Read TAITA BIBLE – Biblia Ilagho Jiboie Kwa Wandu Wose WATANYI 20 Bible Online

WATANYI 20 - TAITA BIBLE – Biblia Ilagho Jiboie Kwa Wandu Wose bible

WATANYI 20

¹Niko wandu wa Israeli wose wikafuma sa mundu umweri kufuma Dani hata Beer-sheba, chiaimweri na isanga ja Gileadi; ijo izungu jikakwanyika imbiri ya BWANA aho Mispa.

²Na wabaa wa wandu mbari rose ra Israeli wikacha weni ikwanyikonyi ja wandu wa Mlungu, wandu elfu maghana ana wighendagha kwa maghu wiko na chufu.

³(Wabenjamini wikasikira kukaia wandu wa Israeli wajoka hata Mispa). Wandu wa Israeli wikaghamba, “Mudighorie wuwiwi ughu ghwabonyekie wada?”

⁴Niko uja Mlawi, mumi wa uja muka orebwaghiloghe ukatumbulia ukaghamba, “Nerechieghe Gibea kwa Wabenjamini, chiaimweri na muka wapo okanya, nipate kulala aho kio chimweri.

⁵Na wandu wa Gibea wikawuka nakio na kuimara ija nyumba nerekoghe; werekundeghe kunibwagha, ela wikalala na muka wapo okanya kwa ndighi, na idana wameria kufwa.

⁶Niko ngammbwada na kumdumbua vipande vipande, ngammarisha isanga jose ja ifwa ja Waisraeli, kwa kukaia wabonyere wuwiwi na wuchafu andenyi ya Israeli.

⁷Idana inyo mmbose Waisraeli mughizighane mmbeni mughitanye.”

⁸Nao wandu wikawuka kimusi sa mundu umweri wikighamba, “Mndungi odu ndewuyagha hemenyi angu nyumbenyi kwake.

⁹Dichabonya huwu kwa wandu wa Gibea: dichawijokia kwa kukaba kura;

¹⁰nesi dichawusa wandu ikumi kufuma kwa kula wandu ighana wa mbari rose ra Israeli, na wandu ighana kwa kula elfu na wandu elfu kwa kula elfu ikumi, weredia wandu vindo; na wandu wikameria kungia Gibea kwa Wabenjamini, wichaluya kisasi kwa wundu ghwa wuwiwi na wuchafu ghose wighubonyere andenyi ya Israeli.”

¹¹Niko wandu wose wa Israeli wikakwanyika chiaimweri sa mundu umweri, kulwa na ugho muzi.

¹²Mbari ya Israeli ikaduma wandu kwa mbari yose ya Benjamini wikighamba, “Ni wuwiwiki ughu ghubonyekie aghadi konyu?

¹³Kwa huwo idana wifunyenyi awo wandu wa kisha wiko Gibea dipate kuwibwagha na kuinja wuwiwi kufuma Israeli.” Ela Wabenjamini ndewerekoghe tayari kusikira lwaka lwa waruna awo wandu wa Israeli anduangi.

¹⁴Niko Wabenjamini wikacha chiaimweri kufuma mizinyi hata Gibea wipate kulwa wuda na wandu wa Israeli.

¹⁵Ituku jija wandu wa Benjamini wikakwanyika kufuma mizinyi kwawo wandu elfu mirongo iwi na irandadu welwa kwa lufu, wandu wa Gibea wiko mbai, awo weretaliloghe wandu maghana mfungade.

¹⁶Aghadi ya awa wandu wose, korekoghe na wandu maghana mfungade wisaghulo weretumiagha mikonu ya kimoso, weredimagha kulenga kwa kutumia kikuza hata wilase luwiriro lwa iridia, wiselughoshagha.

¹⁷Na wandu wa Israeli, Wabenjamini wiko mbai, werekwanyikieghe wandu elfu maghana ana; na awo wose werekoghe wandu wa wuda.

¹⁸Wandu wa Israeli wikawuka na kujoka Betheli, wikamkotia BWANA, “Ni weke ani aghadi kodu wichaakaia wa imbiri kuwijokia Wabenjamini?” BWANA ukaghamba, “Juda nuo uzoyagha kujoka.”

¹⁹Niko wandu wa Israeli wikajoka nakesho wikabonya kambi wipate kulwa na muzi ghwa Gibea.

²⁰Wikafuma kwendalwa na majeshi gha Benjamini, na kukupanga kwa wuda aho Gibea.

²¹Wabenjamini wikafuma Gibea kwa wuda, na kuwibwagha wandu wa majeshi gha Waisraeli elfu mirongo iwi na iwi.

²²Ela awo wandu, wandu wa Israeli, wikakufungisha ndighi na kupanga wuda ajaeni wereghupangieghe imbiri.

²³Wandu wa Israeli wikajoka na kumlilia BWANA hata luma lwa nakenyi; wikamkotia BWANA, “Disoghoda sena dipate kulwa na wanidu awo Wabenjamini?” BWANA ukawizera, “Wijokienyi mpate kulwa nawo.”

²⁴Niko wandu wa Israeli wikawisoghodera kaavui awo Wabenjamini ituku ja kawi.

²⁵Wabenjamini wikafuma Gibea ituku ja kawi kulwa na Waisraeli wikawibwagha masikari ghifundishiro kulwa kwa lufu, wandu elfu ikumi na wunyanya.

