Read TAITA BIBLE – Biblia Ilagho Jiboie Kwa Wandu Wose WAGALATIA 3 Bible Online

WAGALATIA 3 - TAITA BIBLE – Biblia Ilagho Jiboie Kwa Wandu Wose bible

WAGALATIA 3

¹Wagalatia mkelie inyo! Nani umloghie; wandu morewonyeroghe worinyi mesonyi konyu seji Jesu Kristo oresulubishiroghe?

²Namkotia ilagho jimweri: Moremmbusireghe Roho kwa chia ya mabonyo gha Sharia, angu kwa kusikira kuko kwa chia ya irumirio?

³Nambe mooka wakelu huwu! Mzoe kwa Roho, nao sena mookunda kumeria kwa kimumbi?

⁴Huwo maza rose rimpatire redeeka ra duu? Ini siwonagha wei ni ra duu anduangi.

⁵Welee, uhu umnekagha Roho, na kubonya kazi ra weke mwakilimbiti aghadi konyu, wadabonya huwo kwa mabonyo gha Sharia angu kwa kusikira kwa irumirio?

⁶Niko huwu Abrahamu “Ukamrumiria Mlungu, na kwake ikatalwa kukaia hachi.”

⁷Kwa huwo mwawona kukaia wandu wa irumirio niwo wiko wana wa Abrahamu.

⁸Na maandiko ghikizoya kuwona seji Mlungu uchaawitala wandu wa mbari zima kukaia na hachi kwa irumirio, gherezoeghe kumchilia Abrahamu ghikighamba, “Mbari rose richarasimilwa kufumanya na oho.”

⁹Niko huwo awo wose wiko wandu wa irumirio, warasimilwa chiaimweri na Abrahamu uo orekoghe na irumirio.

¹⁰Angu awo wikusaghikagha kwa mabonyo gha Sharia, weeka aisi ya njowe; angu yaandikilo, “Ndewado ni njowe kula mundu usewadagha malagho ghose ghiandikilo andenyi ya chuo cha Sharia, na kughibonya.”

¹¹Idana yawoneka worinyi kukaia ndekuwadie mndungi utalwagha kukaia na hachi imbiri ya Mlungu kwa chia ya Sharia; angu “Uo ose utalilo kukaia na hachi kwa irumirio, uchakaia moyo.”

¹²Ela Sharia ndeikusaghikagha na irumirio, angu seji iandikilo, “Uo uibonyagha Sharia uchadua moyo kwa io.”

¹³Kristo oredikombueghe kufuma kwa njowe ya Sharia, kwa kuwuya njowe uo moni; angu yaandikilo, “Ndewado ni njowe kula mundu unyonyoreshwagha mudinyi”,

¹⁴na kwa chia ya Kristo Jesu, marasimio gha Abrahamu ghipate kuwivikia wandu wa mbari zima; eri dipate kuwusa ilaghiro ja Roho kwa chia ya irumirio.

¹⁵Nimneke mfwano ghwa maza ribonyekagha wandunyi wanidu; ndekuwadie mndungi udimagha kuinja angu kuchuria ilaghiro ja ifwa ja mundu jikameria kumangishwa.

¹⁶Idana malaghiro ghedebonywa kwa Abrahamu na kivalwa chake. Na maandiko ndeghiwueghora wei, “Na vivalwa,” seji ni kwa wengi; ela gheeghora kwa wundu ghwa umweri, “Na kwa kivalwa chako” nuo Kristo.

¹⁷Huwo ni kughamba, iyo Sharia erechieghe nyuma ya miaka maghana ana na mirongo idadu, ndeidimagha kuinja ilaghano jibonyero ni Mlungu ko imbiri, na kujibonya ijo ilaghano kukaia ja duu anduangi.

¹⁸Angu ngera ifwa jadapatika kwa chia ya Sharia, ndejikaiagha ja ilaghiro sena anduangi; ela Mlungu oremnekieghe Abrahamu kwa ilaghiro.

¹⁹Sharia ni ya indoki sena? Sharia erechuriloghe kwa wundu ghwa mawiwi, iwesere hata chija kivalwa cha Abrahamu chiche; icho cherebonyeroghe ilaghiro. Iyo Sharia ereredeloghe ni weke malaika kwa mkonu ghwa mpatanishi.

²⁰Idana mpatanishi ndekaiagha wa mundu umweri; ela Mlungu ni umweri.

²¹Welee, iyo Sharia yaawuyatangala malaghiro gha Mlungu sena? Hata kutini. Angu ngera edeeka Sharia ifunyiro edima kuwiwika wandu moyo, kumangu loli hachi yadapatika kwa Sharia.

²²Ela maandiko ghaawuyaghora kukaia wurumwengu ghose ghooka kaung'enyi, eri icho cherelaghiriloghe kwa irumirio jiko andenyi ya Jesu Kristo, chipate kunekwa awo wirumiriagha.

²³Imbiri irumirio jisechee, derekoghe difungilo aisi ya Sharia, dikiwesera ngelo ya kufunukulwa kwa irumirio.

²⁴Kwa huwo Sharia erekoghe mlindiri odu, hata ngelo ya kucha kwa Kristo; eri diwonetalwa kukaia na hachi kwa irumirio.

²⁵Ela idana angu irumirio jimerie kucha, ndediduagha sena aisi ya mlindiri anduangi;

²⁶angu inyo mmbose moko wana wa Mlungu andenyi ya Kristo Jesu kwa chia ya irumirio.

²⁷Kwa kukaia inyo mmbose m'baputiziro andenyi ya Kristo, moomrwa Kristo.

²⁸Ndekuwadie Myahudi, angu Mgriki; ndekuwadie mzumba, angu mkitina; ndekuwadie mndwawomi, angu muka anduangi; angu inyo mmbose moko wandu wamweri andenyi ya Kristo Jesu.

²⁹Na ikakaia muko wa Kristo, aho moko wana wa Abrahamu, na wana wa ifwa karakara na ijo ilaghiro.