Read TAITA BIBLE – Biblia Ilagho Jiboie Kwa Wandu Wose WAEBRANIA 8 Bible Online

WAEBRANIA 8 - TAITA BIBLE – Biblia Ilagho Jiboie Kwa Wandu Wose bible

WAEBRANIA 8

¹Idana ilagho jeni kwa agho dawuyaghora ni iji: deko na Mkohani M'baa ufwane huwo; uo uko kidombo chia ya mkonu ghwa kiwomi ghwa kifumbi cha nguma cha Wubaa mlungunyi,

²nao ni mdumiki wa Andu kwa Wueli, na wa iyo hema ya loli, isebonyero ni mdamu ela ni Bwana.

³Kula Mkohani M'baa wadawikwa kwa kazi efunya manosi na vizongona, nao moni wori, suti ukaie na kindo chimu chefunya.

⁴Idana ngera odeeka ndoenyi ndakaiagha mkohani kungi, kwa kukaia weko wakohani wawuyafunya manosi karakara na Sharia.

⁵Awo waawuyabonya kazi iko fwana na kirerendi cha kazi ya Andu kwa Wueli kwa mlungunyi; angu iji Musa orekoghe kaavui na kuiwusira iyo hema, orefundishiroghe ni Mlungu ukizerwa, “Manya kubonye kula kindo karakara na mfwano ghuja ghoni korewonyeroghe aighu ya mghondi.”

⁶Ela sa iji iko, Kristo wapatire wudumiki ghuboie kuchumba ugho ghwa kala, seji koni ijo ilaghano wawuyajidumikia jiko jiboie kuchumba; kwa kukaia jibonyero kwa malaghiro mecha kuchumba.

⁷Angu ngera ijo ilaghano ja imbiri jedeeka jisewadie ikosa jingi, ijo ja kawi ndejerewuyaakundika.

⁸Kwa kukaia Mlungu wawiwona wandu na makosa iji waghamba, “Matuku ghichacha, waghamba Bwana, ngelo nichaabonya ilaghano iwishi na nyumba ya Israeli na nyumba ya Juda.

⁹Ndejiko sa jija ilaghano nerejibonyereghe na weke ndee; iji nerewiwadieghe mkonu na kuwighenja, ngiwifunya isanga ja Misri; angu ndeweredueghe kwa ilaghano japo, na kwa wundu ugho, secheewuyawitala anduangi waghamba Bwana.

¹⁰Iji nijo ilaghano nichaajibonya na nyumba ya Israeli nyuma ya matuku agho, waghamba Bwana; Nichangira sharia rapo akilinyi kwawo, na kuriandika ngolonyi kwawo, nani nichakaia Mlungu wawo, nawo wichakaia wandu wapo.

¹¹Hata ndewichaafundishana kula mundu na mmbao, angu kula mundu na mruna, wikighamba ‘Mmanye Bwana’ angu wose wichanimanya, kufuma mtini, hata m'baa wawo.

¹²Angu nichawifuya wughoma makosa ghawo, na kaung'a rawo sichaarikumbuka sena anduangi.”

¹³Kwa kughora malagho gha ilaghano iwishi, waawuyabonya jija ja imbiri jiwuye ja kala; na icho chawuya-wuya cha kala na kughosia, chaalighisa kusia.