Read TAITA BIBLE – Biblia Ilagho Jiboie Kwa Wandu Wose JOSHUA 22 Bible Online

JOSHUA 22 - TAITA BIBLE – Biblia Ilagho Jiboie Kwa Wandu Wose bible

JOSHUA 22

¹Niko Joshua ukawiwanga wandu wa kichuku cha Reubeni, na cha Gadi, na cha nusu ya Manase iko mashariki,

²ukawizera, “Mwamerie kukatisha malagho ghose Musa mdumiki wa BWANA oremlaghirieghe; nenyo mwamerie kunisikira kwa ghose nerekoghe ngimlaghira.

³Andenyi ya agha matuku ghose hata idime, ndemorewisighieghe wanyinyu anduangi, ela moreghilindirieghe malaghiro gha BWANA Mlungu onyu.

⁴Na idana BWANA Mlungu onyu wamerie kuwineka wanyinyu kuhora na sere sa iji koni orewilaghirieghe; kwa huwo ghalenyi cha mzinyi konyu, kwa ijo isanga andu ifwa jenyu jiko; ijo Musa mdumiki wa BWANA oremnekieghe kimonu cha Jordani.

⁵Mlindie kuiwadia memu na sharia iro Musa mdumiki wa BWANA oremlaghirieghe; kumkunda BWANA Mlungu onyu, na kubonya lukundo lwake kwa kula chia; kuiwadia memu yake, kuwadana nao na kumdumikia kwa ngolo renyu rose, na kwa roho renyu rose.”

⁶Niko Joshua ukawirasimia, ukawisigha wighale cha mizinyi kwawo.

⁷Musa orekoghe wawineka nusu ya kichuku cha Manase isanga ja Bashani jikaie ifwa jawo, kimonu cha mashariki ya Jordani; ela nusu ya kichuku icho, Joshua orewinekieghe isanga ja magharibi ya Jordani jikaie ifwa jawo. Hata iji orekoghe ukiwirasimia

⁸ukawizera, “Mwawuyaghala muko na mali nyingi: ng'ombe na feza, dhahabu, shaba, chuma, na nguwo nyingi. Mmbaghie wanyinyu ivo vilambo vose muvipatire kufuma kwa wamaiza wenyu.”

⁹Niko Wareubeni, Wagadi, na iyo nusu ya kichuku cha Manase, wikafuma wikilaghana na wambao aho Shilo iko isanga ja Kanaani, kuighendia mizi yawo isanga ja Gileadi, ijo werejiwusireghe weni kwa momu ghwa Musa seji orelaghiriloghe ni BWANA.

¹⁰Nao iji werevikieghe Gelilothi, mbai na mbai ya moda ghwa Jordani, kulangaya isanga ja Kanaani, Wareubeni na Wagadi na nusu ya kichuku cha Manase, wikaagha aho madhabahu iko mbaa nandighi mbai na mbai ya Jordani.

¹¹Wandu wa Israeli wikaghorelwa, “Olenyi Wareubeni na Wagadi, na nusu ya kichuku cha Manase, waagha madhabahu mpakenyi andenyi ya isanga ja Kanaani mbai na mbai ya Jordani, najo ni isanga ja wandu wa Israeli.”

¹²Hata iji wandu wa Israeli wasikira agho, wikakwanyika aho Shilo kubonya mpango gholwa nawo.

¹³Niko wandu wa Israeli wikamduma Finehasi mwana wa mkohani Eleazari kwa Wareubeni, Wagadi, na nusu ya kichuku cha Manase wiko isanga ja Gileadi,

¹⁴wikamdumanya na vilongozi ikumi wifumie kwa vija vichuku va Waisraeli ikumi viko magharibi, umweri umweri kufuma kwa kula kichuku, kunughana na nyumba rawo.

¹⁵Wikacha Gileadi kwa Wareubeni, na Wagadi, na nusu ya kichuku cha Manase wiko isanga ja Gileadi, wikawizera,

¹⁶“Izungu jose ja Israeli jaghamba, ‘Ni ilaghoki iji jizamie huwu mwajibonya aighu ya Mlungu wa Israeli kwa kughaluka na mbai idime; mkakuaghia mmbeni madhabahu na kumlegha BWANA?

¹⁷Welee, kaung'a diibonyere aja Peori ndeikate? Daduagha disekueleshere diweni hata ngera izungu ja BWANA jerepatireghe ikabo kwa wundu ghwaro.

¹⁸Wele muachuria kumlegha BWANA? Mkamlegha BWANA idime, uchakaia na machu aighu ya izungu jose ja Israeli kesho.

