Read TAITA BIBLE – Biblia Ilagho Jiboie Kwa Wandu Wose WAEBRANIA 9 Bible Online

WAEBRANIA 9 - TAITA BIBLE – Biblia Ilagho Jiboie Kwa Wandu Wose bible

WAEBRANIA 9

¹Idana hata ijo ilaghano ja imbiri jerekoghe na chia ra wutasi na andu kwa wueli kotasira kwa ndoenyi.

²Angu hema ereboisiroghe, iyo ya cha shighadi; na andenyi kwaro korekoghe na kilambo chewikiria taa, meza, na Mikate ifunyiro kwa Mlungu; nako kwadawangwa Andu kwa Wueli.

³Nanyuma ya pazia ya kawi, korekoghe na hema iwangwagha Andu kwa Wueli Kuchumbie.

⁴Andenyi kwaro, korekoghe na madhabahu ya dhahabu efukiria marumba, na Sanduku ya Ilaghano ishingilo dhahabu chia rose. Iyo Sanduku erekoghe na mkebe ghwa dhahabu ghowika ija mana, mzata ghwa Haruni ugho ghorejosereghe malemba, na vishawalata va magho viandikilo ija memu ikumi;

⁵na aighu ya iyo Sanduku korekoghe na makerubi gha wubaa ghichifinikiragha kiju icho kifumbi cha wughoma. Maza iri idana disedimagha kurighora imu imu.

⁶Nyuma ya kuviboisa ivo vilambo huwo, wakohani werekoghe wikingia iyo hema ya shighadi, wikibonya kazi rawo ra wutasi tulituli;

⁷na iyo hema ya kawi, yadangilwa ni Mkohani M'baa uekeri mwaka indo jimweri, nao ndeoredimagha kungia usedwae bagha; uifunye kwa wundu ghwake moni, na kwa wundu ghwa makosa gha wandu.

⁸Kwa maza iri, Roho Mweli wawonyera kukaia chia engia Andu kwa Wueli Kuchumbie, yaduagha iserughulo iji iyo hema ya shighadi iduagha kimusi;

⁹(nagho ni mfwano ghuwonyeragha seji iko matuku agha). Kunughana na maboiso agho, manosi na vizongona vafunywa ivo visedimagha kukatisha nia ya uja mundu utasagha,

¹⁰ela gheeka kwa wundu ghwa vindo, kunywa, na kuogha; naro ni sharia ra mumbi riwikilo hata ivike ngelo ebonya maghaluso.

¹¹Ela Kristo uendacha, uo sa Mkohani M'baa wa maza ndicha richee, kwa chia ya ija hema mbaa ikatie kuchumba (isebonyero kwa mikonu, kutambua kwaro iseko ya kuumbwa uku),

¹²orengirieghe andenyi ya Andu kwa Wueli indo jimweri tua ukidwa bagha; si ya mburi na ngache anduangi, ela bagha yake moni. Kwa chia iyo ukaghupata ghuja wukomboli ghwa kala na kala.

¹³Angu, ikakaia kunughana na mizango ya dini, mundu ukalua nao umichiro bagha ya mburi na njau chiaimweri na maivu gha ngache, wadatalwa kukaia waombochoka;

¹⁴ni kuchumba saki bagha ya Kristo, uo kwa chia ya Roho wa kala na kala, orekufunyireghe moni kwa Mlungu kuseko na iboli jingi, ichamuelesha nia renyu mfume kwa kazi rifue, mpate kumdumikia Mlungu uko moyo.

¹⁵Kwa huwo, Jesu nuo mpatanishi wa ijo ilaghano iwishi; eri awo wiwangilo, wipate kujiwusa ijo ifwa ja kala na kala jilaghirilo; kwa kukaia kifwa chapatikie, icho chiwikombuagha wandu kufuma makosenyi ghaja gherebonyeroghe ngelo ya ilaghano ja imbiri.

¹⁶Angu andu malaghiro gha ifwa ghiko, suti kifwa chake uo oreghilaghirieghe chimanyike.

¹⁷Na malaghiro gha ifwa ndeghiwadie ndighi ingelo mundu waro uko moyo, ela gheeka nandighi ngelo wafwa.

¹⁸Huwo koni hata ijo ilaghano ja imbiri ndejeredimieghe kumangishwa kuseko na bagha.

¹⁹Angu iji Musa wawighoria wandu kula momu ghwa Sharia, orewadieghe bagha ya ngache na mburi, chiaimweri na machi na sufu itinikie na isawi ja hisopu, ukachimichira icho chuo cha Sharia chiaimweri na awo wandu ukighamba,

²⁰“Ihi niyo bagha ya ilaghano, ijo Mlungu oremlaghirieghe.”

²¹Na kwa chia iyo cheni ukaimichira bagha iyo hema chiaimweri na ivo vilambo vose verekoghe vikitumilwa kwa wutasi.

²²Na loli kwa Sharia, kaavui kula kilambo chadaeleshwa kwa bagha; na kuseko na kudika bagha, ndekuwadie kufuilwa wughoma kungi kwa kaung'a anduangi.

²³Huwo niko erekoghe suti, ivo vilambo viko fwana ya vilambo va mlungunyi, vielesho kwa iyo mizango ya dini. Ela va mlungunyi ivo, vaeleshwa kwa kizongona kicha kuchumba.

²⁴Angu Kristo nderengirieghe Andu kwa Wueli kubonyero ni mikonu, kuko fwana ya uko kwa loli anduangi, ela orengirieghe mlungunyi koni; upate kuwoneka imbiri ya Mlungu kwa wundu ghodu.

²⁵Hata ndeorekoghe ukufunye moni kalazi, seji Mkohani M'baa ungiagha Andu kwa Wueli kula Mwaka, ukidwa bagha iseko yake;

²⁶angu aho yadakaia utiriro kalazi kufuma wurumwengu ghwazoya. Ela seji iko, wamerie kuwoneka indo jimweri tua ngelo ra kutua, upate kuriinja kaung'a kwa kukufunya kizongona moni.

²⁷Na seji koni iwikilo kwa wandu kufwa indo jimweri, na nyuma yaro kutanywa,

²⁸huwo koni Kristo, umeria kufunywa indo jimweri uriduke kaung'a ra wengi, uchawoneka indo ja kawi; si kwa wundu ghwa kulwa na kaung'a, ela upate kuwikira awo wose wawuyammbesera kwa kufunga ndighi.