Read TAITA BIBLE – Biblia Ilagho Jiboie Kwa Wandu Wose FILEMONI 1 Bible Online

FILEMONI 1 - TAITA BIBLE – Biblia Ilagho Jiboie Kwa Wandu Wose bible

FILEMONI 1

¹Ini Paulo, mfungwa kwa wundu ghwa Kristo Jesu, na mwanidu Timotheo, nakuandikia oho Filemoni mngara odu kwa kazi, dikukunde;

²na mwanidu wa waka Afia, na Arikipo asikari mngara odu, chiaimweri na ikanisa jiko nyumbenyi kwako.

³Mvono ndeghukaie konyu na sere ifumagha kwa Mlungu Aba na Bwana odu Jesu Kristo.

⁴Kula ngelo iji nakalomba, nadakukumbuka ngimfunyira Mlungu wapo chawucha;

⁵kwa kukaia nawuyasikira malagho gha irumirio kuko najo kwa Bwana Jesu, na lukundo kuko nalo kwa waeli.

⁶Nani naawuyalomba angu wungara diko nagho aighu ya irumirio jako, ghurede kumanya agho mecha ghedu diko nagho andenyi ya Kristo.

⁷Neko na kuboilwa kubaa na kukumbwa ngolo ni lukundo lwako mwanidu, kwa kukaia kwawuyawihoresha waeli ngolo.

⁸Kwa wundu ugho, hata ngera neko na wuwana andenyi ya Kristo ghokulaghira kubonye seji ikundikie,

⁹elaima kwa wundu ghwa lukundo, nawona nibonye ilombi kwako. Ini Paulo, mdumwa wa Kristo Jesu, na idana ne mfungwa kwa wundu ghwake,

¹⁰nabonya ilombi kwako kwa wundu ghwa mwanwapo Onesimo, uo nimvae kiroho niko kifungonyi.

¹¹(Uo imbiri orekoghe usene fwaida ingi kwako, ela idana oko na fwaida kwako na kwapo wori).

¹²Naawuyammbunja kwako, nao moni ni ngolo yapo cheni.

¹³Naboilwagha ngera nadakanya nao, upate kunidumikia wulalo ghwako ingelo niko kifungonyi kwa wundu ghwa Ilagho Jiboie.

¹⁴Ela neewona nisebonye ilagho jingi kuserumirie; isechekaia wucha ghwako kwaaghubonya kwa suti, ela ikaie ni kwa kukunda kwako kumoni.

¹⁵Kewada ihi niyo shekeria moretaneghe na Onesimo kwa ngelo, eri kuchekanya nao toe.

¹⁶Si sa mzumba sena anduangi, ela waboie kuchumba mzumba; uo ni mwanidu mkundwa, hasa kwapo, ela kwako ni kuchumba; kwa mumbi na kwa Bwana wori.

¹⁷Kwa wundu ugho, ikakaia kuwonagha ne mngara wako, kummbuse sa ini moni.

¹⁸Ikakaia ukukosere kwa ilagho jingi, angu kukaia na sile ingi yako, kunilawie.

¹⁹Ini Paulo, naandika malagho agha kwa mkonu ghwapo nimoni; nichalipa. Da ima niakughoria? Nechi kwaichi putu kukaia nakulawiagha hata nafsi yako wori.

²⁰Nga mwanidu nechi nani moni nakunde fwaida imu kwako andenyi ya Bwana. Nihoreshe ngolo yapo andenyi ya Kristo.

²¹Nakuandikia niko na wuloli angu kuchanisikira; ngimanya angu kuchabonya mengi kuchumba agho naghora.

²²Chiaimweri na agho, kuniboisire chumba cha waghenyi, angu nawuyasuwiria kwa chia ya malombi ghenyu, mchanipata.

²³Epafra, mfungwa andwamweri nani kwa wundu ghwa Kristo Jesu, wakuroghua.

²⁴Na wokoni Marko, Aristariko, Dema, na Luka, wangara wapo wa kazi, wakuroghua.

²⁵Mvono ghwa Bwana Jesu Kristo ndeghukaie na roho yako.