Read TAITA BIBLE – Biblia Ilagho Jiboie Kwa Wandu Wose JAKOBO 4 Bible Online

JAKOBO 4 - TAITA BIBLE – Biblia Ilagho Jiboie Kwa Wandu Wose bible

JAKOBO 4

¹Niki chawuyareda wuda na kulwa aghadi konyu? Si iyo mirudo ya bea renyu ibonyagha wuda vienyi konyu?

²Mwabonya bea, ela ndemuwiepata kindo chingi; kwa wundu ugho mwabwagha. Mwabonya iriso, ela ndempatagha; kwa wundu ugho, mwalwa na kubonya wuda. Ndemuvine kwa kukaia ndemlombagha.

³Mwalomba ela ndempatagha, angu mwaawuyalomba kisha, mpate kuvitumia kwa bea renyu.

⁴Inyo walaki! Wele ndemmanyire kubonya wughenyi na wurumwengu ni wumaiza kwa Mlungu? Kwa huwu uhu ukundagha kukaia mghenyi wa wurumwengu wakubonya moni kukaia m'maiza wa Mlungu.

⁵Angu muaghesha wei Maandiko Ghielie ghiaghora duu agho ghighambagha, “Waabonya iriso kwa wundu ghwa uo Roho um'bonyere kukaia andenyi kodu.”

⁶Ela wanekagha mvono ghuchumbie, kwa huwu Maandiko ghaghamba, “Mlungu wawitangala wang'eti, ela wawineka mvono awo wikuseragha.”

⁷Kwa huwu, mkusere mmbeni aisi ya Mlungu. Mtangalenyi Ibilisi, nao uchamkimbia.

⁸Msoghoderenyi Mlungu, nao uchamsoghodera inyo. Ioghoshenyi mikonu yenyu inyo wakaung'a, na kurielesha ngolo renyu inyo wandu wa nia iwi.

⁹Mkuwone moko wasinyi mlile na kukema mchungu. Seko renyu righaluso kukema mchungu, na kuboilwa konyu kuwue kuwawa.

¹⁰Mkusere mmbeni imbiri ya Bwana nao uchamjosa inyo.

¹¹Msakedediana kiwiwi mmbeni na mmbeni wanidu. Uo umzughunukiagha mruna angu kumtanya waaghora kiwiwi aighu ya Sharia, na kuitanya Sharia. Na kukaitanya Sharia, ndekuwueisikira; ela kwaawuya mtanyi waro.

¹²Mfunyi Sharia na mtanyi ni umweri; nao nuo udimagha kukira na kutotesha. Ela oho koko ani kudimagha kumtanya mmbenyu?

¹³Idana inyo mghambagha, “Idime angu kesho, dichangia muzi msiku na msiku, dikaie aho mwaka mlazi dikibonya biashara na kupata fwaida;”

¹⁴nenyo ndemmanyagha gha kesho. Kwani irangi jenyu niki? Nechi jeeka sa ikungughu jiwonekagha kapindi, nao sena jilaghaye.

¹⁵Kumangu mwaghora huwu, “Bwana ukakunda, dichakaia moyo, nesi dichabonya wusiku na wusiku.”

¹⁶Ela seji iko, inyo mwaawuyakukasa kwa lung'eto lonyu. Kukukasa kose sa uku, kwazamie.

¹⁷Mundu umanyagha kubonya hachi, nao ndeibonyagha, kwake uo ni kaung'a.