Read TAITA BIBLE – Biblia Ilagho Jiboie Kwa Wandu Wose WATANYI 19 Bible Online

WATANYI 19 - TAITA BIBLE – Biblia Ilagho Jiboie Kwa Wandu Wose bible

WATANYI 19

¹Matuku agho, iji kuserekoghe na mzuri ungi Israeli, Mlawi umu orekoghe ukimara-mara kiwughenyi aighu ya isanga ja mighondinyi ja Efraimu, nao orewusireghe muka okanya kufuma Bethlehemu ya Juda.

²Uo muka wake okanya ukakaia na machu nao, ukawuya kwa ndee aja Bethlehemu ya Juda, nao ukakaia aho meri ina.

³Niko mumi wake ukawuka kwendamlola, upate kumngola-ngola eri uwuye mzinyi. Orekoghe chiaimweri na mdumiki wake na weke punda wawi; ukacha hata nyumbenyi kwa ndee. Hata iji uo mwai ndee wammbona ukaboilwa na ndighi, ukacha kummara.

⁴Uja mghosi wake (yaani uja mwai ndee) ukamlomba ukaie, nao ukakaia aho kwa matuku adadu wikija na kunywa na kulala aho.

⁵Ituku ja kana wikawuka ukakuboisa ughende; ela uja mwai ndee ukamzera uja Mlawi, “Jaa vindo kupate ndighi ima kuzoye charo.”

⁶Niko awo wandu wawi wikasea kidombo wikaja na kunywa. Uja mwai ndee ukalomba ukighamba, “Lala kio chimu sena kuboilo.”

⁷Hata iji uja mundu orewukieghe kughenda, mghosi wake ukamshingira hata ukalala aho sena.

⁸Ituku ja kasanu ukawuka kokesho kio ughende; uja mwai ndee ukaghamba, “Dunga maghu kuje kindo chimu, kuwesere hata iruwa jihoo.” Nao wose wikaja vindo.

⁹Hata iji uja mundu na muka wake okanya, na mdumiki wake wawuka wighende, mghosi wake ukaghamba, “Zighanenyi idana ndoe yaawuyaswa, ndamwalalaa kio chimu. Nechi kira chisea idakoni; lalenyi aeni aha m'boilo, na kesho mchawuka kokesho kio mghale.”

¹⁰Ela uja mundu ukalegha ukawuka na kughenda ukavika kulangaya Jebusi (nigho Jerusalemu) orekoghe na weke punda wawi waalwa chiaimweri na muka wake okanya.

¹¹Hata iji werekoghe kaavui na Jebusi, ndoe erekoghe yaswa; na mdumiki wake ukamzera, “Nndoko dingie andenyi ya ugho muzi ghwa Wajebusi dilale aho.”

¹²Bwana wake ukamzera, “Ndedidimagha kungialala kwa muzi ghwa wandu wa kighenyi wiseko Waisraeli ela dichaghenda imbiri hata Gibea.”

¹³Ukamzera mdumiki wake, “Nndoko disoghode imbiri kwa mizi imu dilale Gibea angu Rama.”

¹⁴Nao wikaida na kughenda chia yawo, iruwa jikawineng'enera kaavui na Gibea, nagho ni muzi ghwa mbari ya Benjamini;

¹⁵wikaghaluka wingielala aho Gibea. Ukangia na kusea kidombo wazenyi ya muzi, angu ndekorekoghe na mndungi orewikaribishireghe wilale aho anduangi.

¹⁶Nao ola mghosi umu wafuma mbuwenyi luma lwa kenyi ukawikua aho, nao ni mundu ufumie isanga ja mighondinyi ja Efraimu; orekoghe ukikaia Gibea kiwughenyi, ela wandu wa aho werekoghe ni Wabenjamini.

¹⁷Uo mghosi ukawiwona wacharo wiko wazenyi ya muzi, ukawikotia, “Mwenda hao? Mwafuma hao?”

¹⁸Uja Mlawi ukatumbulia, “Dawuyacha kufuma Bethlehemu ya Juda, diaghenda noko kula isanga ja mighondinyi ja Efraimu andu nerefumieghe. Nedeghenda Bethlehemu ya Juda, na idana niaghala mzedu, naasowa mndungi onikaribisha nyumbenyi kwake.

¹⁹Dawadie nyasi na vindo va weke punda wedu, chiaimweri na mkate na divei kwa wundu ghwapo na muka wapo okanya, na mdumiki wapo wori; ndedipungukilo ni kilambo chingi.”

²⁰Niko uja mghosi ukaghamba, “Kaienyi na sere, ndemchaalala wazenyi kungi; nichamlindia na kumkatishira haja renyu rose.”

²¹Ukamdwa cha nyumbenyi kwake, ukawineka weke punda vindo, wikaoghosha maghu ghawo, wikaja na kunywa.

²²Hata iji werekoghe wikiboilwa, wandu wamu wa kisha wa ugho muzi wikacha wikaimara iyo nyumba na kukaba mnyango, wikamzera uja mghosi uko m'baa wa nyumba, “Funya uo mundu wangia nyumbenyi kwako, deekunda kummanya.”

²³Uja mundu m'baa wa nyumba ukafuma shighadi ukawizera, “Ii hata wanidu, msakebonya ughu wuwiwi mkiwona angu mundu uhu wangia nyumbenyi kwapo; msebonye ughu wuchafu.

²⁴Olenyi neko na mwai wapo na muka okanya wa uhu mundu, nichawifunya konyu muwibonye seji mkunde, ela msem'bonye uhu mundu ilagho jingi iwiwi.”

²⁵Ela awo wandu ndeweremsikireghe; niko uja Mlawi ukammbwada muka wake okanya ukamfunya kwawo, nawo wikammbwada na kulala nao kwa ndighi, na kum'bonya kiwiwi to hata luma lwa kesho; nao iji ndoe yazoya kuela wikamsigha ughende.

²⁶Ndoe iendaela, uja muka ukacha na kughwa mnyangonyi ghwa uja mghosi, andu bwana wake orekoghe; hata ndoe ikaela putu.

²⁷Nao iji mumi wawuka nakesho na kurughua mnyango, ukafuma shighadi upate kughenda chia yake; ukawona muka wake okanya walala mnyangonyi ghwa nyumba na mikonu iko aighu kizingitinyi cha mnyango.

²⁸Ukamzera, “Wuka dighende.” Ela nderepatireghe itumbulio jingi; ukammbwada na kumjosa aighu ya punda, ukaghenda hata mzinyi kwake.

²⁹Hata iji wavika na kungia nyumbenyi kwake, ukawada ndagha, nao ukammbwada muka wake okanya, ukamdumbua-dumbua vipande ikumi na viwi, ukavimarisha isanga jose ja Israeli.

³⁰Na wose werewonieghe wikaghamba, “Kufuma wandu wa Israeli wafuma Misri hata idime iji, jingi ndekubonyekie angu kuwoneka ilagho sa iji. Jizighanenyi, m'bonye njama, nao mdede malagho gharo.”