Read TAITA BIBLE – Biblia Ilagho Jiboie Kwa Wandu Wose JOSHUA 9 Bible Online

JOSHUA 9 - TAITA BIBLE – Biblia Ilagho Jiboie Kwa Wandu Wose bible

JOSHUA 9

¹Wazuri wose wikaiagha kimonu cha Jordani wiendasikira malagho gha wusimi ghwa Waisraeli, awo wose wikaiagha mighondinyi, na wurindi ghose ghwa pwani ya Bahari ya Mediterania kulangaya cha Lebanoni, awo Wahiti, Waamori, Wakanaani, Waperizi, Wahivi, na Wajebusi,

²wikakwana chiaimweri kwa ngolo imweri kulwa na Joshua na Israeli.

³Ela wandu wa Gibeoni, nawo ni Wahivi, iji weresikireghe seji Joshua orebonyereghe Jeriko na Ai,

⁴wikabonya mikalo emkalia Joshua. Wikaboisa vindo vimu na kuvikumbiria andenyi ya magunia ghirashukie wikadukishira weke punda na viriba va divei vikumbilo viraka.

⁵Wikarwa nguwo rirashukie-rashukie na vadu vikumbilo viraka; na mkate weredwaeghe ni ghuja ghuomie ghuwadilo ni mrasi.

⁶Wikamghendia Joshua chiaimweri na wandu wa Israeli aja kambinyi Gilgali wikamzera, “Daafuma isanga ja kula, deekunda dibonye mapatano nenyo.”

⁷Ela wandu wa Israeli wikawizera Wahivi, “Yadimika inyo ni wandu wa ahaeni kaavui, didima wada kubonya mapatano nenyo?”

⁸Nawo wikamzera Joshua, “Isi de wadumiki wako.” Joshua ukawizera, “Inyo mo weke ani? Mwafuma hao?”

⁹Nao wikamzera, “Wadumiki wako dafuma kula na ndighi, kwa kukaia dasikire maza ra BWANA Mlungu onyu, na agho ghose ubonyere Misri,

¹⁰na agho orewibonyere waja wazuri wawi wa Waamori, mashariki ya Jordani. Mzuri Sihoni wa Heshboni na mzuri Ogu wa Bashani uo orekoghe ukikaia Ashtarothi.

¹¹Vilongozi na wandu wose wikaiagha isangenyi mzedu, wikadizera diwade vindo vimu va charo dichekwana nenyo; dimzere angu isi de wadumiki wenyu, mpate kubonya mapatano nesi.

¹²Wonenyi mkate ghodu, ghodeeka ghwa modo ingelo derefumagha mzedu, ela idana ghwaoma na kuwadwa ni mrasi;

¹³ivi viriba va divei vedeeka viwishi dikizoya charo, ela idana vawuya va kala na kurashuka; na iri nguwo redu na vadu vedu veerashuka kwa wundu ghwa charo kilacha.”

¹⁴Niko wandu wa Israeli wikarumiria kwa wundu ghwa vindo vawo, ela ndewerelolieghe njama kwa BWANA anduangi.

¹⁵Joshua ukakaia na sere nawo, ukabonya ilaghano na awo wandu wa Gibeoni, ukawisigha wikaie moyo; vilongozi va Israeli wikabonya ighemi jekatisha ijo ilaghano.

¹⁶Nao nyuma ya matuku adadu, Waisraeli wikamanya angu awo wandu wedeeka ni wambao wa kaavui.

¹⁷Waisraeli wikazoya kuwighendia, hata nyuma ya matuku adadu, wikavikia mizi ya awo wandu; Gibeoni, Kefira, Beerothi na Kiriath-jearimu.

¹⁸Ela Waisraeli ndeweredimieghe kuwibwagha anduangi, kwa kukaia vilongozi vawo werekoghe wabonya ighemi kwa irina ja BWANA Mlungu wa Israeli. Wandu wose wikawizughunukia vilongozi;

¹⁹ela vilongozi wikatumbulia, “Damerie kubonya ighemi nawo kwa irina ja BWANA Mlungu wa Israeli, ndedidimagha kuwibonya ilagho jingi idana.

²⁰Suti diwisighe wikaie moyo kwa wundu ghwa iji ighemi disechekabwa ni Mlungu.”

²¹Vilongozi wikaghamba, “Wisighenyi wikaie moyo.” Niko awo wandu wikawuya wadumiki wedaia ijo izungu machi na kuwishoia mbande sa iji koni vilongozi wereghorieghe.

²²Joshua ukaduma momu awo Wagibeoni wiwango, ukawikotia, “Kwaki moredikaliagha wei mo wandu wa kula kila mo wandu wa aeni?

²³Kwa wundu ughu mwawasirwa njowe, na wamu wenyu wichawuya wazumba weshoa mbande na kudaya machi kwa wundu ghwa nyumba ya Mlungu wapo matuku ghawo ghose.”

²⁴Nawo wikamtumbulia Joshua, “Ni kwa kukaia isi wadumiki wako dasikire angu Mlungu onyu kwa loli oremlaghirieghe mdumiki wake Musa kukaia uchamneka isanga iji jose, na angu waisanga wose mchawitotesha; niko isi dikaobua na ndighi hata dikabonya iji ilagho kukira marangi ghedu.

²⁵Idana isi deko mikonunyi konyu, bonyenyi agho mmbonagha nicha kudibonyera.”

²⁶Niko Joshua ukawisigha ukawikira, hata wandu wa Israeli ndewerewibwaghieghe anduangi.

²⁷Ela ituku jija, Joshua ukawibonya wazumba weshoa mbande na kudaya machi kwa wundu ghwa izungu ja wandu na madhabahu ya BWANA; nawo wadabonya huwo hata idime andenyi ya kula andu kuwikilo kotasa.