Read TAITA BIBLE – Biblia Ilagho Jiboie Kwa Wandu Wose WATANYI 14 Bible Online

WATANYI 14 - TAITA BIBLE – Biblia Ilagho Jiboie Kwa Wandu Wose bible

WATANYI 14

¹Samsoni ukasea cha Timna, na ahoeni Timna ukammbona mwai umu wa Wafilisti.

²Niko ukacha na kuwighoria mae na ndee, “Nawona mwai umu wa Wafilisti aja Timna; neekunda munipatire uo mwai nimlowuo.”

³Ela ndee na mae wikamzera, “Kwaasowa muka ungi aghadi ya kichuku chako angu aghadi ya wamzedu wose, hata ikaie suti kwendeonda muka kufuma kwa Wafilisti wiseshamishiro?” Ela Samsoni ukamzera ndee, “Nipatire uo, angu nuo wawuyanighokia.”

⁴Ndee na mae ndeweremanyireghe kukaia ilagho ijo jedefuma kwa BWANA; angu BWANA odeeka kilola visababu kufuma kwa Wafilisti. Ngelo iyo Wafilisti wedeeka wikiwibonyera nguma Waisraeli.

⁵Niko Samsoni ukasea cha Timna, andwamweri na ndee na mae; hata iji werekoghe wikiida mbuwenyi ya mzabibu, ukawona mwana wa shimba ukimrurumia;

⁶na Roho wa BWANA ukamchea aighu kwake kwa ndighi, ukairashua ija shimba kwa mikonu yake seji mundu urashuagha ndaghina, nao nderewawadieghe kilambo chingi mkonunyi kwake. Ela nderewighorieghe wavi wake agho oreghibonyereghe.

⁷Niko ukasea ukadedanya na uja mwai ukam'boia na ndighi.

⁸Nyuma ya matuku matini, Samsoni ukacha kummbusa. Aja chienyi ukaghenda kuzighana ija gharia ya shimba, nao ukawona izungu ja choki andenyi ya ija gharia ya shimba, na wuki.

⁹Ukangira mkonu na kufunya wuki, nao ukaghenda ukighuja chienyi; ukacha kwa ndee na mae, ukawineka wuki ghumu, nawo wikaja. Ela nderewighorieghe wei waafunya ghuja wuki gharienyi ya shimba.

¹⁰Nao ndee ukaghenda kwa uja mwai kwawo, na Samsoni ukabonya karamu aho angu huwo niko wandu wa irika werekoghe wikibonya.

¹¹Hata iji wandu weremmbonieghe, wikamredia wangara wandu mirongo idadu wikaianyeghe.

¹²Samsoni ukawizera, “Sighenyi nimdeghie ndawi idana, iji mdimagha kunitambuya andenyi ya matuku mfungade gha karamu; mkapata, nichamneka marwao mirongo idadu gha kitani, na marwao mazima gha karamu mirongo idadu;

¹³ela nenyo mkalemwa ni kutambua, mchanineka marwao mirongo idadu gha kitani na marwao mirongo idadu gha karamu.” Nao wikamzera, “Degha ndawi yako diisikire.”

¹⁴Ukaghamba “Kwa uo ujagha verefumieghe vindo vimu veja, kufuma kwa uo uko na ndighi, cherefumieghe kilambo chimu chisingie.” Nawo andenyi ya matuku adadu ndeweredimieghe kutambua iyo ndawi anduangi.

¹⁵Ituku ja kana wikamzera mka-Samsoni, “Msesee-sesee mmigho uditambue iyo ndawi, disechekukora oho na nyumba ya ndeyo; mwaadikaribisha aha eri mudiwunje wakiwa?”

¹⁶Niko mka-Samsoni ukamghendia mumi ukilila ukamzera, “Oho kwaawuyazamilwa ni ini, hata ndekunikunde kungi; kwa kukaia kwadeghie wandu wa mzedu ndawi iyo kusenighorie ini kutambua kwaro.” Ukamzera, “Zighana simghorie aba hata mao, da nadima wada kukughoria oho?”

¹⁷Nao ukalila imbiri kwake kwa matuku mfungade gha iyo karamu yawo; na kwa ituku ja mfungade ukamghoria, angu orekoghe ukimziziria na ndighi. Niko uo muka ukawighoria wandu wa mzawo iyo ndawi na kutambua kwaro.

¹⁸Nao waja wandu wa muzi wikamghendia Samsoni imbiri iruwa jiseneng'enere, ituku ja mfungade wikamzera: “Niki chisingie kuchumba wuki? Niki chiwadie ndighi sa shimba?” Nao ukawizera, “Ngera mselimieghe na tagho yapo, ndamwaitambuagha ndawi yapo.”

¹⁹Nao Roho wa BWANA ukamseria aighu yake kwa ndighi ukasea Ashkeloni na kuwibwagha wandu mirongo idadu, wa ugho muzi, ukawisoka vilambo vawo, na kuwineka marwao gha karamu waja wandu wereitambueghe ija ndawi. Nao ukaghala cha kwa ndee uko na machu mabaa.

²⁰Niko uja muka ukanekwa mundu mzima orekoghe muichi wake.