Read TAITA BIBLE – Biblia Ilagho Jiboie Kwa Wandu Wose WAGALATIA 4 Bible Online

WAGALATIA 4 - TAITA BIBLE – Biblia Ilagho Jiboie Kwa Wandu Wose bible

WAGALATIA 4

¹Ela naghamba huwu, mundu wa ifwa, iji uko mwana, ndewadie wuchumbano ghungi na mzumba, hata ngera nuo moni mundu wa mali;

²ela ooka aisi ya walindiri na wazighaniri hata ituku jiwikilo ni ndee.

³Ni huwo koni na isi; iji derekoghe wana, derekoghe wazumba wa mafundisho gha asili gha pepo ra wurumwengu ughu.

⁴Ela iji ngelo yakatia, Mlungu oremdumieghe Mwana wake ukavalwa ni muka, nao orevaloghe aisi ya Sharia,

⁵upate kuwikombua awo werekoghe aisi ya Sharia, eri isi dibonyo kukaia wana wa Mlungu.

⁶Na angu muko wana, Mlungu wadumie Roho wa Mwana wake andenyi ya ngolo redu, ukemagha, “Abba! Aba.”

⁷Kwa huwu ndekuduagha mzumba sena, ela koko mwana, na ikakaia kuko mwana, koko mundu wa ifwa kwa Mlungu.

⁸Aho imbiri, iji morekoghe msemwichi Mlungu, morekoghe wazumba wa iyo milungu iseko milungu kwa tabia yawo anduangi;

⁹ela idana, mwachemmanya Mlungu; angu nighambe, Mlungu wammanyire inyo. Mwadima wada kuwuya nyuma, na kuriwuria sena rija roho ra wurumwengu ughu ra wukiwa risewadie ndighi; na kukunda kuwuya wazumba wawo kawi?

¹⁰Inyo mwaawuyakaia na mzango ghowadia matuku, meri, vimu na miaka!

¹¹Mwanikambira chongo; kewada neebonya kazi nduu kwa wundu ghonyu.

¹²Namvoya wanidu mkaie sa iji koni niko, angu ini wori neeka sa inyo mmbeni. Inyo ndemorenikosereghe kwa ilagho jingi;

¹³ela mwamanya angu ni iji nerekoghe mkongo niko nerejichilieghe Ilagho Jiboie konyu kande.

¹⁴Hata ngera saki wukongo ghwapo ghorekoghe itimo konyu, ndemorenimenyereghe hata kunilegha anduangi; ela moreniwusireghe sa malaika wa Mlungu, angu sa Kristo Jesu.

¹⁵Morekoghe mkato, mwachewonaki sena? Angu ini neko na wushuhuda ghonyu kukaia ngera yadadimika, kumangu moreghikueghe meso ghenyu na kunineka.

¹⁶Naawuya ngakaia m'maiza onyu sena kwa kumghoria ija loli?

¹⁷Msemanye wei awo wandu waawuyakaia na bea nenyo kwa wundu ghwa mecha; ela waawuyakunda kumtanya na ini, eri inyo mpate kuwadana nawo.

¹⁸Kukundwa kwa wundu ghwa mecha kwafwana matuku ghose, hata si angu wei ni ihi ngelo dikwanye koni anduangi.

¹⁹Wana wapo nimkunde, nakaia na luwawo sa lwa muka ukumbagha lufu kwa wundu ghonyu, hata Kristo uumbike andenyi konyu.

²⁰Na wei neekanya nenyo idana, kumangu nadadeda wuzima; mwanikambira chongo na ndighi.

²¹Nighorienyi inyo mkunde kukaia aisi ya Sharia; wele sena mwawuyasikira seji Sharia ighoragha?

²²Nechi yaandikilo, Abrahamu orekoghe na wana wawi wa womi; umu orevaloghe ni muka mzumba, na umu orevaloghe ni muka mkitina.

²³Ela mwana wa muka mzumba orevaloghe sa wana wose, na wa muka mkitina ukavalwa kwa chia ya ilaghiro.

²⁴Idana ughu ni mfwano; waka awo, ni malaghano awi. Ilaghano jimu jeefuma Mghondi ghwa Sinai, nagho ni sa Hagari uvagha wana wuzumbenyi.

²⁵Idana Hagari nuo Mghondi ghwa Sinai ghuko Arabu, nao wafwanana na Jerusalemu iko idana; muzi ghuko wuzumbenyi chiaimweri na wana wake.

²⁶Ela Jerusalemu ghwa mlungunyi ghooka huru, nagho nuo mao.

²⁷Angu yaandikilo, “Boilwa ee kolowi kusevagha; funya lwaka kukeme kwa kuboilwa oho kusekumbagha lufu, angu wana wa uo uleghelo ni wengi, kuchumba wana wa uo ukwanye na mumi.”

²⁸Idana wanidu, isi deko wana wa ilaghiro sa Isaaka;

²⁹na sa iji koni uja mwana orevaloghe sa wana wose oremkorongieghe uo orevaloghe kwa Roho ngelo rija, hata idana ni huwo koni.

³⁰Ela maandiko ghaghamba wada? Ghaghamba huwu, “Mmbinge noko muka mzumba andwamweri na mwana wake; angu mwana wa muka mzumba ndedimagha kuwaghana ifwa na mwana wa muka mkitina anduangi.”

³¹Na isi wanidu, ndediko wana wa muka mzumba anduangi, ela wana wa muka mkitina.