Read TAITA BIBLE – Biblia Ilagho Jiboie Kwa Wandu Wose 1 TIMOTHEO 3 Bible Online

1 TIMOTHEO 3 - TAITA BIBLE – Biblia Ilagho Jiboie Kwa Wandu Wose bible

1 TIMOTHEO 3

¹Ilagho iji ni ja loli; ngera mndungi wakunda kazi ya wuzighaniri ghwa ikanisa, wakunda kazi ndicha.

²Idana mzighaniri wa ikanisa ni suti ukaie usewadie ikosa jingi; ukaie mndwawomi wa muka umweri, udimagha kukumazira, uko na akili nicha, mundu wa ishima, ukaribishagha wandu, uichi kufundisha,

³useko mmbongeri, useko mundu wa wuda, ela mmboa; usekaie orasha wandu, hata ulakie na pesa.

⁴Suti ukaie mundu uibonyeragha nguma nyumba yake nicha, mundu uwibonyagha wana wake wimsikire, na kukaia na ishima kwa kula chia.

⁵Ikakaia mundu usedimagha kuibonyera nguma nyumba yake cheni, udima wada kujilindia ikanisa ja Mlungu?

⁶Usekaie mundu ughalukie kafwani, usechekalikia na kukujosa, nao uchetanywa sa Ibilisi.

⁷Aighu ya agho, wafwana ukaie mundu uko na sare iboie aghadi ya wandu wiserumirie; eri usechemenywa na kughwa mdeghonyi ghwa Ibilisi.

⁸Watesia wa ikanisa wokoni, suti wikaie waloli wiseko weghaluka-ghaluka; wisenywagha divei nyingi, hata kukaia na iriso ja fwaida iseboie.

⁹Suti wikaie wandu wimaziragha ija ngasu ya irumirio kwa nia ielie.

¹⁰Na awo wori ndewitimo kande; niko iji wawoneka kukaia wandu wisewadie ikosa jingi, widumike sa watesia wa ikanisa.

¹¹Waka wori suti wikaie wa loli, wisekaie wezighiria, ela wikaie wikumaziragha weni, wiko waloli kwa maza rose.

¹²Watesia wa ikanisa wikaie womi wa muka umweri-umweri, wikaie wandu wiwibonyeragha wana wawo nguma nicha, na nyumba rawo.

¹³Angu awo watesia wa ikanisa widumikagha nicha, wakupatira weni ishima, na ngolo mbaa ya irumirio, jiko andenyi ya Kristo Jesu.

¹⁴Nasuwiria kucha kwako kafwani; ela naakuandikia agha malaghiro eri

¹⁵iji nacheleshwa, kukaie kumanyire seji imfwanagha mundu kukaia andenyi ya nyumba ya Mlungu, najo ni ijo ikanisa ja Mlungu uko moyo, iyo nguro na msingi ghwa iyo loli.

¹⁶Ni wushuhuda ghusedimagha kukanwa kukaia, iyo ngasu ya dini yedu ni mbaa na ndighi: Orewonekieghe worinyi kwa mumbi, ukarumirilwa kukaia na hachi ni Roho; Ukawonwa ni weke malaika, ukachilwa aghadi ya wandu wa iro mbari; ukarumirilwa wurumwengunyi, ukadwalwa aighu mlungunyi kwa wubaa.