Read TAITA BIBLE – Biblia Ilagho Jiboie Kwa Wandu Wose WAKOLOSAI 1 Bible Online

WAKOLOSAI 1 - TAITA BIBLE – Biblia Ilagho Jiboie Kwa Wandu Wose bible

WAKOLOSAI 1

¹Ini Paulo, mdumi wa Kristo Jesu kwa kukunda kwa Mlungu, na Timotheo mwanidu,

²namuandikia inyo waeli na wanidu wa loli andenyi ya Kristo wiko Kolosai. Mvono ndeghukaie konyu na sere rifumagha kwa Mlungu Aba odu.

³Matuku ghose dadamfunyira Mlungu chawucha, uo ndee wa Bwana odu Jesu Kristo, iji dakamlombia;

⁴angu dasikire malagho gha irumirio jenyu muko najo kwa Kristo Jesu, na lukundo muko nalo kwa waeli wose;

⁵kwa wundu ghwa ijo isuwirio jiwikilo aighu mlungunyi kwa wundu ghonyu. Nenyo moresikireghe malagho gharo imbiri, andenyi ya ijo ilagho ja loli, ijo Ilagho Jiboie

⁶jerechieghe konyu, sa iji koni loli jawuyaera wurumwengunyi kose jikiva matunda na kuzoghua. Huwo koni, na aghadi konyu, kufuma morejisikireghe na kutambukilwa ni ugho mvono ghwa Mlungu andenyi ya loli,

⁷sa iji koni morekufundishireghe kufuma kwa Epafra mkundwa na mngara odu kwa wudumiki. Uo, ni mdumiki mloli wa Kristo wulalo ghodu,

⁸nao wadighorie malagho gha lukundo muko nalo andenyi ya Roho.

⁹Kwa wundu ugho, kufuma dasikira agho, dadamlombia toe; eri mchulo ni kulumanya lukundo lwa Mlungu, kwa suku rose ra kiroho na kutambukilwa.

¹⁰Mkaie na irangi jimfwanagha Bwana, jim'boiagha putu, mkibonya kazi ndicha kwa kula chia, na kuchurikia kwa kummanya Mlungu.

¹¹Mfungisho ndighi kwa kudima kose, karakara nandighi rake ra wubaa, eri mpate kurumaghia kose na wumboa mkiboilwa.

¹²Mkimfunyira Aba chawucha, uo umdimishire kukaia wandu wifwane kukaia wangara wa ijo ifwa ja waeli, andenyi ya ugho mwengere.

¹³Nao wadikirie kufuma kwa iro ndighi ra kira, ukadibarisha na kudingira andenyi ya wuzuri ghwa Mwana wake mkundwa;

¹⁴andenyi kwake uo, deko na kukombolwa, kuja kufuilwa wughoma kaung'a redu.

¹⁵Kristo ni fwana ya Mlungu usewonekagha, nao ni wa imbiri kuvalwa wa ivo vilambo viumbilo vose.

¹⁶Angu andenyi kwake uo, vilambo vose vereumbiloghe; va mlungunyi na va ndoenyi, ivo viwonekagha na ivo visewonekagha; ngera ni awo wibonyagha nguma, angu wazuri, angu wubaa, angu kudima; vilambo vose vereumbiloghe kwa chia yake na kwa wundu ghwake.

¹⁷Kristo oko imbiri ya vilambo vose, na vilambo vose vawadiana chiaimweri andenyi kwake.

¹⁸Nao nuo chongo cha mumbi, najo ni ikanisa; uo ni uko kuzoya, nao nuo wa imbiri wa kuruka kufuma kwa wafu; eri upate kukaia wa imbiri kwa maza rose.

¹⁹Angu erem'boieghe Mlungu kuchua kwake kose kukaie andenyi ya uo Mwana;

²⁰na kwa chia ya uo Mwana, uvipatanishe vilambo vose na uo moni; ngera veeka ndoenyi, angu mlungunyi; na kubonya sere kwa chia ya bagha kwa kifwa cha msalaba ghwake.

²¹Na inyo ngelo rimu morekoghe kula na Mlungu, mkikaia wamaiza wake, kwa wundu ghwa mabonyo na maririkanyo ghenyu ghizamie.

²²Ela idana, wampatanishire na uo moni kwa chia ya kifwa cha Mwana wake, uko na mumbi ghwa nyama; upate kumreda inyo imbiri kwake wandu wielie, msewadie iboli hata ikosa jingi.

²³Elaima yamfwana mduo andenyi ya jija irumirio, mmangishiro, msenyavurikagha, hata kujisigha ijo isuwirio ja Ilagho Jiboie ijo morejisikireghe; najo jachililo kwa kula mundu wurumwengunyi kose, na kwa wundu ghwaro, ini Paulo nawurie mdumiki waro.

²⁴Idana naboilwa andenyi ya matiriro ghapo kwa wundu ghonyu, nani naawuyakatisha kwa mumbi ghwapo agho matiriro gha Kristo ghisigharikie kwa wundu ghwa mumbi ghwake, najo ni ikanisa.

²⁵Kwa wundu ghwaro, nawurie mdumiki karakara na mpango ghwa mlungunyi kwa wundu ghonyu, nipate kujibonya Ilagho ja Mlungu jimanyike putu;

²⁶najo ni ngasu erevisiroghe kufuma kala kwa vivalwa vose, ela idana yamerie kufunukulwa kwa waeli wake.

²⁷Mlungu oresaghueghe kuwimanyisha awo waeli, seji ugho wungi ghwa mali ra wubaa ghwa ngasu ihi ghuko, aghadi ya wandu wa mbari zima; nagho ni Kristo andenyi konyu, isuwirio ja wubaa.

²⁸Uo dawuyamchila dikiwonyera, na kumfundisha kula mundu kwa hikima yose, eri dimrede kwa Mlungu kula mundu wameria kuzoghua andenyi ya Kristo.

²⁹Kwa wundu ughu, nabonya kazi ngifunga ndighi kwa uko kudima Kristo wawuyanidimisha andenyi kwapo.