Read TAITA BIBLE – Biblia Ilagho Jiboie Kwa Wandu Wose JOSHUA 20 Bible Online

JOSHUA 20 - TAITA BIBLE – Biblia Ilagho Jiboie Kwa Wandu Wose bible

JOSHUA 20

¹Niko BWANA ukamzera Joshua,

²“Zera wandu wa Israeli wisaghuo mizi imu ekimbiria, iyo neremzerieghe Musa umghorie,

³kukaia, mundu ukam'bwagha mndumu kwa ndengwa, udime kukimbiria na kukuvisa kufuma kwa uo ukunde kulipia kisasi.

⁴Nao wadima kukimbiria imu ya mizi iyo, eri udime kuvikisha malagho ghake kwa waghosi aho mbengenyi ya muzi, upate kuwighoria vilongozi agho ghabonyeka. Niko wichamneka wulalo ghokimbiria andenyi ya muzi, nao upate kukaia aho.

⁵Iji mundu olipia kisasi wamnugha, awo wandu wa muzi suti wimlindie wisemfunye mikonunyi kwa uo mundu olipia kisasi, kwa kukaia nderebwaghieghe mundu kwa kukunda kwake, edeeka ni ndengwa, hata nderekoghe na kisasi chingi nao koimbiri anduangi.

⁶Nao uchakaia andenyi ya ugho muzi, hata waredwa kutanyonyi imbiri ya izungu ja wandu; na hata uja uko Mkohani M'baa ngelo iyo wameria kufwa, niko aho wadima kuwuya cha muzi ghuja orefumieghe.”

⁷Niko aho wikafunya muzi ghwa isanga ja Kedeshi ghuko andenyi ya Galilaya, isanga ja mighondinyi ja Naftali, na Shekemu ghuko isanga ja mighondinyi ja Efraimu, na Kiriath-araba (nigho Hebroni) isanga ja mighondinyi ja Juda.

⁸Na mashariki ya Jeriko, kimonu cha Jordani, wikasaghua Bezeri muzi ghuko wurindinyi kireti kufuma kwa kichuku cha Reubeni, na Ramothi, ghuko Gileadi kufuma kwa kichuku cha Gadi, na Golani ghuko Bashani kufuma kwa kichuku cha Manase.

⁹Ihi niyo mizi ekimbiria eresaghuloghe kwa wundu ghwa wandu wa Israeli wose, na kwa wundu ghwa waghenyi wiko aghadi kwawo; eri mndungi ubwaghagha mundu kwa ndengwa, upate andu kokimbiria; eri usechebwaghwa ni mundu olipia kisasi usekaie imbiri ya izungu ja wandu.