Read TAITA BIBLE – Biblia Ilagho Jiboie Kwa Wandu Wose 1 PETRO 5 Bible Online

1 PETRO 5 - TAITA BIBLE – Biblia Ilagho Jiboie Kwa Wandu Wose bible

1 PETRO 5

¹Kwa wundu ugho, nawivoya waghosi wiko aghadi konyu, ini moni niko mghosi sa awo weni, na mshahidi wa matiriro gha Kristo, na mngara wa ghuja wubaa ghuchaafunukulwa.

²Lishenyi chagha cha Mlungu chiko aisi ya wuzighaniri ghonyu. Si kwa kufungishwa ndighi anduangi, ela kwa kukunda; si kwa kulola fwaida isefwane, ela kwa ngolo ielie;

³si sa wandu m'bonyagha nguma aighu ya awo wiko aisi yenyu, ela mkaie fwana kwa chagha.

⁴Na iji Mlisha M'baa wa ng'ondi wawoneka, mchapata kirumbu cha wubaa chisesiagha anduangi.

⁵Wokoni na inyo muko watini mkuwike aisi ya waghosi. Inyo mmbose mkaie na wumboa kula mundu na mmbao; angu, “Mlungu wawitangala wang'eti, ela wawineka mvono awo wiko na wumboa.”

⁶Kwa huwo mkusere aisi ya mkonu ghwa Mlungu ghuko na kudima, eri upate kumjosa kwa ngelo yaro.

⁷Mumkumbie uo wasi ghonyu ghose, angu wawuyamtala inyo.

⁸Kaienyi na akili mchereshe. M'maiza onyu, uo Ibilisi, waawuyamara-mara sa shimba irurumagha ikimlola mndungi ipate kumja.

⁹Mangenyi andenyi ya irumirio jenyu, mumtangale, mkimanya angu matiriro muko nagho, nigho gheni ghawuyakaia kwa wanyinyu wiko wurumwengunyi.

¹⁰Nenyo, nyuma ya kutirirwa kwa ngelo ndini, uo Mlungu wa mvono ghose, ummbangie kwa wubaa ghwake ghwa kala na kala andenyi ya Kristo, uchamkatisha moni, na kummangisha, na kumneka ndighi.

¹¹Kwake uo, ndekukaie kuja kubonya nguma kwa kala na kala. Amen.

¹²Namwandikia kwa wuvui, ngiteselwa ni Silvano, uo nimtalagha kukaia mwanidu mloli; ngimshashira na kummanyisha angu ughu nigho mvono ghwa loli ghwa Mlungu: mangenyi gi andenyi yaro.

¹³Ijo ikanisa jiko Babuloni, jeresaghuloghe sa inyo, jamroghua; na mwanwapo Marko huwo koni wamroghua.

¹⁴Roghuanenyi mmbeni na mmbeni kwa msusugho ghwa lukundo. Sere ndeikaie konyu mmbose muko andenyi ya Kristo.