Read TAITA BIBLE – Biblia Ilagho Jiboie Kwa Wandu Wose WATANYI 4 Bible Online

WATANYI 4 - TAITA BIBLE – Biblia Ilagho Jiboie Kwa Wandu Wose bible

WATANYI 4

¹Nyuma ya kifwa cha Ehudi, wandu wa Israeli wikam'bonyera BWANA kaung'a sena.

²BWANA ukawisigha wisimo ni Jabini mzuri wa Kanaani, uo orekoghe ukibonya nguma muzi ghwa Hazori. M'baa wa majeshi ghake orewangwagha Sisera, uo orekoghe ukikaia Haroshethi ya wandu wa mbari zima.

³Jabini orekoghe na magare gha chuma maghana ikenda, nao ukawibonyera nguma wandu wa Israeli kwa kinyanya na lung'eto kwa miaka mirongo iwi. Wandu wa Israeli wikamlilia BWANA upate kuwitesia.

⁴Mlodi wa waka Debora, muka wa Lapidothi, orekoghe ukiwitanya Israeli matuku ghaja.

⁵Orekoghe ukisea kidombo aisi ya mtende ghwake ghadi na ghadi ya Rama na Betheli andenyi ya isanga ja mghondinyi ja Efraimu; na wandu wa Israeli wikakaia wikicha upate kuwitanya.

⁶Ituku jimu ukaduma momu kwa Baraka mwana wa Abinoamu kufuma Kedeshi isanga ja Naftali, ukamzera, “BWANA, uo Mlungu wa Israeli wakulaghira huwu, ‘Ghenda kuwikwanye wandu wako mghondi ghwa Tabori, kuwuse wandu elfu ikumi kufuma kwa mbari ya Naftali na Zebluni.

⁷Nani nichamreda Sisera, m'baa wa majeshi gha Jabini, chiaimweri na majeshi ghake, na magare ghake, upate kulwa na oho modenyi ghwa Kishoni; nani nichamfunya mikonunyi kwako kupate kumsima.’”

⁸Niko Baraka ukatumbulia, “Neko tayari kughenda ikakaia dichaaghendanya ela ngera oho kuseghendanyagha nani, na ini wori sichaaghenda.”

⁹Niko Debora ukamzera, “Narumiria kughendanya na oho, ela ima ndekuchaapata kukaswa kungi andenyi ya ughu wusimi, kwa kukaia BWANA uchamfunya Sisera kwa muka.” Debora ukawuka ukaghendanya na Baraka cha Kedeshi.

¹⁰Baraka ukawikwanya wandu elfu ikumi wa Zebluni na Naftali wikamnugha cha Kedeshi; Debora ukaghendanya nao.

¹¹Idana Heberi Mkeni, orekutengieghe moni na Wakeni wambao, awo wana wa Hobabu, mghosi wake Musa; nao orekoghe waidunga hema yake kula aho mualoninyi ghuko Zaananimu kaavui na Kedeshi.

¹²Nao iji Sisera waghorelwa kukaia Baraka mwana wa Abinoamu wajoka mghondi ghwa Tabori,

¹³ukafunya magare ghake gha chuma maghana ikenda, na wandu wake wose orekwanyeghe nawo, kufuma Haroshethi ya wandu wa mbari zima, hata Moda ghwa Kishoni.

¹⁴Debora ukamzera Baraka, “Wuka kwende! Angu idime nijo ituku BWANA wamngira Sisera mkonunyi kwako. BWANA wawuyakiria imbiri kwako.” Niko Baraka ukasea kufuma Mghondi ghwa Tabori andwamweri na wandu weremnughieghe elfu ikumi.

¹⁵BWANA ukamsumbua Sisera chiaimweri na magare ghake na ijeshi jake imbiri ya Baraka. Sisera ukarama kufuma igarenyi kwake, ukakimbia na maghu.

¹⁶Baraka ukanugha agho magare na ijo ijeshi hata Haroshethi ya wandu wa mbari zima. Ijeshi jose ja Sisera jikabwaghwa kwa lufu, hata nderesigharikieghe mndungi.

¹⁷Ela Sisera ukakimbia na maghu hata hemenyi kwa Jaeli mkake Heberi, Mkeni, angu korekoghe na sere aghadi ya Jabini mzuri wa Hazori na nyumba ya Heberi, Mkeni.

¹⁸Nao Jaeli ukafuma kummara Sisera ukamzera, “Ghaluka kungie aha bwana wapo, ngia hemenyi kwapo kusakeobua.” Niko ukaghaluka na kungia hemenyi. Nao ukamfinikira nguwo.

¹⁹Nao ukamzera, “Naoma; nakulomba kunineke machi ninyo.” Niko ukafundua kiriba cha mariwa ukamnyosha, ukamfinikira sena.

²⁰Niko ukamzera, “Kaia mnyangonyi; na mndungi ukakotia ngera kwawona mndungi kumzere ndekummbonie.”

²¹Sisera orekoghe wasilwa na ndighi, nao ukawadwa ni dilo nyingi. Niko Jaeli ukawada nyondo na kikosi cha hema, ukamghendia mboa mboa na kumkabiria chija kikosi chamunyi kwake, chikangia hata chikafuma nanyuma ya chongo; nao Sisera ukafwa.

²²Nao iji Baraka orebusireghe ukimmbinga Sisera, Jaeli ukafuma kummara ukamzera, “Choo nikuwonyere uo mundu kwawuyamlola.” Nao ukangia chiaimweri nao ukammbona Sisera andonyi wameria kufwa, na kikosi cha hema chameria kukabirilwa chamunyi kwake.

²³Ituku ijo BWANA ukawineka Waisraeli wusimi aighu ya Jabini mzuri wa Kanaani.

²⁴Wandu wa Israeli wikachuria kukaia na ndighi aighu yake hata wikamnona putu Jabini uo mzuri wa Kaanani.