²⁶Niko masikari ghose gha wandu wa Israeli wikajoka hata Betheli na kulila. Wikasea kidombo imbiri ya BWANA na kufunga tumu hata luma lwa kenyi; wikamfunyira BWANA vizongona vekora na vizongona va mapatano.

²⁷Wandu wa Israeli wikamkotia BWANA (angu Sanduku ya Ilaghano ja Mlungu erekoghe ikikaia aho matuku agho;

²⁸na Finehasi mwana wa Eleazari, wawae Haruni nuo orekoghe ukiidumikia matuku agho,) wikighamba, “Dijoke sena kulwa na wanidu Wabenjamini angu dileke?” BWANA ukaghamba, “Jokenyi angu kesho nichawifunya mikonunyi konyu.”

²⁹Niko Waisraeli wikavisa masikari ghamu kuimara Gibea.

³⁰Wandu wa Israeli wikawijokia Wabenjamini indo ja kadadu, wikapanga masikari ghawo sa iji koni werekoghe wikibonya ngelo rose.

³¹Wabenjamini wikafuma kulwa na awo wandu, nawo wikafuma na kughenda kula na muzi; wikazoya kuwikaba na kuwibwagha wandu wamu wa Waisraeli a chienyi mbaa sa ngelo zima; chia imu ijokagha cha Betheli, na imu ighendagha cha Gibea, na ambuwenyi; wikabwagha sa wandu mirongo idadu wa Israeli.

³²Wabenjamini wikaghamba, “Dawisima sa iji koni derewisimieghe imbiri.” Ela wandu wa Israeli wikaghamba, “Nndokonyi dikimbie, wipate kufuma kula na muzi, na kudinugha noko hata chienyi mbaa.”

³³Wandu wa Israeli wose wikawuka andu kwawo na kukupanga aho Baal-tamari, na waja wandu wa Israeli werekuvisireghe wikafuma andu kwawo magharibi ya Geba.

³⁴Na wandu wa Israeli elfu ikumi wisaghulo aghadi ya wandu wose wa Israeli, wikafuma kwa wuda; nagho ghukakaia wuda ghubirie. Ela Wabenjamini ndeweremanyireghe wei wachelwa ni mashaka.

³⁵BWANA ukawisima Wabenjamini, imbiri ya wandu wa Israeli; na wandu wa Israeli wikabwagha wandu wa Benjamini elfu mirongo iwi na isanu na ighana jimweri, wandu werekoghe masikari gha lufu.

³⁶Niko huwo Wabenjamini wikawona angu wameria kusimwa. Wandu wa Israeli werewikimbirieghe Wabenjamini kwa kukaia werekoghe wikiwisuwiria waja wandu werekuvisireghe waimara Gibea.

³⁷Na awo wandu werekuvisireghe wikabonya shwa-shwa kungia Gibea, wikaghukaba ugho muzi kwa lufu.

³⁸Idana alama erewikiloghe aghadi ya Waisraeli na waja wandu werekuvisireghe erekoghe huwu: iji wawona mosi m'baa ghukijoka aighu ya ugho muzi,

³⁹niko wandu wa Israeli wichaaghaluka na kungia wudenyi. Wabenjamini werekoghe wawoka kuwibwagha Waisraeli, wikabwagha wandu mirongo idadu; wikaghamba, “Kwa loli dawibwagha sa iji koni derewibwaghieghe imbiri.”

⁴⁰Ela iji alama ya mosi yazoya kuwoneka andenyi ya muzi, Wabenjamini wikazighana na nyuma wikawona muzi ghose ghukihia na mosi ghukijoka nokoighu.

⁴¹Niko wandu wa Israeli wikawighalukia, na Wabenjamini wikafwa ngolo; kwa kukaia werewonieghe angu wachelwa ni mashaka.

⁴²Kwa huwo wikaghaluka na kuwikimbia Waisraeli cha kireti, na wuda ghukabia aighu yawo, na waja wandu werefumieghe mzinyi wikawitotesha wiko ghadi na ghadi yawo.

⁴³Waisraeli wimeria kuwimara, wikawiwinga wamaiza kufuma Noha hata wikavika kulangaya cha mashariki ya Gibea wikichuria kuwibwagha.

⁴⁴Wandu wa Benjamini elfu ikumi na wunyanya, awo werekoghe mang'oni gha wuda, wikafwa.

⁴⁵Wikaghaluka na kukimbia cha kireti hata Igho ja Rimoni, wandu elfu isanu wikabwaghilwa chienyi; wikachuria kuwingwa hata Gidomu na aho wikabwaghwa wandu elfu iwi.

⁴⁶Kwa huwo mtalo ghwa wandu wose werebwaghiloghe ituku jija ghorekoghe wandu wa Benjamini elfu mirongo iwi na isanu, masikari gha lufu wose wiko mang'oni gha wuda.

⁴⁷Ela wandu maghana arandadu wikaghaluka na kukimbia cha kireti hata Igho ja Rimoni, wikakaia aho kwa meri ina.

⁴⁸Na wandu wa Israeli wikaghaluka wikilwa na Wabenjamini wisigharikie, wikawibwagha wose na nyamandu, na vose werevikueghe. Wikaikora mizi yose wereiwonieghe.