Read TAITA BIBLE – Biblia Ilagho Jiboie Kwa Wandu Wose WATANYI 5 Bible Online

WATANYI 5 - TAITA BIBLE – Biblia Ilagho Jiboie Kwa Wandu Wose bible

WATANYI 5

¹Niko ituku ijo Debora na Baraka mwana wa Abinoamu wikabora:

²“BWANA ndekaso! Kwa kukaia vilongozi werewadieghe wulongozi, na wandu wikakufunya weni kwa ngolo andenyi ya Israeli.

³“Sikirenyi inyo wazuri, deghenyi madu inyo wana wa wazuri; nicham'boria BWANA, uo Mlungu wa Israeli.

⁴“BWANA, iji oho korefumieghe Seiri, iji oho koreghendieghe kufuma isanga ja Edomu; ndoe ikasughusika, na mlungunyi kukanya, ee, mawingu ghikanya vua.

⁵Mighondi ikasughusika imbiri ya BWANA, oho Sinai koresughusikieghe imbiri ya BWANA, uo Mlungu wa Israeli.

⁶“Matuku gha Shamgari mwana wa Anathi, matuku gha Jaeli, wandu weresighieghe kuidia chia mbaa, wadambi wikamaria mbai na mbai ya chia.

⁷Wandu werenyameghe andenyi ya Israeli, hata iji kwawuka, Debora sa mao andenyi ya Israeli.

⁸Iji Waisraeli wereisaghueghe milungu ya kighenyi, na wuda ghukacha hata mbengenyi; mwawonie mndungi wawada ngao angu ifumu aghadi ya wandu elfu mirongo ina wa Israeli?

⁹Ngolo yapo ekwanye na wabaa wa wuda wa Israeli, awo werekufunyireghe weni kwa ngolo aghadi ya wandu; BWANA ndekaso!

¹⁰“Ghorenyi malagho gharo inyo wajoki weke punda wa chokwa, inyo mseriagha mito ighokie; na inyo mghendagha kwa maghu chienyi.

¹¹Sikirenyi chwaka ra wabori viriwenyi, wikiwunjiriana malagho gha ugho wusimi ghwa BWANA; ugho wusimi ghwa wandu wake andenyi ya Israeli. “Niko wandu wa BWANA wikasea cha mbengenyi kwawo.

¹²“Wuka Debora, wuka! Wuka kubore lumbo! Wuka Baraka, kuwido awo wandu wako wunyika, ee mwana wa Abinoamu.

¹³Niko masighariko gha wandu wa ishima wikasea, wandu wa BWANA wikasea kwake wiko tayari kwa wuda.

¹⁴Werefumieghe Efraimu, wikasea vololonyi; wikikunugha oho Benjamini na wandu wako. Wabaa wa wuda wereserieghe kufuma Makiri, na wabaa wikasea kufuma Zebluni; awo wighudwagha mzata ghwa m'baa.

¹⁵Wabaa wa Isakari wikasea andwamweri na Debora, ee, Isakari ukacha andwamweri na Baraka; wikimnugha hata vololonyi. Kichuku cha Reubeni, cherekoghe na maghesho awi-awi ngolonyi kwawo.

¹⁶Kwaki oho koresigharikagha nanyuma aghadi ya ng'ondi, kukisikiria walisha wikifugha mori? Aghadi ya kichuku cha Reubeni, korekoghe na maghesho awi-awi ngolonyi kwawo.

¹⁷Kichuku cha Gadi, cherekaieghe kimonu cha Jordani; na oho Dani, kwaki koresigharikieghe melinyi? Kichuku cha Asheri, cheresigharikieghe kidombo pwani, chikakaia ahoeni pwani.

¹⁸Ela wandu wa Zebluni na Naftali, werewikieghe marangi ghawo ndengonyi efwa aho wudenyi.

¹⁹“Wazuri wikacha wikalwa, wazuri wa Kanaani wikalwa, aho Taanaki kamoda ka Megido; ndewerepatireghe feza redwa.

²⁰Nyerinyeri ra mlungunyi rikabonya wuda, kwa mighendo yawo wikalwa na Sisera.

²¹Machi mengi gha Kishoni gherewidwaeghe noko, agho machi mengi gha Moda ghwa Kishoni, ghiseagha shwa-shwa. Ghenda imbiri kwa ndighi ee roho yapo!

²²“Niko farasi rikacha rikirama-rama, rikifasha ndoe na kochokocho rawo.

²³“Wasirenyi muzi ghwa Mezori njowe, waghamba malaika wa BWANA; wiwasirenyi njowe na ndighi wandu waro. Angu ndewerechieghe kumtesia BWANA, sa masikari ndewerechieghe, kulwa kwa wundu ghwake.

²⁴“Muka urasimilwagha kuchumba ni Jaeli, uo muka wa Heberi, Mkeni; nderasimilo uo muka, ukaiagha aghadi ya waka wiko hemenyi.

²⁵Sisera orelombieghe machi, ukamneka mariwa; ukamredia kikowio cha mariwa na bakuli ya ishima.

²⁶Orewadieghe kikosi cha hema na mkonu ghwake, mkonu ghwake ghwa kiwomi ghukawada nyondo mbaa ya fundi. Ukamkabiria Sisera chamunyi kwake, na kuturua chongo chake.

²⁷Ukaturukia, ukaghwa, ukazimia maghunyi kwake; ukatima kuwuka kwa maghu ghake, ukaghwa; na andu oreghueghe, ukafuya ahoeni.

²⁸“Mae Sisera ukazighanira idirishenyi, ukazighanira idirishenyi ja chekecheke ukighamba, ‘Kwaki igare jake jamuka huwu? Kwaki tiri ra farasi risesikirikagha, na magare ghake ghisechagha?’

²⁹Wai wake wa hikima mbaa wikamtumbulia, hata, sena hoyu uakutumbulia moni.

³⁰‘Kewada ndawadawagha mali waiwada; mwai umweri angu wawi kwa mundu umweri, nguwo ra rangi riwadilo kwa wundu ghwa Sisera, nguwo ra rangi ritolelo riwadilo, vipande viwi va nguwo ra rangi vitolelo, viwadilo kwa wundu ghwa singo ya malkia?’

³¹“Huwo koni wamaiza wako ndewitote ee BWANA! Ela waghenyi wako ndewing'ale-ng'ale karakara na iruwa jibukagha kwa ndighi rake.” Nao isanga jikakaia na sere kwa miaka mirongo ina.