Read TAITA BIBLE – Biblia Ilagho Jiboie Kwa Wandu Wose WATANYI 11 Bible Online

WATANYI 11 - TAITA BIBLE – Biblia Ilagho Jiboie Kwa Wandu Wose bible

WATANYI 11

¹Idana Jefitha, Mgileadi, orekoghe ing'oni ibaa ja wuda, ela orekoghe mwana wa ilaya. Gileadi orekoghe ni ndee wake Jefitha.

²Wokoni muka wa Gileadi oremvaieghe wadawana; hata iji awo wadawana wazoghua, wikammbinga Jefitha wikimzera, “Oho ndekuchaapata ifwa jingi ja nyumba ya aba, angu ko mwana wa muka mzima.”

³Niko Jefitha ukafuma kwa waruna ukaghenda na kukaia isanga ja Tobu. Wandu wamu wa kisha wikakukwanya na Jefitha, wikaghenda wikimaranya nao.

⁴Nyuma ya ngelo imu, Waamoni wikabusa wuda aighu ya Waisraeli.

⁵Hata iji wabusa ugho wuda, wabaa wa Gileadi wikaghenda kumreda Jefitha kufuma isanga ja Tobu;

⁶wikamzera, “Choo kukaie m'baa odu dipate kulwa na Waamoni.”

⁷Ela Jefitha ukawizera awo wabaa, “Welee, ndemodezamilwa ni ini hata mkaniwinga kufuma nyumbenyi kwa aba? Kwaki idana municheagha angu mwapata wasi?”

⁸Wabaa wa Gileadi wikamzera Jefitha, “Ni kwa wundu ughu, niko daghaluka cha kwako idana, kupate kughendanya nesi na kulwa na Waamoni; sena kukaie kilongozi cha wandu wose wa Gileadi.”

⁹Jefitha ukawizera, “Mkaniwunja mzinyi nipate kulwa na Waamoni, na BWANA unisimie, nichakaia m'baa onyu.”

¹⁰Wabaa wa Gileadi wikamzera, “Loli dichabonya sa iji koni kwaghora, BWANA ndekaie shahidi aghadi yedu.”

¹¹Niko Jefitha ukaghendanya na wabaa wa Gileadi, na wandu wikam'bonya ukaie m'baa na kilongozi chawo. Jefitha ukaghora malagho ghake imbiri ya BWANA aho Mispa.

¹²Nao Jefitha ukaduma wandu kwa mzuri wa Waamoni ukamzera, “Ni ilaghoki kuko najo cha kwapo jakushekeria kubonye wuda na isanga japo?”

¹³Mzuri wa Waamoni ukawitumbulia awo wandu weredumiloghe ni Jefitha, “Ni angu Waisraeli werewusireghe isanga japo iji werefumieghe Misri, kufuma Arnoni hata Jaboki na hata Jordani; idana jiwunjenyi kwa sere.”

¹⁴Jefitha ukaduma wandu sena kwa mzuri wa Waamoni,

¹⁵ukamzera, “Jefitha waghora huwu, Israeli ndewerewusireghe isanga ja Moabu hata ja Waamoni,

¹⁶ela iji werejokieghe kufuma Misri, wedemaria kireti hata Bahari ya Shamu, wikavika Kadeshi.

¹⁷Niko Israeli wikaduma wandu kwa mzuri wa Edomu wikighamba, ‘Dakulomba kudirumirie diidirie isanga jako;’ ela ukalegha. Niko wikaduma wandu kwa mzuri wa Moabu, ela ndewerewirumirieghe anduangi. Kwa huwo Waisraeli wikakaia Kadeshi.

¹⁸Niko wikawada charo kuidiria kireti, wikamaria mbai na mbai ya isanga ja Edomu na isanga ja Moabu; wikavika cha mashariki ya isanga ja Moabu, na kubonya kambi kimonu cha Arnoni, ela ndewerengirieghe isanga ja Moabu, kwa kukaia Arnoni niyo erekoghe mpaka ghwa Moabu.

¹⁹Niko Israeli wikaduma wandu kwa Sihoni mzuri wa Waamori, mzuri wa Heshboni, ukamzera, ‘Dakulomba kudisighe diidirie isangenyi jako dipate kuvika isangenyi kodu.’

