Read TAITA BIBLE – Biblia Ilagho Jiboie Kwa Wandu Wose 1 WATHESALONIKE 5 Bible Online

1 WATHESALONIKE 5 - TAITA BIBLE – Biblia Ilagho Jiboie Kwa Wandu Wose bible

1 WATHESALONIKE 5

¹Ela wanidu kwa wundu ghwa malagho gha ngelo na vimu, ndemne haja eandikilwa ilagho jingi anduangi.

²Angu inyo mmbeni mwaichi putu kukaia ijo Ituku ja Bwana jiacha seji kitoi chichagha nakio.

³Iji wandu wakaghora, “Ni sere na banana” niko kutota kuchaawichea shwa wori; seji koni muka uko na kifu uchelwagha ni kulumwa ngelo ya kuva, hata ndewichaafufunuka anduangi.

⁴Ela inyo ndemko kirenyi anduangi, hata ijo ituku jimchee sa kitoi.

⁵Angu inyo mmbose mo wandu wa mwengere, na wandu wa dime; isi ndediko wandu wa kio, hata wandu wa kira anduangi.

⁶Kwa huwo disakelala seji wazima wilalagha, ela dichereshe na kukaia na akili.

⁷Angu awo wilalagha wadalala nakio, na awo wiwongiagha wadawongia nakio.

⁸Ela angu isi de wandu wa dime, ndedikaie na akili, dikirwa irumirio na lukundo sa ngao ya laghenyi, na isuwirio ja kukia sa kofia ya chuma.

⁹Angu Mlungu nderediwikieghe wei dichetota kwa machu ghake anduangi, ela orediwikieghe dipate kukia kwa chia ya Bwana odu Jesu Kristo;

¹⁰uo orefueghe kwa wundu ghodu, eri dipate kukaia moyo andwamweri nao; ikaiagha deko moyo, angu ngera dafue.

¹¹Kwa huwo kumbanenyi ngolo mmbeni na mmbeni, na kuaghana mmbeni na mmbeni, seji koni mwawuyabonya.

¹²Ela damvoya wanidu, muwineke ishima awo wandu wawuyabonya kazi aghadi konyu, wikikaia aighu yenyu kwa kummbonyera na kumuagha kwa wundu ghwa Bwana.

¹³Muwitale kwa ishima ibaa na lukundo kwa wundu ghwa kazi yawo. Mkaie na sere mmbeni na mmbeni.

¹⁴Idana wanidu damshashira muwikanie na kuwiwonyera awo wiko waghadi, muwikumbe ngolo awo wifwagha ngolo, muwitesie wanyonge, mkaie na irumaghio kwa wose.

¹⁵Manyenyi angu mndungi onyu usakelipia kiwiwi kwa kiwiwi, ela matuku ghose mlole kubonyerana mecha mmbeni na mmbeni kwa wandu wose.

¹⁶Boilonyi matuku ghose,

¹⁷lombenyi tulituli,

¹⁸funyenyi chawucha kwa maza rose; angu huwo niko Mlungu ukunde konyu inyo muko andenyi ya Kristo Jesu.

¹⁹Msakemrimisha uo Roho,

²⁰msakemenya malagho gha wulodi,

²¹ela mritime maza rose, na kurimazira iro riko riboie;

²²mkutanye na wuwiwi ghwa kula mbari.

²³Uo Mlungu moni wa sere, ndemueleshe inyo putu; roho renyu, na nia renyu, na mimbi yenyu; ikilindilwa nicha kuseko na ikosa jingi hata ngelo ya kucha kwake Bwana odu Jesu Kristo.

²⁴Uo ummbangagha ni mloli, nao uchabonya huwo koni.

²⁵Dilombienyi wanidu.

²⁶Muwiroghuo wanidu wose kwa msusugho ghwa wueli.

²⁷Namlaghira kwa irina ja Bwana kukaia barua ihi ishomelo wanidu wose.

²⁸Mvono ghwa Bwana odu Jesu Kristo ndeghukaie andwamweri nenyo.