Read TAITA BIBLE – Biblia Ilagho Jiboie Kwa Wandu Wose WAEFESO 4 Bible Online

WAEFESO 4 - TAITA BIBLE – Biblia Ilagho Jiboie Kwa Wandu Wose bible

WAEFESO 4

¹Kwa huwu, ini niko mfungwa kwa wundu ghwa Bwana, namlomba mkaie na kughenda kufwananagha na kuwangwa konyu uko morewangiloghe.

²Mkaie wa kukusera, wa mboa, na kurumaghia kose, mkirumaghiana mmbeni na mmbeni kwa lukundo;

³mkifunga ndighi kughulindia ugho wumweri ghwa Roho andenyi ya kifungo cha sere.

⁴Mumbi ni ghumweri, na Roho ni umweri, sa iji koni morewangiloghe ni Mlungu kwa ijo isuwirio jimweri ja kuwangwa konyu.

⁵Bwana ni umweri, irumirio jimweri, na wubaputizo ghumweri.

⁶Mlungu ni umweri, nao ni Aba odu isi diwose; uo uko aighu ya vose, ubonyagha kazi kwa vose, nao wadakaia andenyi ya vose.

⁷Ela kula umu odu orenekeloghe mvono karakara na kipimo cha inosi ja Kristo.

⁸Kwa huwu Maandiko Ghielie ghaghamba, “Iji orejokieghe ighu na ndighi, orewadieghe wafungwa, na kuwineka wadamu manosi.”

⁹Kutambua kwaro uko kughamba “Orejokieghe,” niki ngera usereserieghe wori hata andu kwa aisi kwa ndoenyi?

¹⁰Uo oreserieghe, nuo moni orejokieghe wori ighu kuchumba mlungunyi kose, eri upate kuchura vilambo vose.

¹¹Na manosi ghake gherekoghe wamu wikaie wadumi, wamu wikaie walodi, wamu wikaie wachili wa Ilagho Jiboie, wamu wikaie walisha, na wamu wikaie walimu;

¹²kwa wundu ghwa kuwiwika nicha waeli kwa kazi ya wudumiki, kwa kuagha mumbi ghwa Kristo.

¹³Hata isi diwose dighuvikie wumweri ghwa irumirio, na kummanya Mwana wa Mlungu. Dizoghuo na kuwuya wandu wabaa, hata divikie kipimo cha kukata kwa Kristo;

¹⁴eri diseduo wanake wekumbwa-kumbwa ii chia na ii chia, na kudukwa ni kula mbeo ya mafundisho kwa mikalo ya wandu, na kwa wuya ghwawo ghwa tee.

¹⁵Wulalo ghwaro, dikighora loli kwa lukundo, dizoghuo kwa kula chia dimvikie Kristo uo uko chongo.

¹⁶Kufuma kwake uo, mumbi ghose ghukitumalilwa chiaimweri na kula iwungo jilishwagha nicha, wabonya mumbi ghose ghuzoghuo nicha kwa lukundo.

¹⁷Idana namghoria na kumshuhudia kwa irina ja Bwana, kufuma idana mseghende seji awo wandu wa mbari zima wighendagha kwa wuduu ghwa akili rawo.

¹⁸Maririkanyo ghawo ghangirwa kira, hata ndewitambukilwagha; watanyiro na irangi ja Mlungu, kwa wundu ghwa wukelu ghuko andenyi kwawo, na kukua kwa ngolo rawo.

¹⁹Ni wandu wishughunukie, nawo wakufunyire weni kwa wuchafu ghwa kula mbari, kwa lwafuo.

²⁰Ela inyo ndemorekufundishireghe Kristo huwo anduangi.

²¹Nani nasuwiria kukaia mwasikire malagho ghake, na kufundishwa andenyi yake seji loli iko andenyi ya Jesu.

²²Ruonyi ghuja wuasili ghonyu ghwa tabia ya kala, ya irangi ja kunoneka kwa bea ra mikalo;

²³m'bonyo wawishi rohonyi na akilinyi konyu,

²⁴na kurwa wundu wuwishi ghuumbilo kwa fwana ya Mlungu, kwa hachi ya loli na wueli.

²⁵Kwa huwu mkisigha tee, kula mundu ughorie mmbao loli; angu deko via diweni na diweni.

²⁶Mkajokwa ni machu, msebonye kaung'a; msesighe ndoe iso mduagha na machu,

²⁷hata msemneke Ibilisi wulalo.

²⁸Mundu orekoghe kitoi, useiwe sena; ela bora ubonye kazi ndicha kwa mikonu yake, eri udime kuwitesia awo wisewadie.

²⁹Msakededa malagho ghangi ghizamie, ela mdede agho gheni ghiko mecha kwa wundu ghwa kuaghana; agho gheni ghifwanagha kwa ngelo yaro, ghipate kuwineka mvono awo wisikiragha.

³⁰Hata msakemvavira Roho Mweli wa Mlungu, uo morekabiloghe muhuri andenyi kwake, hata ituku ja kukombolwa konyu.

³¹Kubia kose, makai, machu, nganyi, kuzighiria, na mawiwi ghose, mtane nagho putu;

³²nenyo m'bonyerane nicha mmbeni na mmbeni. Mkaie na ngolo ya kinyoshi, mkifuyana wughoma mmbeni na mmbeni; sa iji koni Mlungu oremfueghe wughoma andenyi ya Kristo.