Read TAITA BIBLE – Biblia Ilagho Jiboie Kwa Wandu Wose WAGALATIA 6 Bible Online

WAGALATIA 6 - TAITA BIBLE – Biblia Ilagho Jiboie Kwa Wandu Wose bible

WAGALATIA 6

¹Wanidu, ngera mndungi wawadwa na ikosa jingi, inyo muko wa kiroho, mumtesie kwa roho ya wumboa; mkikulindia inyo mmbeni msechetimwa wori.

²Mtesiane mmbeni na mmbeni, mpate kuikatisha sharia ya Kristo.

³Angu mndungi ukaghesha wei oko kindo chimu, nao useko kindo chingi, uakukalia moni.

⁴Kula mundu ndeitime kazi yake moni; niko uchaakaia na sababu ra kukukasa kwake uo moni; hata si kwa mmbao anduangi.

⁵Angu kula mundu uchaghuduka msigo ghwake moni.

⁶Uo mundu ufundishwagha Ilagho ja Mlungu, ndewaghane vilambo vose viboie na uo umfundishagha.

⁷Msekalikie, Mlungu ndesekwagha; angu icho chose mundu uchiwagha, nicho cheni uchaachikuwida wori.

⁸Mundu ukawa kwa bea ra mumbi ghwake, kufuma kwa mumbi uchakuwida kuwoa; ela uo uwagha kwa Roho, kufuma kwa Roho uchakuwida irangi ja kala na kala.

⁹Nesi disesilo ni ndighi kubonya nicha, angu dichakuwida kwa ngelo yaro ikavika, iji dakaia disefue ngolo.

¹⁰Kwa huwo, diwibonyere wandu wose nicha ngelo diko na wulalo; na kuchumba awo wa kinyumba cha irumirio.

¹¹Wonenyi iro mbari namwandikia naro kwa mkonu ghwapo nimoni seji riko mbaa.

¹²Awo wandu wikundagha kukuwonyera weni kwa maza ra mumbi, niwo wawuyamfungisha ndighi mshamisho; eri tu wisechetirirwa kwa wundu ghwa msalaba ghwa Kristo.

¹³Angu hata awo weni wishamishwagha ndewiiwadiagha Sharia kungi; ela wadakunda inyo mshamisho, eri wipate kukukasa kwa kummbona mkikatisha ugho mzango ghwa mumbi.

¹⁴Ela ini, nisekukase na kindo chingi, isaakaia ni ugho msalaba ghwa Bwana odu Jesu Kristo; kwa ugho, wurumwengu ghwasulubishiro kwapo, na ini kwa wurumwengu.

¹⁵Angu kushamishwa na kuleghashamishwa, ndekutalikagha kukaia kindo chingi anduangi; jikundikie ni kuumbwa wuwishi.

¹⁶Na awo wandu wose wighendagha kwa kunugha chia ihi, sere na wughoma ndevikaie aighu kwawo; na kwa Israeli wa Mlungu.

¹⁷Kufuma idana mndungi usakenijisha wasi, angu naawuyadwa vilema va Jesu mumbinyi kwapo.

¹⁸Mvono ghwa Bwana odu Jesu Kristo, ndeghukaie andwamweri na roho renyu wanidu. Amen.