Read TAITA BIBLE – Biblia Ilagho Jiboie Kwa Wandu Wose JAKOBO 3 Bible Online

JAKOBO 3 - TAITA BIBLE – Biblia Ilagho Jiboie Kwa Wandu Wose bible

JAKOBO 3

¹Wanidu, wengi wenyu msekaie walimu, angu mwamanya kukaia isi dawuyafundisha, dichatanywa nandighi kuchumba.

²Isi diwose dabonyagha makosa mengi; na ikakaia oko mndungi usedimagha kubonya makosa kwa agho ughoragha, uo ni mundu ukatie; udimagha kughumazira mumbi ghose wori.

³Iji dangira mikowa ya farasi memunyi kwawo, eri ripate kudisikira, dadaghalua mimbi yawo yose.

⁴Zighanenyi meli wori, hata ngera reko mbaa, naro raghenjwa ni mbeo mbaa, ela radaghalulwa ni sukano ndini na ndighi, andu kose uja kilongozi ukundagha.

⁵Huwo koni lumi ni kia kitini, ela lwakukasa kwa maza nyingi. Wona seji msidu m'baa ghudimagha kukorwa ni modo mtini!

⁶Na lumi ni modo. Ni wurumwengu ghwa mawiwi ghuko aghadi ya via vedu; lwadaghulusha mumbi ghose, na kushekeria kuumbwa kose kuake modo kwa ndighi ya modo ghwa jehanamu.

⁷Angu yadimika kufugha kula nyamandu, na nyonyi, na nyamandu riavuagha, na iro ra baharinyi; naro rafughilo ni wadamu.

⁸Ela, ndekuwadie mndungi udimagha kulufugha lumi. Lwachue wuwiwi ghusewadie kuhora, na sumu ibwaghagha.

⁹Kwa ulo lumi, damkasa uja Bwana na Aba, na kwa ulo loni, dawasira wandu njowe, wiumbilo kwa fwana ya Mlungu.

¹⁰Kwa ugho momu ghoni, ghafuma makaso na njowe. Wanidu, maza iri nderifwane rikaie huwo anduangi.

¹¹Welee, ndoria yafunyagha machi ghihorie na machi ghiwawie?

¹²Idimika mtini kuva zeituni wanidu, angu mzabibu kuva tini? Wokoni ndeidimikagha machi gha munyu kufunya machi ghihorie anduangi.

¹³Nani uko na hikima na suku aghadi konyu? Ndewonyere kwa irangi jake icha, iro kazi rake kwa wumboa ghwa hikima.

¹⁴Ela ikakaia ngolo renyu reechua iriso ibaa, na kukukunda mmbeni, msakekukasa mkighora tee aighu ya ija loli.

¹⁵Hikima iyo siyo ingi ifumagha mlungunyi, ela ni ya ndoenyi, iseko ya kiroho, nayo ni ya Ibilisi.

¹⁶Angu andu iriso jiko, na kukukunda, koko kusowa masikirano na kula ibonyo jizamie.

¹⁷Ela hikima ifumagha mlungunyi, imbiri yaelie, sena ni ya sere, na ya wumboa; iseng'etere, ichue wughoma, na matunda mecha, ndeiwadie ngera, hata kusowa wuloli.

¹⁸Na mavalo gha hachi, ni mbeu iwalwagha andenyi ya sere ni awo wibonyagha sere.