Read TAITA BIBLE – Biblia Ilagho Jiboie Kwa Wandu Wose WATANYI 2 Bible Online

WATANYI 2 - TAITA BIBLE – Biblia Ilagho Jiboie Kwa Wandu Wose bible

WATANYI 2

¹Malaika wa BWANA[1] ukafuma Gilgali ukaghenda Bokimu na kuwizera Waisraeli, “Neremfunyireghe Misri na kumreda ijo isanga nerewilaghirieghe weke wawa wenyu ngighema, ‘Jingi sichaajichikanya ilaghano japo nenyo.

²Msebonye ilaghano jingi na wandu wa isanga iji; nenyo mcharivuchua madhabahu rawo.’ Ela ndem'bonyere seji neremzerieghe. Ni ilaghoki iji mujibonyere?

³Idana namghoria sichaawiwinga wifume, ela wichawuya wamaiza wenyu, na milungu yawo ichawuya shaghala konyu muitase.”

⁴Malaika wa BWANA uendaghora huwo, wandu wa Israeli wose wikazoya kulila.

⁵Wikakuwanga andu aho Bokimu, wikamfunyira BWANA vizongona.

⁶Hata iji Joshua wameria kulaghana na wandu wa Israeli, kula umu ukaghenda chia yake andu ifwa jake jerekoghe.

⁷Wandu wa Israeli wikamdumikia BWANA matuku ghose gha Joshua na gha waghosi awo werekwanyeghe na Joshua, awo wose wereriwonieghe kazi mbaa rose BWANA oreribonyereghe kwa Israeli.

⁸Mdumiki wa BWANA Joshua mwana wa Nuni ukafwa uko na miaka ighana na ikumi.

⁹Ukarikwa ndoenyi kwake koni aho Timnathi-sera, isanga ja mghondinyi ja Efraimu kaskazinyi ya Mghondi ghwa Gaashi.

¹⁰Kivalwa chose wokoni chikafwa, chikawuka kivalwa kizima; nacho chikamliwa BWANA na agho ghose oreghibonyereghe kwa Israeli.

¹¹Niko wandu wa Israeli wikam'bonyera BWANA kaung'a, wikawoka kudumikia weke Baali.

¹²Wikasigha kumtasa BWANA, uo Mlungu wa weke ndee uo orewifunyireghe isanga ja Misri; wikazoya kutasa milungu mizima, na milungu ya awo wandu werekoghe mbai mbai kwawo. Wikaighoghomia hata BWANA ukajokwa ni machu.

¹³Wikasigha kumtasa BWANA, na kuidumikia milungu mizima, weke Baali na Maashtorethi.

¹⁴Kwa huwo BWANA ukajokwa ni machu loli-loli aighu ya Israeli, ukawingira mikonunyi kwa awo wandu wewidwa wunyika. Ukasigha wamaiza wawo wiwisime, na kufuma aho, ndeweredimieghe kuwisima wamaiza wawo anduangi.

¹⁵Andu kose werefumieghe kulwa wuda, BWANA ukakaia ukilwa nawo, sa iji koni orewizerieghe, nawo wikangilwa ni wasi loli-loli.

¹⁶Niko BWANA ukawineka watanyi wedima kuwikira kufuma mikonunyi kwa wamaiza wawo.

¹⁷Ela Waisraeli ndewerewisikireghe watanyi wawo, hata ndewerekoghe waloli kwa BWANA, nawo wikatasa milungu mizima; shwa wori wikaghaluka na mbai kwa kuisigha ija chia erenughwagha ni weke ndee, awo weresikireghe malaghiro gha BWANA na kughibonya.

¹⁸Kula ngelo BWANA orewiwusirieghe mtanyi, BWANA orekoghe andwamweri na uo mtanyi; ukawikira Waisraeli kufuma kwa wamaiza wawo, ngelo rose uo mtanyi orekoghe moyo; kwa kukaia BWANA orewadiloghe ni wughoma ghwawo kwa wundu ghwa uko kuruma kwawo na kusirimika kwa wandu werekoghe wikiwikoronga.

¹⁹Ela nyuma ya uo mtanyi kufwa, werekoghe wikiwuya nyuma na kubonya maza richumbie rija ra imbiri rerekoghe rikibonywa ni weke ndee kwa kuidumikia na kuighoghomia milungu mizima; wikadua andenyi ya lung'eto na mabonyo ghawo mawiwi.

²⁰Kwa huwo, BWANA ukajokwa ni machu aighu ya Waisraeli ukaghamba, “Kwa kukaia wandu awa wajisigha ilaghano japo nerewilaghirieghe weke ndee, nawo walegha kulusikira lwaka lwapo,

²¹sichaawinga ingi ya iro mbari reresigharikieghe nyuma ya kifwa cha Joshua;

²²nipate kuwitima Waisraeli kwa kutumia awo wandu ngera loli wichalindia kughenda kwa chia ra BWANA seji weke ndee werebonyereghe.”

²³Niko BWANA ukawisigha awo wandu, hata nderewiwingieghe kwa shwa-shwa, hata kuwingira mikonunyi kwa Joshua anduangi.