Read TAITA BIBLE – Biblia Ilagho Jiboie Kwa Wandu Wose WAKOLOSAI 4 Bible Online

WAKOLOSAI 4 - TAITA BIBLE – Biblia Ilagho Jiboie Kwa Wandu Wose bible

WAKOLOSAI 4

¹Inyo weke bwana, wibonyerenyi wazumba wenyu ijo jiko ja karakara na ja hachi, mkimanya angu inyo wori moko na Bwana mlungunyi.

²Duonyi mkilomba kwa kufunga ndighi, na kucheresha andenyi yaro, mkifunya chawucha.

³Mdilombie na isi wori, eri Mlungu udirughuye mnyango ghojighora ijo ilagho, dipate kuieresha iyo ngasu ya Kristo, iyo nayo kwa wundu ghwaro, neko kifungonyi;

⁴eri nipate kuiwika worinyi seji inifwanagha kughora.

⁵Mkaie na hikima kwa awo wandu wiserumirie, mkitumia ngelo nicha.

⁶Madedo ghenyu ghikaie gha mvono ngelo rose, sa vindo vilungilo na munyu, mpate kumanya seji imfwane kumtumbulia kula mundu.

⁷Tukiko uchamghoria malagho ghapo ghose; uo ni mwanidu mkundwa, mdumiki mloli, na m'bonyi kazi andwamweri nani andenyi ya Bwana.

⁸Naamduma konyu kwa wundu ghwa iji ilagho jeni, eri mpate kumanya seji dawuyakaia, nao umkumbe ngolo.

⁹Wachanya na Onesimo, uo mwanidu mloli na mkundwa, nao ni mumzenyu. Awo wichamghoria kula ilagho jibonyekie aha.

¹⁰Aristariko mfungwa andwamweri nani wamroghua, na Marko mwandee wake Barnaba; (ni uja Marko mpatire malagho ghake, ukacha konyu mummbuse)

¹¹na Jesu uhu uwangwagha Justo. Awa wiekeri niwo wayahudi, wiko aghadi ya wandu wawuyabonya kazi chiaimweri nani, kwa wundu ghwa Wuzuri ghwa Mlungu; nawo werekoghe wikinihoresha ngolo nandighi.

¹²Epafra mumzenyu, nao ni mdumiki wa Kristo Jesu, wamroghua. Wawuyamlombia nandighi ngelo rose, mkaie wandu mzoghue mmangishiro, muichi putu ulo lukundo lose lwa Mlungu.

¹³Angu ini namshuhudia kukaia wabonyere kazi mbaa kwa wundu ghonyu, na kwa wundu ghwa wandu wa Laodikea, na Hierapoli.

¹⁴Luka uo mghanga mkundwa, na Dema wamroghua.

¹⁵Niroghuenyi wanidu wa Laodikea, na Nimfa, chiaimweri na ijo ikanisa jikwaniagha nyumbenyi kwake.

¹⁶Mkameria kushomelwa ihi barua, bonyenyi ishomelo ikanisa ja Walaodikea wori, na inyo mshome iyo barua ifumie ikanisa ja Laodikea.

¹⁷Mzerenyi Arikipo huwu: “Manya kughukatishe wudumuki ugho kughupatire kufuma kwa Bwana.”

¹⁸Ini Paulo naandika voro iri kwa mkonu ghwapo nimoni. Kumbukenyi seji nifungilo. Mvono ndeghukaie konyu.