Read TAITA BIBLE – Biblia Ilagho Jiboie Kwa Wandu Wose WATANYI 17 Bible Online

WATANYI 17 - TAITA BIBLE – Biblia Ilagho Jiboie Kwa Wandu Wose bible

WATANYI 17

¹Korekoghe na mndumu wa isanga ja mighondinyi ya Efraimu, uwangwagha Mika.

²Ukamzera mae, “Ivo vibelele va feza elfu imweri na ighana jimweri vereiwiloghe, na oho kukammbwasira njowe uo oreviiwieghe ini ngisikira, ola neko navo; ni ini nereviwusireghe.” Mae ukamzera, “Kurasimilo ni BWANA mwanwapo.”

³Ukawunja ivo vibelele va feza elfu na ighana jimweri kwa mae; na mae ukaghamba, “Iro feza nariwika wakfu kwa BWANA kwa wundu ghwa mwanwapo, upate kuriyeyusha na kuboisa mlimu ghwake. Kwa huwo idana nichakuwunjira.”

⁴Niko ukammbunjira mae iro feza. Nao mae ukawusa vibelele maghana awi va feza, ukamneka mchani feza, nao ukaboisa navo ugho mlimu ghuwachilo na kushingwa feza; nagho ghukawikwa andenyi ya nyumba ya Mika.

⁵Uo mundu Mika orekoghe na andu kwake kotasira, ukabonya milimu imu na naivera; ukammbika umu wa wana wake ukaie mkohani wake.

⁶Matuku agho, ndekorekoghe na mzuri andenyi ya Israeli; kula mundu orebonyereghe sa iji koni orekundieghe moni.

⁷Ngelo iyo cheni, korekoghe na Mlawi umu wa irika ufumie Bethlehemu ya Juda, orekoghe ukikanya na wandu wamu aho kiwughenyi.

⁸Nao orefumieghe muzi ghwa Bethlehemu ya Juda ukaghenda ukilola andu kokaia; hata iji orekoghe ukighenda, ukavikia isanga ja mighondinyi ja Efraimu, nyumbenyi kwa Mika.

⁹Mika ukamkotia, “Kwafuma hao?” Ukamtumbulia, “Ini ne Mlawi, nafuma Bethlehemu ya Juda, nialola andu kokaia.”

¹⁰Mika ukamzera, “Kaia kwapo, kuwuye mnjama na mkohani wapo; nani nichakulipa vibelele va feza ikumi kwa mwaka, na nguwo na vindo vako.”

¹¹Niko uo Mlawi ukarumiria kukaianya na Mika, nao ukakaia sa mwana wake.

¹²Mika ukammbika ukaie mkohani wake, na uo mundu wa irika ukakaia andenyi ya nyumba ya Mika.

¹³Niko Mika ukaghamba, “Idana namanya angu BWANA uchanibonyera nicha, kwa kukaia nekwanye na Mlawi uko kwa mikonu ya mkohani.”