Read TAITA BIBLE – Biblia Ilagho Jiboie Kwa Wandu Wose WAFILIPI 1 Bible Online

WAFILIPI 1 - TAITA BIBLE – Biblia Ilagho Jiboie Kwa Wandu Wose bible

WAFILIPI 1

¹Ini Paulo na Timotheo, wadumiki wa Kristo Jesu, namuandikia inyo waeli wose wiko andenyi ya Kristo Jesu aho Filipi, chiaimweri na wazighaniri, na watesia wa ikanisa.

²Mvono ndeghukaie konyu, na sere rifumagha kwa Mlungu Aba odu na kwa Bwana Jesu Kristo.

³Ngelo rose nimkumbukagha inyo, nadamfunyira Mlungu wapo chawucha,

⁴na kula ngelo nimlombiagha inyo, nadamlombia kwa kuboilwa;

⁵ngifunya chawucha kwa wundu ghwa wungara ghonyu aighu ya ijo Ilagho Jiboie, kufuma jija ituku ja imbiri hata idana.

⁶Nani neko na loli kukaia, uo oreizoeghe kazi ndicha andenyi konyu, uchadua ukiikatisha hata ijo Ituku ja Jesu Kristo.

⁷Ni hachi ini kumririkanyira huwo inyo mmbose, kwa kukaia moko ngolonyi kwapo. Angu inyo mmbose moko wangara wa mvono andwamweri nani kwa kufungwa kwapo, na kwa kujidederia na kujimangisha ijo Ilagho Jiboie.

⁸Angu Mlungu ni mshahidi wapo seji niko na bea mbaa kwa wundu ghonyu mmbose, kwa lukundo lwa Kristo Jesu.

⁹Ilombi japo ni angu lukundo lonyu luchurikie nandighi kuchumba, chiaimweri na kumanya na kutambukilwa kose;

¹⁰eri mpate kusaghua iro riboie kuchumba, na kukaia muelie msewadie ikosa jingi ijo Ituku ja Kristo,

¹¹muko mchulo ni matunda gha hachi agho ghifumanyagha na Jesu Kristo, kwa wubaa na kukasa kwa Mlungu.

¹²Nakunde mmanye wanidu, kukaia maza rerenipatireghe, rateserie nandighi kueresha ijo Ilagho Jiboie.

¹³Walindiri wose wa ngomenyi, chiaimweri na wandu wazima wose, wacheemanya wori kufungwa kwapo ni kwa wundu ghwa Kristo;

¹⁴na kaavui ya wanidu wose, wacheemangishwa andenyi ya kumrumiria Bwana, kwa wundu ghwa kufungwa kwapo; nawo wachua wuwana ghojighora ilagho ja Mlungu kuseko na wowa.

¹⁵Wamu loli wamchila Kristo kwa iriso na nganyi, ela wazima wamchila kwa nia iboie.

¹⁶Awo wazima wabonya huwo kwa lukundo, wikimanya angu neewikwa aha nipate kujilindia ijo Ilagho Jiboie.

¹⁷Awo wamu waawuyamchila Kristo kwa nganyi hata si kwa nia ielie anduangi, wikikunda kuniredia wasi nikikaia kifungonyi.

¹⁸Da uko niwada? Ngera ni kwa mikalo, angu ngera ni kwa loli, kose-kose Kristo waawuyachilwa; na kwa wundu ghwa ijo ilagho, naboilwa.

¹⁹Hee, nani nichachuria kuboilwa. Angu namanya kwa chia ya malombi ghenyu, na kwa wutesia ghwa Roho wa Jesu Kristo, maza iri richaghaluka rikaie kukia kwapo.

²⁰Angu niko nawuyawona na kusuwiria nandighi kukaia, sichaafushwa waya anduangi; ela kwa ngolo mbaa, idana sa matuku ghose, Kristo uchabonyerwa ishima mumbinyi kwapo; ngera ni kwa chia ya kukaia moyo, angu kwa chia ya kufwa.

²¹Angu kwapo ini kukaia moyo ni Kristo, na kufwa ni fwaida.

²²Ikakaia ni kudua moyo mumbinyi, iawonyera kazi inirediagha matunda. Elaima siwuemanya nisaghua jiao.

²³Naawuyasumbulwa ni maghesho awi-awi; nakunde niende kukanya na Kristo, angu ijo jachumbie ghose;

²⁴ela kukaia moyo mumbinyi kwakundikie kwa wundu ghonyu.

²⁵Neko na wuloli ghwa ilagho iji: namanya angu nichachuria kukanya nenyo mmbose kwa wundu ghwa kughenda imbiri konyu na kuboilwa konyu, andenyi ya irumirio;

²⁶eri mpate sababu mbaa ekukasa kwa wundu ghwapo andenyi ya Kristo Jesu; angu nichacha konyu sena.

²⁷Ilagho jikundikie konyu, ni ja inyo kughenda karakara na ijo Ilagho Jiboie ja Kristo, eri ngera nacha kummbona, angu ngera nakaia kula nenyo, nisikire wori mwawuyamanga andenyi ya roho imweri, muko na nia imweri, mkifunga ndighi chiaimweri kwa irumirio ja Ilagho Jiboie;

²⁸msewiobuagha watangali wenyu kwa ilagho jingi. Ihi ni alama kwawo iko worinyi iwonyeragha kutota kwawo, ela konyu ni kukia nako kuafuma kwa Mlungu.

²⁹Angu inyo mwanekelo, si uko kurumiria Kristo koni anduangi, ela hata na kutirirwa wori kwa wundu ghwake;

³⁰mkikaia andenyi ya ghuja wuda ghoni moreghuwonieghe, ugho mwawuyasikira niko nagho idana.