²⁰Ela Sihoni nderekoghe na irumirio na Waisraeli wiidie isangenyi kwake, kwa huwo Sihoni ukawikwanya wandu wake wose, na kubonya kambi aja Jahazi; ukalwa na Waisraeli.

²¹Niko BWANA, uo Mlungu wa Waisraeli, ukamfunya Sihoni na wandu wake wose mikonunyi kwa Israeli, wikawisima; kwa huwo Israeli ukajiwusa isanga jose ja Waamori awo werekoghe wikikaia aho.

²²Nawo wikajiwusa isanga jose ja Waamori kufuma Arnoni hata Jaboki, na kufuma kireti hata Jordani.

²³Kwa huwo BWANA, uo Mlungu wa Israeli, ukawiwinga Waamori imbiri ya wandu wake. Da oho kokunda kuwusa?

²⁴Ndekuwusagha icho mlungu ghwako Kemoshi ghukunekagha chikaie chako? Ela isi dichawusa icho chose BWANA Mlungu odu udinekie.

²⁵Da oho koko mucha kuchumba Balaki mwana wa Sipori mzuri wa Moabu? Jingi warashane na Israeli, angu jingi walue nawo?

²⁶Israeli wakaie Heshboni na Aroeri chiaimweri na mizi yaro mitini, na mizi yose iko mbai mbai ya moda ghwa Arnoni kwa miaka maghana adadu; kwaki ngelo iyo msereiwusireghe iyo mizi?

²⁷Kwa huwo ini sibonyere kaung'a ingi kwako, na oho kwawuyakosa kubonya wuda nani; BWANA, uo Mtanyi, uchatanya malagho idime aghadi ya wandu wa Israeli na wandu wa Amoni.”

²⁸Ela mzuri wa Waamoni ndereghitalieghe malagho gha Jefitha anduangi.

²⁹Niko Roho wa BWANA ukamseria Jefitha, nao ukaida aghadi ya Gileadi na Manase, hata Mispa ya Gileadi, na kufuma Mispa ukaida hata kwa Waamoni.

³⁰Jefitha ukabonya ighemi kwa BWANA ukaghamba, “Kukawifunya Waamoni mkonunyi kwapo,

³¹niko uo ose uchaafuma mnyango ghwa nyumba yapo, kunimara ngelo ngiwuya nyuma ya kusima, nichamfunya kwako ukaie kizongona chekora.”

³²Niko Jefitha ukaruwuka cha kwa Waamoni upate kulwa nawo; na BWANA ukawifunya mikonunyi kwake.

³³Nao ukawibwagha kufuma Aroeri hata kaavui na Minithi mizi mirongo iwi, hata Abel-keramimu. Ukabwagha wandu wengi na ndighi, na Waamoni wikasimwa ni Waisraeli.

³⁴Nao iji Jefitha orewurieghe mzinyi kwake Mispa, ukammbona mwai wake ukifuma mnyangonyi kwake uko na kayamba ukivina, nao orekoghe ni mwana wake wa ititi, sena nderekoghe na mwana ungi mzima wa womi angu wa waka.

³⁵Hata iji oremmbonieghe, ukarashua nguwo rake ukighamba, “Wei ngai mwana wapo! Kwaniredia wasi na mashaka mabaa aighu yapo; kwa kukaia nam'bonyera BWANA ighemi, nani sidimagha kuwuya nanyuma kwa ighemi japo.”

³⁶Mwai wake ukamzera, “Ii aba, ikakaia kwam'bonyera BWANA ighemi, kunibonyere agho gheni kwamzera BWANA, angu hoku wakulipia kisasi kwa wamaiza wako awo Waamoni.”

³⁷Nao ukamzera ndee, “Kunibonyere ilagho iji jimweri, nisighe kwa meri iwi, nighende mighondinyi na waghenyi wapo ngighulilia wai ghwapo.”

³⁸Ukamzera, “Ghenda!” Ukamsigha kwa meri iwi, ukafuma na waghenyi wake ukaghenda ukighulilia wai ghwake aighu mighondinyi.

³⁹Nao kutua kwa meri iwi, ukawuya kwa ndee, nao ukam'bonyera kara kara na ighemi jake orejibonyereghe, uo moni nderemmanyireghe mndwawomi ungi jingi. Ghukawuya ni mzango andenyi ya Israeli,

⁴⁰kukaia, wai wa Israeli wikaie wikighenda kwa matuku ana kumlilia mwai wa Jefitha, Mgileadi kula mwaka.