo; na uko kukaia moyo niko nako mumbinyi, naawuyakaia moyo kwa irumirio, ngimrumiria Mwana wa Mlungu, uo orenikundieghe na kukufunya uo moni kwa wundu ghwapo.

²¹Sidimagha kughukana mvono ghwa Mlungu, angu ikakaia kutalwa kukaia na hachi kuapatika kwa chia ya Sharia, kufwa kwa Kristo ndekune fwaida ingi.