Read TAITA BIBLE – Biblia Ilagho Jiboie Kwa Wandu Wose 1 PETRO 2 Bible Online

1 PETRO 2 - TAITA BIBLE – Biblia Ilagho Jiboie Kwa Wandu Wose bible

1 PETRO 2

¹Kwa wundu ugho, injenyi na mbai wuwiwi ghose, wukalo ghose, kusowa wuloli, iriso, na kuzighiria kose.

²Sa wana wavalwa idakoni, ghikundenyi nandighi agho mariwa ghielie gha kiroho, ghipate kumzoghora hata mvikie kukia;

³angu mwamerie kutoa wucha ghwa Bwana.

⁴Mghendienyi, uo uko jija igho jiko moyo, jereleghelo ni wandu, ela imbiri ya Mlungu, ni igho jisaghulo jiko ja zoghori mbaa.

⁵Nammbeni, sa magho ghiko moyo, muagho kukaia nyumba ya kiroho, wukohani ghwa wueli, ghofunya vizongona va kiroho, virumirikiagha kwa Mlungu kwa chia ya Jesu Kristo.

⁶Angu yaandikilo: “Ola niawika igho aighu ya Sioni, igho ja mbembenyi, jisaghulo, ja zoghori mbaa; na uo ose uchaarumiria kwake, ndechaafushwa waya anduangi.”

⁷Kwa huwo, ni wa zoghori mbaa konyu inyo mrumiriagha; ela kwa awo wiserumiriagha, “Ijo igho jeni waaghi werejileghieghe, nijo jeni jiwurie ibaa ja mbembenyi.”

⁸Na sena, “Ni igho jichaawikuwara wandu, na lwala luchaawighusha.” Wakuwa, angu wisejisikiragha ijo ilagho; sa iji koni werewikiloghe wikaie.

⁹Ela inyo moko kivalwa chisaghulo, wukohani ghwa kiwuzuri, mbari ielie, wandu wa Mlungu tiki, msaghulo mpate kueresha malagho gha kazi ra Mlungu ra mashiniko; uo oremmbangieghe kufuma kirenyi, mpate kungia andenyi ya mwengere ghwake ghwa mashiniko.

¹⁰Aho imbiri ndemorekoghe wandu wa Mlungu anduangi, ela idana mo wandu wake; aho imbiri morekoghe msefuilo wughoma, ela idana mwamerie kufuilwa wughoma.

¹¹Namvoya wakundwa, inyo sa waghenyi na wandu weida, mkutanye na bea ra mumbi, iro ribonyagha wuda na roho renyu.

¹²Mkaie na tabia ndicha aghadi ya wandu wa mbari zima; eri wikakaghora aighu yenyu wei mo wabonyi kiwiwi, wiriwone kazi renyu riboie, na kumkasa Mlungu ijo Ituku uchagha.

¹³Mkuwike aisi ya kula nguma ya mdamu kwa wundu ghwa Bwana, ngera ni kwa mzuri, sa m'baa;

¹⁴angu ngera ni kwa wabaa wa masanga, sa wandu widumilo ni mzuri kuwineka adhabu wandu wibonyagha mawiwi, na kuwikasa awo wibonyagha nicha.

¹⁵Angu ni lukundo lwa Mlungu kwa inyo kubonya nicha, muwinyamirishe wandu wakelu wisemanyagha.

¹⁶Mkaie sa wandu wiko huru, ela mseghutumie wuhuru ghonyu kukaia kifuniko cha mawiwi; ela mkaie sa wadumiki wa Mlungu.

¹⁷Winekenyi ishima wandu wose. Mghukunde ghuja wumwanidu. Muobuonyi Mlungu, mnekenyi ishima mzuri.

¹⁸Inyo wadumiki, mkuwike aisi ya weke bwana wenyu kwa ishima jose. Si awo wiko wecha na wa mboa weni wiekeri, ela hata na awo wibirie wori.

¹⁹Angu mundu wadakaswa, ikakaia warumaghia iji watirirwa kuseko na hachi kwa wundu ghwa Mlungu.

²⁰Kwani ni fwaidaki mpatagha mkarumaghia kukabwa kwa kubonya mawiwi? Ela mkarumaghia kutirirwa kwa kubonya nicha, mchapata kukaswa ni Mlungu.

²¹Angu moowangilwa maza iri; kwa kukaia Kristo wori oretiriroghe kwa wundu ghonyu, ukimsighia fwana, mpate kunugha chwau rake.

²²Uo nderebonyerege kaung'a ingi, hata wukalo ghungi ndeghorewonekieghe andenyi ya madedo ghake anduangi.

²³Iji oredukaniroghe, nderetumbulieghe kwa kudukana; iji oretiriroghe, nderekumbieghe mndungi wowa; ela orekusaghikieghe kwa Mlungu uo utanyagha hachi.

²⁴Kristo moni oreridukieghe kaung'a redu mumbinyi kwake aighu ya mudi, eri dipate kufwa cha kaung'enyi, na kukaia moyo cha hachinyi. Kwa makabo ghake, moreombochologhe.

²⁵Angu morekoghe mwalaghaya sa ng'ondi, ela idana mwamerie kummburia Mlisha na Mzighaniri wa roho renyu.