Read TAITA BIBLE – Biblia Ilagho Jiboie Kwa Wandu Wose WATANYI 15 Bible Online

WATANYI 15 - TAITA BIBLE – Biblia Ilagho Jiboie Kwa Wandu Wose bible

WATANYI 15

¹Nyuma ya matuku ghamu, ngelo ekuwida ngano, Samsoni ukaghenda kumroghua mkake, ukamdwaia ndaghina. Nao ukaghamba, “Neekunda ningie chumbenyi kwa mkwapo.” Ela mghosi wake ukamghiria usengie.

²Mghosi wake ukaghamba, “Loli nedeghesha wei koozamilwa ni uhu mwana wa waka putu; kwa huwo namnekie mghenyi wako. Nakulomba kuwuse mruna mtini, ndekuwonagha waghokie kumchumba m'baa wake?”

³Nao Samsoni ukaghamba, “Ngelo ihi sichaatalwa kukaia mkosi kwa agha nichaawibonya Wafilisti.”

⁴Samsoni ukafuma, ukawada mizozo maghana adadu ukaifunga iwi iwi kwa vikomba vawo, na kufunga kilele ifindikonyi.

⁵Hata umeria kukora ivo vilele, ukailekeria iyo mizozo ingie na kuidiria mbuwenyi ra ngano ra Wafilisti, ukakora viro vose na matunda gha zeituni.

⁶Wafilisti wikakotia, “Nani wabonya huwu?” Wikaghamba, “Ni Samsoni uo mghosi wake Mtimna; kwa kukaia mghosi wake oremsokieghe mkwake na kumneka mghenyi wake.” Niko Wafilisti wikajoka na kumkora uja mwana wa waka na ndee.

⁷Nao Samsoni ukawizera, “Ikakaia huwu niko m'bonyagha, naghema nichalipia kisasi aighu yenyu, na nyuma ya huwo nichaghenda.”

⁸Ukawikaba na kuwibwagha kitungu cha wandu wengi na ndighi, ukasea na kughenda ukakaia lukororonyi lwa igho ja Etamu.

⁹Niko Wafilisti wikacha na kubonya kambi aja Juda; wikaghungiria muzi ghwa Lehi.

¹⁰Wandu wa Juda wikaghamba, “Kwaki mwachalwa nesi?” Wikamzera, “Dacha kumfunga Samsoni dipate kum'bonya seji udibonyere.”

¹¹Niko wandu wa Juda elfu idadu wikasea cha lukororonyi lwa igho ja Etamu, wikamzera Samsoni, “Ndekuichi Wafilisti wadadibonyera nguma? Kwadibonya wada huwu sena?” Ukawizera, “Naawibonya sa iji koni winibonyere.”

¹²Wikamzera, “Dacha kukufunga dikufunye mikonunyi kwa Wafilisti.” Nao Samsoni ukawizera, “Nibonyerenyi ighemi kukaia ndemchaanibwagha inyo mmbeni.”

¹³Wikamzera, “Hata, isi dichakufunga na kukufunya mikonunyi kwawo koni, ndedikubwaghagha kungi.” Niko wikamfunga na kamba iwi mbishi, wikamreda kufuma lukororonyi lwa igho.

¹⁴Nao iji wavika Lehi, Wafilisti wikamkimbiria wikikema; Roho wa Bwana ukamchea aighu yake kwa ndighi mbaa na rija kamba rerekoghe mikonunyi kwake, rikawuya sa uzi wa kitani wahia, rikapotoka kufuma mikonunyi kwake.

¹⁵Ukawona muzu mmbishi ghwa punda andonyi, ukaghorua mkonu ghwake, ukaghushoa na kubwagha nagho wandu elfu imweri.

¹⁶Nao Samsoni ukaghamba, “Kwa muzu ghwa punda, kitungu na kitungu; Kwa muzu ghwa punda, nabwagha wandu elfu imweri.”

¹⁷Hata umeria kughora agho malagho, ukaghudagha ghuja muzu ghwa punda ghorekoghe mkonunyi kwake; na andu aho kukawangwa Ramath-lehi.

¹⁸Niko Samsoni ukasikira kau loli loli, ukammbanga BWANA ukamzera, “Oho kwadineka kusima kubaa kwa mkonu ghwa mdumiki wako: da niafwa ni kau na kughwa mkonunyi kwa awa wandu wiseshamishiro?”

¹⁹Nao Mlungu ukaturua ilanga ja machi ahoeni Lehi, machi ghikafuma nao ukanywa; hata iji wameria kunywa, irangi jake jikammburia ukasikira nicha; niko ija ndoria ikawangwa En-hakore, nayo yaduagha ahoeni Lehi hata linu.

²⁰Samsoni ukawitanya Israeli kwa miaka mirongo iwi matuku gha Wafilisti.