Read TAITA BIBLE – Biblia Ilagho Jiboie Kwa Wandu Wose WAKOLOSAI 3 Bible Online

WAKOLOSAI 3 - TAITA BIBLE – Biblia Ilagho Jiboie Kwa Wandu Wose bible

WAKOLOSAI 3

¹Idana ikakaia mrukishiro na Kristo, lolenyi maza iro riko aighu, andu Kristo uko, wasea kidombo chia ya mkonu ghwa kiwomi ghwa Mlungu.

²Ririkanyenyi maza riko aighu iro riko andoenyi mbai.

³Angu mwafue, na irangi jenyu javisiro andwamweri na Kristo kwa Mlungu.

⁴Kawona Kristo wawoneka uo uko irangi jedu, niko inyo wori mchawoneka andwamweri nao andenyi ya wubaa.

⁵Kwa huwu ribwaghenyi iro bea ra wurumwengu riko andenyi konyu; kulaka, kushughunuka, mirudo ya bea, bea rizamie, na iriso, najo ni kutasa milimu;

⁶kwa wundu ghwa agho, machu gha Mlungu ghaawuyacha aighu ya awo wisesikiragha.

⁷Nenyo moreghendieghe kwa maza iro aho imbiri, iji moredueghe naro.

⁸Ela idana, riinjenyi na mbai iri rose; machu, lubio, lubando, kusholia, na madedo ghizamie kufuma memunyi konyu.

⁹Msekaliane mmbeni na mmbeni, angu mwamerie kughurua ghuja wundu ghwa kala na tabia yaro,

¹⁰na kurwa wundu wuwishi; nagho ghwaawuyabonywa wuwishi ghupate kummanya kwa kufwananishwa na uo muumbi wake.

¹¹Aha ndekuwadie wuchumbano ghungi aghadi ya Mgriki na Myahudi, wandu wishamishiro na awo wiseshamishiro, wandu wisestaarabikie, na wistaarabikie, mzumba na mkitina; ela Kristo ni vose, nao oko andenyi ya vose.

¹²Idana inyo sa wandu wa Mlungu msaghulo, waeli mkundo, mkaie na ngolo ya wughoma, wucha, kukusera, wumboa, na kurumaghia;

¹³mkirumaghiana mmbeni na mmbeni, na ngera mndungi oko na ilagho jingi aighu ya mmbao, mfuyane wughoma sa iji koni Bwana oremfuyeghe wughoma inyo, nenyo wori suti mfuyane wughoma.

¹⁴Aighu ya agha ghose, mkaie na lukundo, ulo luwadanishagha maza rose chia imweri, na kurikatisha nicha.

¹⁵Sere ya Kristo ndeibonye nguma ngolonyi konyu, nayo kwa loli niyo moreiwangiloghe mkaie andenyi ya ugho mumbi ghumweri; nenyo mkaie na chawucha.

¹⁶Ilagho ja Kristo ndejikaie andenyi konyu kwa wungi, mkifundishana na kuwonyerana mmbeni na mmbeni kwa hikima yose. Mkibora zaburi, na chumbo, na chumbo ra kiroho; mkimfunyira Mlungu chawucha ngolonyi konyu.

¹⁷Nenyo mkakabonya ilagho ijo jose, kwa madedo angu kwa mabonyo, bonyenyi kula ilagho kwa irina ja Bwana Jesu, mkimfunyira Mlungu Aba chawucha kwa uo.

¹⁸Inyo waka, mkuwike aisi ya womi wenyu sa iji ifwanagha andenyi ya Bwana.

¹⁹Nenyo womi, muwikunde waka wenyu, hata msakekaia na lubio nawo.

²⁰Na inyo wana, muwisikire wavi wenyu kwa kula ilagho, angu ilagho ijo jam'boia Bwana.

²¹Nenyo weke aba, msakewinona ngolo wana wenyu, wichefwa ngolo.

²²Inyo wazumba, muwisikire awo wiko weke bwana wenyu wa kimumbi kwa kula ilagho; si ngelo wiko aeni wikimzighanira, sa kukunda kuwiboia wadamu anduangi; ela kwa ngolo ya loli mkimuobua Bwana.

²³Ijo jose m'bonyagha bonyenyi kwa ngolo, sa kum'bonyera Bwana, hata si wandu anduangi;

²⁴mkimanya angu mchapata ifwa kufuma kwa Bwana kukaia mafungu ghenyu, angu mwaawuyamdumikia Bwana Kristo.

²⁵Angu uo ubonyagha kiwiwi, uchalipwa karakara na kiwiwi uchibonyere; hata ndekuwadie kutala wandu kungi anduangi.