Read TAITA BIBLE – Biblia Ilagho Jiboie Kwa Wandu Wose WAEFESO 2 Bible Online

WAEFESO 2 - TAITA BIBLE – Biblia Ilagho Jiboie Kwa Wandu Wose bible

WAEFESO 2

¹Na inyo, oremkaishireghe moyo iji morekoghe mfue rohonyi kwa wundu ghwa makosa na kaung'a renyu;

²iro morekoghe mkighenda naro aho imbiri, kwa kunugha mighendo ya wurumwengu ughu, na uo m'baa wa ndighi ra mbeonyi; iyo roho yawuyabonya kazi idana andenyi ya wandu wisemsikiragha Mlungu.

³Na isi diwose derekoghe na bea ra mumbi aghadi kwawo, dikinugha bea ra mumbi na ra maririkanyo; na kwa asili, derekoghe aisi ya machu gha Mlungu, karakara na wandu wose.

⁴Ela Mlungu, uo uko na wughoma mungi, kwa lukundo lwake lubaa oredikundieghe nalo isi,

⁵hata iji derekoghe difue rohonyi kwa chia ya makosa ghedu, oredikaishireghe moyo chiaimweri na Kristo, (mookirwa kwa mvono)

⁶ukadirukisha andwamweri nao, na kudisera kidombo andwamweri nao andenyi ya malalo gha mlungunyi kwa Kristo Jesu;

⁷upate kwa ngelo richagha kuwonyera wungi ghwa mali ra mvono ghwake ghusepimikagha, ghwa kudibonyera mecha andenyi ya Kristo Jesu.

⁸Angu mookirwa kwa mvono kwa chia ya irumirio; najo si ibonyo jenyu jingi, ni inosi ja Mlungu;

⁹si kwa wundu ghwa mabonyo anduangi, mndungi usechekukasa.

¹⁰Angu nuo udibonyere, ukadiumba andenyi ya Kristo Jesu, kwa wundu ghwa mabonyo mecha; agho Mlungu oreghiboisireghe kufuma imbiri, dipate kughibonyaghaa.

¹¹Kwa huwu, kumbukenyi inyo morekoghe wandu wa mbari zima kimumbi, mkiwangwa wandu wiseshamishiro ni awo wiwangwagha wandu wishamishiro; uko kushamishwa kwa mumbi kubonyero kwa mikonu,

¹²kumbukenyi angu ngelo iro morekoghe kula na Kristo, mtanyiro na mbari ya Israeli. Ndemorekoghe na ifungu jingi andenyi ya ilaghano ja ilaghiro; morekoghe msewadie isuwirio jingi, hata Mlungu wurumwengunyi.

¹³Ela idana, andenyi ya Kristo Jesu, inyo morekoghe kula, mwaredelo kaavui kwa bagha ya Kristo.

¹⁴Angu uo nuo sere yedu, nao wadibonyere dikaie umweri, ukaghuvuchua ugho wurigha ghwa kusuana ghoreditanyireghe,

¹⁵kwa kuinja nambai ija Sharia ya memu na malaghiro kwa mumbi ghwake; upate kuumba mundu umweri mmbishi andenyi kwake wulalo ghwa awo wawi, na huwo ukareda sere.

¹⁶Ukadipatanisha na Mlungu isi diwose andenyi ya mumbi ghumweri kwa chia ya msalaba, na huwo ukameria kuja kusuana.

¹⁷Na Kristo ukacha, ukachila sere konyu inyo morekoghe kula, na wokoni kwa awo werekoghe kaavui.

¹⁸Angu kwa uo, isi diwose dapata chia emvikia uja Aba, andenyi ya Roho umweri.

¹⁹Kwa huwo idana, inyo ndemduagha waghenyi na wandu wemara-mara, ela moko wakitina andwamweri na waeli, nenyo moko wandu wa kinyumba cha Mlungu;

²⁰muaghilo aighu ya msingi ghwa wadumi, na walodi, Kristo Jesu moni ukikaia igho ja mbembenyi.

²¹Andenyi kwake, iaghi jose jawadanishwa chia imweri; najo jazoghua jikaie hekalu ya wueli andenyi ya Bwana.

²²Andenyi kwake inyo wori, mwaaghwa andenyi yaro, mkaie andu kokaia kwa Mlungu, andenyi ya Roho.