¹⁹Idana ikakaia isanga jenyu jisefwanagha kwa wutasi, ruwukenyi cha isanga ja BWANA andu Hema ya BWANA iko, mpate isanga aghadi kodu; ela msemleghe BWANA, hata na isi wori, kwa kukuaghia inyo mmbeni madhabahu kuchumba iyo ya BWANA Mlungu odu.

²⁰Ririkanyenyi seji Akani wa kichuku cha Zera oreleghieghe kusikira aighu ya vilambo veretanyiroghe vinono; izungu jose ja Waisraeli jerekabiloghe kwa wundu ghwawo; na Akani nderefueghe uekeri kwa wundu ghwa kaung'a yake anduangi.’”

²¹Nao wandu wa kichuku cha Reubeni, na cha Gadi na cha nusu ya Manase wikawitumbulia ivo vilongozi va nyumba ra vichuku va Israeli,

²²“Uo-Uwadie-Ndighi ni Mlungu, uo nuo BWANA! Uo-Uwadie-Ndighi ni Mlungu, Uo nuo BWANA! Uo wamanya kwaki dibonyere huwo, nesi dakunda na Israeli cheni imanye! Ikakaia dighalukie dikasigha kumrumiria BWANA, msedisighe kukaia moyo sena!

²³Ikakaia dimsighie BWANA na kuagha madhabahu yedu kwa wundu ghokora vizongona, angu kufunya vizongona va viro, angu vizongona va mapatano, BWANA moni ndedikabe.

²⁴Ela siko kungi! Isi dedebonya huwo angu dereririkanyireghe kewada matuku ghichagha kivalwa chenyu chichazera kivalwa chedu, ‘Moko na ilaghoki aighu ya Mlungu wa Israeli?

²⁵Angu BWANA wamerie kubonya Jordani kukaia mpaka aghadi yenyu na isi. Na inyo Wareubeni na Wagadi ndemmbwadie ilagho jingi aighu ya BWANA’; kwa huwo wana wenyu wadima kuwibonya wana wedu wisighe kumtasa BWANA.

²⁶Niko diwonie diaghe madhabahu; si kwa wundu ghokora vizongona angu kufunya vizongona,

²⁷ela ikaie wushuhuda aghadi yenyu na isi na vivalwa vichagha, kukaia, dawuyabonya wudumiki ghwa BWANA imbiri kwake chiaimweri na vizongona vedu vekora, na vizongona, na vizongona va mapatano; eri wana wenyu wisechezera wana wedu ngelo richagha, ‘Inyo ndemmbwadie ifungu jingi kwa BWANA anduangi.’

²⁸Niko dereririkanyireghe ngelo richagha kukaia isi angu kivalwa chedu dikazerwa huwo dichatumbulia, ‘Wonenyi fwana ya madhabahu ya BWANA ereaghiloghe ni weke aba, nayo ndeerekoghe kwa wundu ghwa vizongona, ela edeeka kwa wundu ghwa wushuhuda aghadi yenyu na isi.’

²⁹Isi ndedidimagha kumlegha BWANA wei diwade mighendo mizima, na kuagha madhabahu kwa wundu ghwa vizongona vekora, vizongona va mapatano na vizongona, kula na madhabahu ya BWANA Mlungu odu iyo iko imbiri ya Hema ekwania.”

³⁰Nao iji mkohani Finehasi chiaimweri na vilongozi va wandu, awo wabaa wa vichuku va Israeli weresikireghe malagho gha Wareubeni, Wagadi na nusu ya Manase wikaboilwa.

³¹Na Finehasi mwana wa mkohani Eleazari ukawizera Wareubeni, Wagadi na nusu ya Manase, “Idime iji damanya angu BWANA oko chiaimweri nesi, kwa kukaia ndem'bonyere ugho wuwiwi aighu ya BWANA, nenyo mwawikira wandu wa Israeli wisekabo ni BWANA.”

³²Niko Finehasi mwana wa mkohani Eleazari chiaimweri na waja wabaa wikawisigha wandu wa Reubeni, na Wagadi andenyi ya isanga ja Gileadi wikaghenda cha Kanaani kwa wandu wa Israeli, wikawighoria agho malagho.

³³Malagho agho ghikawiboia Waisraeli nawo wikamkasa Mlungu, hata ndewereghorieghe malagho gha kulwa wuda na wambao na kunona isanga andu Wareubeni na Wagadi werekoghe wikikaia.

³⁴Wareubeni na Wagadi wikawanga agho madhabahu “Wushuhuda” angu wereghambieghe, ni wushuhuda aghadi kodu kukaia BWANA ni Mlungu.