Read TAITA BIBLE – Biblia Ilagho Jiboie Kwa Wandu Wose 1 JOHANE 3 Bible Online

1 JOHANE 3 - TAITA BIBLE – Biblia Ilagho Jiboie Kwa Wandu Wose bible

1 JOHANE 3

¹Wonenyi ni lukundo lufwane wada uja Aba udikunde nalo, hata dikadima dawangwa wana wa Mlungu; nesi niko koni diko. Ihi niyo sababu wurumwengu ghusewuedimanya, kwa kukaia ndeghoremmanyireghe Uo.

²Wakundwa, de wana wa Mlungu idana; ela ndeiwueka worinyi seji dichaakaia. Damanya angu kasikira Kristo wawoneka worinyi, dichafwanana nao, angu dichammbona seji koni uko.

³Na kula mundu wawuyamsuwiria huwo, wakuelesha moni sa iji koni Kristo uelie.

⁴Kula mundu ubonyagha kaung'a ni mleghi sharia; kwa kukaia kaung'a ni kuja kulegha sharia.

⁵Nenyo mwamanya angu Kristo orewonekieghe worinyi upate kuriinja kaung'a, na andenyi kwake ndekuwadie kaung'a ingi anduangi.

⁶Kula mundu ukaiagha andenyi ya Kristo, ndebonyagha kaung'a, uo ubonyagha kaung'a ndemmbonie jingi, hata ndemmanyire anduangi.

⁷Wanake watini, mndungi usakemkalia; uo ubonyagha hachi, ni mhachi seji koni Kristo uko mhachi.

⁸Mundu ubonyagha kaung'a ni wa Ibilisi, angu Ibilisi wadabonya kaung'a kufuma kuzoya. Kwa wundu ugho, Mwana wa Mlungu orewonekieghe worinyi, upate kurinona kazi ra Ibilisi.

⁹Kula mundu uvalo ni Mlungu ndebonyagha kaung'a; angu asili ya Mlungu yadakaia andenyi kwake, nao ndedimagha kubonya kaung'a, kwa kukaia oovalwa ni Mlungu.

¹⁰Kwa ilagho iji, wana wa Mlungu wawoneka worinyi, na wana wa Ibilisi wori. Uo ose usebonyagha hachi, si wa Mlungu anduangi; hata uo usemkunde mruna.

¹¹Angu iji nijo ilagho morejisikireghe kufuma kuzoya, kukaia, dikundane diweni na diweni;

¹²si sa Kaini uo orekoghe wa Uja Mmbiwi, hata ukam'bwagha mruna. Na kwaki orem'bwaghagha? Ni angu mabonyo ghake gherekoghe ghizamie, na gha mruna gherekoghe gha hachi.

¹³Msakeshinika wanidu wurumwengu ghukazamilwa ni inyo.

¹⁴Isi damanya angu damerie kufuma kifonyi na kungia iranginyi, kwa kukaia dawikunde awo wanidu. Uo ose usewadie lukundo, wadakaia kifonyi.

¹⁵Mundu uzamilwagha ni mruna ni m'bwaghi-wandu, nenyo mwamanya ndekuwadie m'bwaghi-wandu ungi uko na irangi ja kala na kala jikaiagha andenyi kwake anduangi.

¹⁶Kwa ilagho iji, dalumanya lukundo; kukaia, Kristo orefunyireghe irangi jake kwa wundu ghodu, nesi yadifwana difunye marangi ghedu kwa wundu ghwa awo wanidu.

¹⁷Ela ngera mndungi wawadie vilambo va wurumwengu, na kummbona mruna usewadie, ukakaia na ngolo ikurie emuima, lukundo lwa Mlungu lwakaia wada andenyi kwake?

¹⁸Wanake watini, disakekaia na lukundo lwa madedo maduu, ela lwa mabonyo na loli.

¹⁹Kwa chia ihi, dichamanya angu deko wa iyo loli, na kukaia na wuwana imbiri ya Mlungu,

²⁰ngelo iyo yose ngolo redu rakaditanya. Angu Mlungu ni m'baa kuchumba ngolo redu, nao waichi maza rose.

²¹Wakundwa, kamanya ngolo redu riseditanyagha, deko na wuwana imbiri ya Mlungu.

²²Nesi dikalomba kilambo icho chose diapata kufuma kwake; angu dawuyaiwadia memu yake, na kubonya seji ukunde.

²³Na ughu nigho momu ghwake, kukaia, dimrumirie uo Mwana wake Jesu Kristo, na kukundana diweni na diweni sa iji koni Kristo oredilaghirieghe.

²⁴Wandu wose wiiwadiagha memu ya Mlungu, wadakaia andenyi kwake, nao moni andenyi kwawo. Kwa chia iyo, isi damanya angu Mlungu oko andenyi kodu, kwa uo Roho oredinekieghe.