Read TAITA BIBLE – Biblia Ilagho Jiboie Kwa Wandu Wose JAKOBO 2 Bible Online

JAKOBO 2 - TAITA BIBLE – Biblia Ilagho Jiboie Kwa Wandu Wose bible

JAKOBO 2

¹Wanidu, inyo muko warumirii wa Bwana Jesu Kristo, uo Bwana wa wubaa, msekaie wesaghua-saghua wandu.

²Yadimika mndumu ungie ikwanyikonyi jenyu urwae pete ra dhahabu na nguwo ra zoghori mbaa, na mndumu ungie uko mkiwa urwae nguwo ra marasi.

³Ngera mwamneka ishima uja mundu urwae nicha, nao mumzere, “Seria aha tafadhali;” na uja mkiwa mumzere, “Kaia kimusi aja;” angu “Seria andonyi aha maghunyi kwapo.”

⁴Welee, huwo ndamwabonya wuchumbano aghadi konyu na kukaia watanyi wiwadie maghesho mawiwi anguwada?

⁵Sikirienyi wanidu nimkunde: Welee, Mlungu nderewisaghueghe awo wiko wakiwa wa wurumwengu wipate kukaia Wazuri wa irumirio, na wandu wepata ifwa ja Wuzuri, ugho Mlungu uwilaghirie awo wimkundagha anguwada?

⁶Ela inyo mwamsowia ishima uo mkiwa. Welee, awandu weni wiko na mali siwo weni wawuyamkoronga, wikimmbwada na kumghenja kotinyi?

⁷Siwo weni wawuyajisholia ijo irina ja ishima morenekeloghe anguwada?

⁸Kamanya loli inyo mwawuyaikatisha ija sharia ya kiwuzuri, kunughana na Maandiko Ghielie, “Kumkunde mmbenyu seji koni kukukunde kumoni,” ni nicha.

⁹Ela mkasaghuana, mwabonya kaung'a; nenyo mwatanywa ni Sharia kukaia wakosi.

¹⁰Angu mundu uo ose uiwadiagha Sharia yose nao ulemo ni imu, uchakaia mkosi wa iyo Sharia yose.

¹¹Kwa kukaia uo oreghorieghe “Kusakelaka,” nuo moni oreghorieghe “Kusakebwagha.” Ngera kwakaia kuselakie, nao kubwaghe, kwawuya mkosi wa Sharia.

¹²Kwa wundu ugho, dedenyi na kubonya sa wandu mchaatanywa ni Sharia ya wuhuru.

¹³Angu kutanya ndekuwadie wughoma, kwa uo usene wughoma; ela sena, wughoma ghwasima kutanya.

¹⁴Wele wanidu, ni fwaidaki mundu kughora wei oko na irumirio, mabonyo ghiseko? Ijo irumirio jake jadima kumkira?

¹⁵Ngera mwanidu wa womi angu wa waka wafue zuna, na vindo ndewadie,

¹⁶na umu onyu uwizere, “Mwende mana, muode modo mghude,” nao ndewinekie ivo vindo viwifwanagha kwa wundu ghwa mumbi, ni fwaidaki?

¹⁷Kwa wundu ugho irumirio jiekeri jisewadie mabonyo jafue.

¹⁸Ela mndumu wadima kughamba, “Oho kwawadie irumirio, nani moni neko na mabonyo.” Niwonyere irumirio jako kuseko na mabonyo, nani nikuwonyere irumirio japo kwa mabonyo ghapo.

¹⁹Oho kwarumiria angu Mlungu ni umweri, kwabonya nicha. Hata pepo rarumiria, na kusughusika.

²⁰Welee, kwakunde kuwonyero oho mundu wa maghesho mavui seji irumirio jisene mabonyo jisevagha?

²¹Welee, Aba odu Abrahamu ndedetalwa kukaia na hachi kwa mabonyo, iji oremfunyireghe mwana wake Isaaka kizongona aighu ya madhabahu?

²²Idana kwawona angu irumirio jerebonyereghe kazi andwamweri na mabonyo ghake, na irumirio jerekatishiroghe ni kazi;

²³na maandiko ghikakatia agho ghighambagha, “Abrahamu oremrumirieghe Mlungu, na kwake ikatalwa kukaia hachi;” nao ukawangwa mghenyi wa Mlungu.

²⁴Mwawona kukaia mundu wadatalwa kukaia na hachi kwa mabonyo, hata si kwa irumirio jeni jiekeri anduangi.

²⁵Na Rahabu wori jija ilaya, ndedetalwa kukaia na hachi kwa mabonyo wokoni iji orewikaribishireghe waja wadumwa, na kuwifunya shighadi kwa chia zima angu wada?

²⁶Angu sa iji koni mumbi ghusewadie roho ghwafue, ni huwo koni na irumirio jisene mabonyo, jeeka jifue.