Read TAITA BIBLE – Biblia Ilagho Jiboie Kwa Wandu Wose JOSHUA 18 Bible Online

JOSHUA 18 - TAITA BIBLE – Biblia Ilagho Jiboie Kwa Wandu Wose bible

JOSHUA 18

¹Hata iji wameria kusima isangenyi, izungu jose ja wandu wa Israeli jikakwanyika Shilo na kuidunga iyo Hema Ekwania.

²Aghadi ya wandu wa Israeli, korekoghe na vichuku mfungade veresigharikieghe visewaghilo ifwa ja isanga.

³Niko Joshua ukawizera wandu wa Israeli, “Mmbeseria hata lii msengiagha na kujiwada isanga, ijo BWANA, uo Mlungu wa weke ndeyo oremnekieghe jikaie ifwa jenyu?

⁴Niredienyi wandu wadadu wadadu kufuma kwa kula kichuku; nani nichawiduma isangenyi kose wipate kujizighana na kubonya mchoro ghwa isanga, ijo wichaawona jichawifwana kukaia ifwa jawo; nao winiwurie sena.

⁵Wichajiwagha mafungu mfungade; Juda uchakaia isangenyi kwake noko cha kusinyi, na Josefu uchakaia isangenyi kwake cha kaskazinyi.

⁶Nenyo mchaandika mchoro ghwa isanga jiwaghilo mafungu mfungade mpate kuniredia; nani nichakaba kura imbiri ya BWANA Mlungu odu kwa wundu ghonyu.

⁷Ela Walawi ndewichaapata ifwa ja isanga andwamweri nenyo anduangi, kwa kukaia ifwa jawo jichakaia andenyi ya wudumiki ghwa wukohani ghwa BWANA. Sena kichuku cha Gadi, Reubeni, na nusu ya kichuku cha Manase wikaiagha cha mashariki, wamerie kupata ifwa jawo cha mashariki kimonu cha Jordani, ijo Musa mdumiki wa BWANA orewinekieghe.”

⁸Niko awo wandu wikazoya charo chawo na Joshua ukawilaghira awo wandu weandika michoro ya isanga ukighamba, “Mghende andu kose mkiandika michoro yose ya isanga, muniredie; nani nichakaba kura imbiri ya BWANA aha Shilo kwa wundu ghonyu.”

⁹Niko awo wandu wikaghenda, wikaida andu kose isangenyi, wikaandika michoro chuonyi seji wajiwagha isanga mafungu mfungade, na kuandika mizi yaro; niko wikacha kambinyi kwa Joshua aho Shilo.

¹⁰Joshua ukakaba kura kwa wundu ghwawo kumkotia BWANA aho Shilo, ukawaghia kula kichuku cha wandu wa Israeli ifwa jawo.

¹¹Kura ya kichuku cha Benjamini kunughana na nyumba rawo ikakaia ya imbiri kufuma. Isanga jake jikakaia ghadi na ghadi ya isanga ja Juda na Josefu.

¹²Ii chia cha kaskazinyi, mpaka ghwawo ghukazoia Jordani na kujokeria luwarunyi kaskazinyi ya Jeriko, na kuida cha magharibi kuidiria isanga ja mighondinyi hata kireti cha Beth-aveni.

¹³Ugho mpaka ghukaenda hata mshoromotonyi chia ya kusinyi ya Luzu (nigho Betheli) ghukasea hata Ataroth-ada, aighu mghondinyi kusinyi cha Beth-horoni Ya Isi.

¹⁴Mpaka ghukaghaluka chia zima cha kusinyi kufuma magharibi ya ugho mghondi ghuko cha kusinyi kulangaya Beth-horoni, na kutua Kiriath-jearimu iko ya mbari ya Juda. Ugho ghorekoghe ni mpaka ghwa chia ya magharibi.

¹⁵Mpaka ghwa kusinyi ghodezoia mdonyi ghwa Kiriath-jearimu na kughenda magharibi hata Ndoria ya Neftoa.

¹⁶Niko ghukasea nokoisi hata kirimba cha mghondi ghulangayagha Vololo ya Hinomu, ghuko kaskazinyi kutuonyi kwa Vololo ya Refaimu. Niko ghukaida cha kusinyi, kuidiria Vololo ya Hinomu; cha kusinyi luwarunyi kwa Wajebusi na kusea nokoisi cha Enrogeli.

¹⁷Niko ghukaghaluka kaskazinyi cha En-shemeshi ghukaenda hata Gelilothi kulangaya mishoromoto ya Adumimu. Ugho mpaka ghukasea hata Igho ja Bohani mwana wa Reubeni;

¹⁸ghukaidiria kaskazinyi luwarunyi kwa Beth-araba, na kusea cha vololonyi,

¹⁹ghukaidiria luwarunyi lwa kaskazinyi ya Beth-hogla, na kusiria cha kaskazinyi andu moda ghwa Jordani ghungiriagha Bahari ya Chumbi. Ugho nigho mpaka ghwa kusinyi.

²⁰Moda ghwa Jordani nigho ghorekoghe mpaka ghwa mashariki. Ugho nigho mpaka ghwa kichuku cha Benjamini kwa ijo isanga werenekeloghe jikaie ifwa jawo.

²¹Mizi ya kichuku cha Benjamini kunughana na nyumba rawo niyo ihi, Jeriko, Beth-hogla, Emek-kesisi,

²²Beth-araba, Zemaraimu, Betheli,

²³Avimu, Para, Ofra,

²⁴Kefar-amoni, Ofni, na Geba; mizi ikumi na iwi chiaimweri na mizi yaro mitini.

²⁵Sena korekoghe na Gibeoni, Rama, Beerothi,

²⁶Mispa, Kefira, Moza,

²⁷Rekemu, Irpeeli, Tarala,

²⁸Zela, Haelefu, Jebusi (angu Jerusalemu) Gibea na Kiriath-jearimu: mizi ikumi na ina, chiaimweri na mizi yaro mitini. Iji nijo ifwa ja kichuku cha Benjamini kunughana na nyumba rawo.