Read TAITA BIBLE – Biblia Ilagho Jiboie Kwa Wandu Wose WAEBRANIA 4 Bible Online

WAEBRANIA 4 - TAITA BIBLE – Biblia Ilagho Jiboie Kwa Wandu Wose bible

WAEBRANIA 4

¹Kwa huwo, angu hoku ilaghiro ja kungia kuhorenyi jiduagha, ndediobuo; isechekaia mndungi onyu kuwoneka walemwa ni kungia.

²Angu Ilagho Jiboie jereredeloghe kodu, sa iji koni jereghenjeroghe kwawo; ela agho malagho wereghisikireghe wikaghisowia fwaida, kwa kukaia ndewereghiwusireghe kwa irumirio anduangi.

³Angu isi dimerie kurumiria, dangia uko kuhora, seji Mlungu ughambie, “Nani ngajokwa ni machu ngaghema, ‘Na jingi ndewichaangia kuhorenyi kwapo anduangi.’” Mlungu oreghorieghe huwo, hata ngera kazi rake reumba wurumwengu rerekoghe rasia.

⁴Angu andu kumu waghorie malagho gha ituku ja mfungade huwu, “Na Mlungu ukahora ituku ja mfungade, na kurisigha kazi rake rose.”

⁵Aeni aho sena waghambie huwu, “Najingi ndewichaangia kuhorenyi kwapo anduangi.”

⁶Idana kwa kukaia weko wamu wichaangia, na waja werezoeghe kuwusa ijo Ilagho Jiboie walemelo ni kungia angu wileghie kusikira,

⁷wawika sena ituku jimu ukighamba “Idime,” ukighora kwa kumtumia Daudi kojingi, kwa agho malagho gheni ghimerie kughora huwu, “Idime ngera mwalusikira lwaka lwake, msakekurisha ngolo renyu kwa kumlegha Mlungu.”

⁸Angu ngera Joshua orewinekieghe kuhora, kumangu Mlungu ndereghoragha malagho gha ituku izima kungi.

⁹Kwa wundu ugho, eko Sabato ehora isigharikie kwa wundu ghwa wandu wa Mlungu.

¹⁰Angu mundu uo ose ungiagha kuhorenyi kwa Mlungu, orehorieghe kufuma kwa kazi rake; seji koni Mlungu orehorieghe kufuma kwa kazi rake.

¹¹Idana isi ndedifunge ndighi kukungia kuja kuhora, eri mndungi usecheghushwa ni kuja kulegha kusikira.

¹²Angu ilagho ja Mlungu jeko moyo, sena jawadie ndighi, sena jakalie kuchumba lufu lukalie chia rose; najo jadunga na kuvikia irangi na roho, hata kuvikia mawungo na wusuchi; jikitambua maghesho na maririkanyo gha ngolo.

¹³Hata imbiri ya Mlungu, ndekuwadie iumbo jingi jivisikie; ela vilambo vose veko worinyi, viwikilo na kufunukulwa imbiri ya meso ghake, uo dichaafunya mitalo edu kwake.

¹⁴Idana kwa kukaia deko na Mkohani M'baa, uo orengirieghe mlungunyi, Jesu, Mwana wa Mlungu, ndedimazire kuja kurumiria kodu.

¹⁵Angu uo Mkohani M'baa diko nao, ndedimagha kulemwa ni kuwadwa ni wughoma kwa wundu ghwa wunyonge ghodu anduangi; ela uo oretimiloghe kwa kula chia seji koni dawuyatimwa, ela nderebonyereghe kaung'a anduangi.

¹⁶Kwa huwo ndedisoghode kaavui na kifumbi cha wughoma kwa wuwana, eri dipate kufuilwa wughoma, na kupata mvono ghoditesia ngelo ghukundikagha.