Read TAITA BIBLE – Biblia Ilagho Jiboie Kwa Wandu Wose JOSHUA 2 Bible Online

JOSHUA 2 - TAITA BIBLE – Biblia Ilagho Jiboie Kwa Wandu Wose bible

JOSHUA 2

¹Niko Joshua mwana wa Nuni ukaduma washeki wawi kufuma kambi ya Shitimu, kuzighana isanga ja Kanaani kwa kiviso, na kuchumba, ugho muzi ghwa Jeriko. Wikangia muzi ghwa Jeriko, wikalala nyumbenyi kwa ilaya jimu jiwangwagha Rahabu.

²Mzuri wa Jeriko ukaghorelwa kukaia wandu wamu wa Israeli wacha nakio kujizighana isanga.

³Niko mzuri ukaduma wandu kwa Rahabu ukighamba, “Funya awo wandu wangia nyumbenyi kwako, angu waacha kujizighana isanga jose.”

⁴Ela uja muka orekoghe wawivisa awo wandu wawi; ukawitumbulia waja wandu, “Loli awo wandu wacha wikangia nyumbenyi kwapo, ela siwimanyire andu wafuma;

⁵na ngelo mbenge yakarughwa nakio, wikafuma wikaghenda, nani simanyire andu waghenda anduangi. Winughenyi shwa-shwa, muwiwade.”

⁶Ela Rahabu orekoghe wawijosa awo wandu gorofenyi na kuwivisa aisi ya miringodi ya kitani oreiwikieghe aho.

⁷Waja wandu wa mzuri wikafuma, na mbenge ikarughwa. Wikawinugha awo wandu cha Jordani hata kiruwukonyi.

⁸Ela imbiri awo wandu wiselale, Rahabu ukawighendia aho gorofenyi,

⁹ukawizera, “Ini namanya angu BWANA wamneka iji isanga; isi diwose daawuyamuobua, na wandu wose wiko isangenyi wangirilo ni kiture chenyu.

¹⁰Dasikire seji BWANA uiomeshere Bahari ya Shamu imbiri konyu ingelo mfumie Misri, na seji muwibwaghie Sihoni na Ogu waja wazuri wawi wa Waamori, kimonu cha mashariki ya Jordani.

¹¹Diendasikira huwo ngolo redu rikangilwa ni kiture chenyu, hata mndungi ndecheesighwa na wuwana ghungi anduangi; angu BWANA Mlungu onyu nuo Mlungu aighu mlungunyi na ndoenyi wori.

¹²Idana munibonyere ighemi kwa BWANA, angu seji nam'bonyera wughoma, nenyo muchanibonyera ini wughoma wokoni chiaimweri na kinyumba cha aba; sena munineke alama ya loli,

¹³kughamba, mchamkira aba, mao, wanidu wa womi na wa waka na wose wikwanye; mpate kughivuvua marangi ghedu disefo.”

¹⁴Waja wandu wikamzera, “Daghema kwa Mlungu, kukadilindia, dichakulindia. Ikakaia kuchalindia kuseghore malagho ghedu, nesi wori dichakaia waloli kwako kukulindia ngelo BWANA uchaadineka iji isanga.”

¹⁵Nao Rahabu ukawisera awo wandu kuidiria idirishenyi kwa kamba, angu nyumba yake erekoghe wurighenyi ghwa muzi.

¹⁶Ukawizera, “Ghendenyi cha mghondinyi msechekwana na waja wandu wimlolagha, mkaie aho matuku adadu hata awo wandu wameria kuwuya; konyuma mwende chia yenyu.”

¹⁷Waja wandu wikamzera, “Dichalindia iji ighemi dakubonyera.

¹⁸Ola iji dangia isangenyi, kulindie kuseliwe kufunga uhu uzi wa ngundu idirishenyi ijeni kwadiseria; nao kuwirede ndeyo, mayo na wanyinyu wa womi na kinyumba chose cha ndeyo andenyi ya nyumba yako.

¹⁹Mndungi ukafuma shighadi ya nyumba yako na kughenda chienyi, nao ubwagho, bagha yake ichakaia aighu yake moni, isi ndedine ikosa; ela mndungi uko nyumbenyi kwako dikam'bwagha, bagha yake ichakaia aighu yedu.

²⁰Na oho kukaghora maza redu, ndedichaafungwa ni iji ighemi dakubonyera.”

²¹Nao ukaghamba, “Ndeikaie woruwo sa madedo ghenyu.” Ukawisigha wighende. Nawo wimeria kughenda, ukafunga uja uzi wa ngundu idirishenyi.

²²Nao awo wandu wikajoka cha mghondinyi, wikakaia aho matuku adadu, hata waja werewinughagha wameria kuwuya; kwa kukaia waja wandu werewilolagha werewinughieghe chienyi kose wikawisowa.

²³Niko waja wandu wawi wikasea kufuma mighondinyi wikaida modenyi na kucha kwa Joshua mwana wa Nuni; wikamghoria malagho ghose gherewipatireghe.

²⁴Wikamzera Joshua, “Loli BWANA wadinekie jija isanga jose mikonunyi kodu, sena waisanga waro wamerie kufwa ngolo kwa wundu ghodu.”