Read TAITA BIBLE – Biblia Ilagho Jiboie Kwa Wandu Wose JOSHUA 3 Bible Online

JOSHUA 3 - TAITA BIBLE – Biblia Ilagho Jiboie Kwa Wandu Wose bible

JOSHUA 3

¹Nao kokesho kio, Joshua ukawuka kufuma Shitimu, chiaimweri na wandu wose wa Israeli, wikaghenda cha Jordani; wikakaia aho wikiwesera kuruwuka.

²Nyuma ya matuku adadu, vilongozi va wandu wikamara kambi yose

³wikawizera wandu, “Iji mwawona Sanduku ya Ilaghano ja BWANA Mlungu onyu ikidukwa ni wakohani na Walawi, mchawuka andu muko na kuinugha,

⁴mpate kuimanya ija chia mchaiidia, kwa kukaia jingi ndemuiidie iyo chia. Ela mkaie na kipimo chesighana na iyo Sanduku wukula ghwa kilometa imweri; mseisoghodere.”

⁵Joshua ukawizera wandu, “Mkueleshe inyo mmbeni; angu kesho BWANA uchabonya mashiniko aghadi konyu.”

⁶Joshua ukawizera wakohani, “Wadenyi Sanduku ya Ilaghano muide nayo imbiri ya wandu.” Wikaiduka Sanduku, wikaida nayo imbiri ya wandu.

⁷BWANA ukamzera Joshua, “Idime iji nichazoya kukujosa imbiri ya Waisraeli wose, wipate kumanya angu sa iji koni nerekaieghe andwamweri na Musa, huwo koni nichakaia andwamweri na oho.

⁸Na oho kuchawilaghira wakohani awo widukagha Sanduku ya Ilaghano, angu wikavika mbai na mbai ya moda ghwa Jordani, wimange kimusi.”

⁹Niko Joshua ukawizera wandu wa Israeli, “Choonyi aha msikire malagho ghwa BWANA Mlungu onyu.

¹⁰Mchamanya kukaia Mlungu oko aghadi konyu, na angu ndechaalemwa ni kuwifunya Wakanaani, Wahiti, Wahivi, Waperizi, Wagirgashi, Waamori, na Wajebusi kwa chia ihi:

¹¹Olenyi Sanduku ya Ilaghano ja BWANA wa wurumwengu ghose ichamkiria kungia Jordani.

¹²Kwa huwo msaghuo wandu ikumi na wawi, mundu umweri kufuma kwa kula kichuku cha Israeli.

¹³Ngelo awo wakohani wawuyaiduka Sanduku ya Ilaghano ja uo BWANA wa wurumwengu ghose wichaawadia machi gha Jordani, agho machi gha Jordani ghichatumbanyika ghisighe kusea, na agha gha naisi wori ghichatumbanyika kitungu.”

¹⁴Nao iji wandu werefumieghe hemenyi kwawo eri wipate kuruwuka Jordani, wakohani awo wereidukieghe Sanduku ya Ilaghano wikakiria imbiri kwawo.

¹⁵Awo wakohani wereidukieghe Sanduku wiendawadia machi gha Jordani, (na moda ghwa Jordani ghwadachua machi ghidike na kusalama ngelo yose ya makuwido),

¹⁶agho machi gherekoghe ghikisea kufuma nalughu, ghikatumbanyika kitungu kula koni, kufuma Adamu ghuja muzi ghuko nambai ya Zarethani; na agho gherekoghe ghikisea cha Bahari ya Chumbi ya Araba ghikaida, ndoe ikasighwa iomie kulangaya Jeriko; awo wandu wikaida.

¹⁷Hata iji wandu werekoghe wikiida, awo wakohani wereidukieghe Sanduku ya Ilaghano wikakaia kimusi andu kuomie ghadi na ghadi ya moda ghwa Jordani.