Read TAITA BIBLE – Biblia Ilagho Jiboie Kwa Wandu Wose WATANYI 18 Bible Online

WATANYI 18 - TAITA BIBLE – Biblia Ilagho Jiboie Kwa Wandu Wose bible

WATANYI 18

¹Matuku agho, ndekorekoghe na mzuri ungi andenyi ya Israeli. Na kwa matuku agho, mbari ya Dani erekoghe ikilola andu kwawo koni kokaia, kwa kukaia ndewerekoghe wapata isanga jawo jeni aghadi ya mbari ya Israeli.

²Niko wandu wa Dani wikasaghua wandu wasanu wiko nandighi wa mbari yawo, wikawiduma kufuma Sora na kufuma Eshtaoli, wipate kujizighana isanga na kujimanya. Wikawizera, “Ghendenyi mmbone ijo isanga.” Wikaghenda hata isanga ja mighondinyi ja Efraimu, wikavika nyumbenyi kwa Mika; wikalala aho.

³Hata iji werekoghe aho, wikalumanya lwaka lwa uja Mlawi wa irika, wikamghalukia na kumkotia, “Nani ukuredie aha? Niki kwawuyabonya aha? Kazi yako niki?”

⁴Nao ukawighoria agho Mika um'bonyere, na seji umuandikie ukaie mkohani wake.

⁵Wikamzera, “Dakuvoya kumkotie Mlungu ngera dichawona nicha kwa ichi charo chedu.”

⁶Uja mkohani ukawizera, “Ghendenyi na sere; charo mwawuyaghenda cheko aisi ya wuzighaniri ghwa Mlungu.”

⁷Niko awo wandu wasanu wikafuma na kughenda muzi ghwa Laishi; wikawona seji awo wandu wiko nicha sa wandu wa Sidoni; wiko na sere, wisene kiture chingi, wisesowie kindo chingi chiko ndoenyi, wiwadie mali; nawo werekoghe kula na Wasidoni, hata ndewereranganeghe na mndungi anduangi.

⁸Nao iji werevikieghe kwa waruna aja Sora na Eshtaoli, waruna wikawikotia, “Mwadiredia malaghoki?”

⁹Wikatumbulia, “Wukenyi dighende kulwa na Laishi, kwa kukaia dameria kujiwona ijo isanga; jawurue nandighi. Da muakaia msebonyagha ilagho jingi? Msakemuka kughenda na kujiwada isanga.

¹⁰Mkaghenda, mchakua wandu wisene kiture chingi. Isanga ni ibaa, ee, na Mlungu wameria kumneka inyo, isanga jisesowie kindo chingi chikundikie ndoenyi.”

¹¹Niko wandu maghana arandadu wa mbari ya Dani wiwadie maswagha wikafuma Sora na Eshtaoli,

¹²wikaghenda na kubonya kambi magharibi ya Kiriath-jearimu andenyi ya Juda; kwa wundu ughu andu aho kwadua kukiwangwa Mahanedani.

¹³Wikaida aho hata isanga ja mighondinyi ja Efraimu, wikavika nyumbenyi kwa Mika.

¹⁴Niko awo wandu wasanu wereghendighe kujizighana ijo isanga ja Laishi wikawizera wambao, “Keni mwaichi angu andenyi ya imu ya nyumba iri koko na naivera na mlimu ghuboisiro na feza na milimu mizima wori? Idana ririkanyenyi sa iji mchaabonya.”

¹⁵Niko wikaghenda kwa nyumba ya Mika andu uja Mlawi wa irika orekoghe, wikamroghua.

¹⁶Ngelo iyo wandu wa Dani wiwadie maswagha maghana arandadu werekoghe kimusi mbengenyi;

¹⁷na awo wandu wasanu wereghendieghe kujizighana isanga wikajoka na kungia, wikashoa ugho mlimu ghuboisiro na feza, naivera, na iyo milimu mizima ngelo mkohani orekwanyeghe kimusi na waja wandu maghana arandadu wiwadie maswagha.

¹⁸Hata iji awo wandu werengirieghe nyumba ya Mika, na kuwusa ugho mlimu ghuboisiro na feza, naivera, na iyo milimu mizima, uja mkohani ukawizera, “Mwawuyabonya wada?”

¹⁹Wikamzera, “Nyama kima! Wadia momu ghwako kudinughe; kukaie mnjama na mkohani odu. Wele ndeifwaneghe oho kukaie mkohani wa mbari yose ya Waisraeli kuchumba kukaia mkohani wa mundu umweri?”

²⁰Niko uja mkohani ukaboilwa, ukaiwada naivera, mlimu ghuboisiro na feza na milimu mizima, ukaghenda ghadi na ghadi ya wandu.

²¹Niko wikazoya kughenda, wikawika wana wawo, mfugho rawo, na vilambo vawo naimbiri.

²²Hata iji waghenda kakula kutini kufuma muzi ghwa Mika, wandu werekoghe nyumbenyi kaavui na nyumba ya Mika wikawangwa wifume shighadi, wikawinugha Wadani na kuwiwada.

²³Wikawikemia Wadani, nawo wikaghaluka na kumkotia Mika, “Ni wada? Izungu iji jose ni ja indoki?”

²⁴Ukawitumbulia, “Mwawusa milungu yapo nereibonyereghe na mkohani mkaghenda; da niki nasighwa nacho? Kwaki munikotiagha ‘Ni wada?’”

²⁵Wadani wikamzera, “Kusedede! Kwadima kushekeria awa wandu wijoko ni machu wikubwaghe; nao kulaghashe irangi jako chiaimweri na wandu wa kinyumba chako.”

²⁶Niko Wadani wikaghenda chia rawo. Hata iji Mika wawona angu wawadie ndighi kumchumba, ukaghaluka na kuwuya cha mzinyi kwake.

²⁷Nyuma ya Wadani kuwusa vilambo verebonyeroghe ni Mika, na uja mkohani wake, wikangia muzi ghwa Laishi, kwa wandu wiko na sere, wisene kiture chingi; wikawibwagha kwa lufu na kughukora muzi ghwawo.

²⁸Ndekorekoghe na mndungi otesia; angu Sidoni erekoghe kula, hata ndewereranganeghe na mndungi anduangi. Muzi ugho ghodeeka vololonyi ya Beth-rehobu. Wikaghuagha ugho muzi, na kukaia aho.

²⁹Wikaghuwanga ugho muzi “Dani” kunughana na irina ja wawae, orevaloghe kwa Israeli; ela koimbiri ugho muzi ghorewangwagha Laishi.

³⁰Niko Wadani wikawika ghuja mlimu wipate kughutasa, na Jonathani mwana wa Gershoni, wawae Musa na wana wawo, werekoghe wakohani kwa mbari ya Dani, hata ituku waja wandu weredwaloghe wunyika.

³¹Niko aho wikaiwika ija milimu erebonyeroghe ni Mika ngelo rose nyumba ya Mlungu erekoghe ikikaia Shilo.