Read TAITA BIBLE – Biblia Ilagho Jiboie Kwa Wandu Wose WAEBRANIA 13 Bible Online

WAEBRANIA 13 - TAITA BIBLE – Biblia Ilagho Jiboie Kwa Wandu Wose bible

WAEBRANIA 13

¹Uko kukundana kwa wanidu ndekuduo.

²Msakesigha kuwikaribisha waghenyi; angu kwa chia iyo, wandu wamu werewikaribishireghe weke malaika wisewimanyire.

³Wikumbukenyi awo wiko kifungonyi, seji moofungwa andwamweri nawo, na awo wikorongwagha, seji mwaawuyakorongwa andwamweri nawo; kwa kukaia inyo wori moko na mumbi.

⁴Ndoa ineko ishima ni wandu wose, na awo wilowuane wikaie waloli kula mundu na mmbao; angu Mlungu uchawitanya walaki, na awo wiselagha na waka wa wandu.

⁵Msakekaia na irangi jelaka na pesa, ela mkato ni ivo veni muko navo; angu Mlungu waghambie, “Na jingi sichaakusowia, hata kukusigha anduangi.”

⁶Niko dadima kughamba kwa wuwana, “Bwana nuo mtesia wapo, sichaaobua anduangi; mdamu wadima kunibonya wada?”

⁷Wikumbukenyi vilongozi venyu, ivo veremghorieghe Ilagho ja Mlungu; ririkanyenyi mighendo na uko kutua kwawo, nenyo msunge irumirio jawo.

⁸Jesu Kristo nuo moni ighuo, na idime, na hata kwa kala na kala.

⁹Msakelaghashwa ni mafundisho mazima mazima gha kighenyi; angu ni nicha iyo ngolo imangisho kwa mvono ghwa Mlungu, hata si kwa vindo anduangi; ivo visemnekagha fwaida ingi uo mundu unughanagha navo.

¹⁰Deko na madhabahu, awo widumikagha hemenyi wiseko na hachi eja nyama raro.

¹¹Angu gharia ra iro nyamandu bagha yaro iredwagha Andu kwa Wueli ni Mkohani M'baa, kukaia kizongona kwa wundu ghwa kaung'a, radakorwa shighadi ya kambi.

¹²Huwo koni Jesu oretiriroghe mbengenyi cha shighadi, upate kuwielesha wandu kwa chia ya bagha yake moni.

¹³Kwa huwo, ndedimghendie uo cha shighadi ya kambi, dikidwa masholio agho oreghirumaghieghe.

¹⁴Angu aha ndediwadie muzi ghungi ghuduagha anduangi, ela daawuyaghulola ugho ghuchagha.

¹⁵Idana ndedimfunyire Mlungu kizongona cha makaso tulituli kwa chia ya Jesu, nacho ni madedo gha memu ujishuhudiagha irina jake.

¹⁶Msakesigha kubonya nicha, na kuwaghiana icho muko nacho; angu vizongona sa ivo vam'boia Mlungu.

¹⁷Muvisikire vilongozi venyu na kukuwika aisi kwawo, angu vaawuyacheresha kwa wundu ghwa roho renyu, kwa kukaia wichafunya mtalo ghwa wudumiki ghwawo. Bonyenyi huwo wipate kudumika kwa kuboilwa isakekaia kwa wasi; angu wikabonya kwa wasi, ndempatagha fwaida ingi anduangi.

¹⁸Mudilombie, angu isi deko na loli kukaia nia redu raelie, nesi dakunde kubonya maza rose kwa ishima.

¹⁹Namshashira mchurie kulomba kwa kufunga ndighi, eri nipate kuwunjwa konyu kwa shwa-shwa.

²⁰Idana uo Mlungu wa sere, nao nuo oremrukishireghe Bwana odu Jesu kufuma kwa wafu, uo uko Mlisha M'baa wa ng'ondi, kwa bagha ya ilaghano ja kala na kala,

²¹ndemkatishe kwa vilambo vose vicha, mpate kubonya lukundo lwake; ukibonya andenyi konyu icho chim'boiagha uo, kwa chia ya Jesu Kristo; kwake uo, ndeghukaie wubaa kwa kala na kala. Amen.

²²Namlomba wanidu mrumaghie mafundisho ghapo, angu naamwandikia kwa wuvui.

²³Yafwaneghe mmanye kukaia mwanidu Timotheo wafungulo; nao dichanya kummbona iji wacha shwa-shwa.

²⁴Muwiroghuo vilongozi venyu, na awo waeli wose. Awanidu wifumie Italia wamroghua.

²⁵Mvono ngeghukaie nenyo mmbose. Amen.