Read TAITA BIBLE – Biblia Ilagho Jiboie Kwa Wandu Wose WATANYI 7 Bible Online

WATANYI 7 - TAITA BIBLE – Biblia Ilagho Jiboie Kwa Wandu Wose bible

WATANYI 7

¹Niko Jerubaali (nuo moni Gideoni) na wandu wake wose orekwanyeghe nawo, wikawuka kokio na kubonya kambi mbai na mbai ya Ndoria ya Harodi; Kambi ya Wamidiani erekoghe cha kaskazinyi yawo, kaavui na Mghondi ghwa More, andenyi vololonyi.

²BWANA ukamzera Gideoni, “Awandu kukwanye nawo weeka wengi kwa ini kuwifunya Wamidiani mikonunyi kwawo; Waisraeli wisechekujosa weni aighu yapo na kughamba wei mkonu ghwawo ghoni ghwawiredia kukia.

³Kwa huwo ghoria wandu huwu, ‘Uo ose uko na wowa, wawuyasughusika, ndewuye cha muzinyi.’” Nao Gideoni ukawitima, na wandu elfu mirongo iwi na iwi wikawuya cha mzinyi, wikasigharika wandu elfu ikumi.

⁴BWANA ukamzera Gideoni, “Awandu waduagha wengi, wighenje cha modenyi nipate kuwitima kwa wundu ghwako; uo ose nichaakuzera, kughendanye nao, mchaaghendanya; na uo ose nichaakuzera, mseghendanye, kuchamsigha.”

⁵Niko Gideoni ukawisera wandu modenyi, na BWANA ukamzera, “Kula mundu uchaanywa machi kwa kughileta na lumi sa koshi, kummbike mbai; na uo udungagha ngokoro ima unyo, kummbike mbai wokoni.”

⁶Mtalo ghwa waja werenyueghe machi kwa kughileta wikighidaya kwa mkonu werekoghe wandu maghana adadu; ela wazima wose weredungieghe ngokora kunywa machi.

⁷BWANA ukamzera Gideoni, “Kwa awo wandu maghana adadu werenyueghe machi kwa kughileta, nichakukira; na kuwingira Wamidiani mkonunyi kwako, ela wazima wose kuwisighe wighale.”

⁸Niko Gideoni ukawighalisha Waisraeli wose cha hemenyi kwawo, ukasighwanya na waja wandu maghana adadu, awo weredwaeghe vilambo vose na tarumbeta. Kambi ya Wamidiani erekoghe na isi yawo andenyi vololonyi.

⁹Kio chija cheni BWANA ukamzera Gideoni, “Wuka kusee kuingirie ija kambi angu nakuneka wusimi aighu yaro.

¹⁰Ela ikakaia kwaawuyaobua kuingiria, kuseanye na mdumiki wako Pura;

¹¹nao kuchasikira agho wighoragha. Niko aho kuchapata ndighi rewingiria.” Niko Gideoni na mdumiki wake Pura wikasea na kukaia kutuonyi kwa kambi ya wamaiza wawo.

¹²Wamidiani, Waamaleki, na wandu wose wa Mashariki werekoghe wachua vololonyi sa zighe kwa wungi ghwawo; na ngamila rawo rerekoghe nyingi risetalikagha, nyingi sa masangagha ghwa pwani kwa wungi ghwaro.

¹³Ngelo Gideoni orechieghe, mndumu orekoghe ukimghoria mmbao malagho gha ndodo yake ukighamba, “Nalodere ndodo wei mkate ghwa shairi ghwapotoka kambinyi ya Wamidiani, ghukang'ara na kuikaba hema hata ikaghwa andonyi.”

¹⁴Nao mmbao ukatumbulia, “Kwa loli ulu ni lufu lwa uja Muisraeli Gideoni mwana wa Joashi, Mlungu wawingira Wamidiani na majeshi ghose mkonunyi kwake.”

¹⁵Nao iji Gideoni wasikira malagho gha iyo ndodo na kutambua kwaro, ukatasa, na kuwuya kambinyi ya Waisraeli, na kughamba, “Wukenyi, angu BWANA wangira majeshi gha Wamidiani mikonunyi konyu.”

¹⁶Ukawiwagha waja wandu maghana adadu mafungu adadu; ukawineka wose tarumbeta, chiaimweri na mitungi miduu iko na vilele andenyi.

¹⁷Nao ukawizera, “Nizighanenyi ini, m'bonye sa iji koni nawuyabonya; ngavika kutuonyi kwa kambi, moobonya sa iji koni nibonyagha.

¹⁸Ngakaba tarumbeta chiaimweri na awo wandu dikwanye, niko nenyo wori mchakaba tarumbeta chia rose kambinyi kose, na kughora kwa chwaka mbaa, ‘Ni kwa wundu ghwa BWANA na kwa wundu ghwa Gideoni!’”

¹⁹Niko Gideoni na awo wandu ighana orekwanyeghe nawo, wikacha mpakenyi ghwa kambi kio ghadi nyuma ya kubadilishwa kwa ilindiri ja imbiri; nao wikakaba tarumbeta na kubara ija mitungi erekoghe mikonunyi kwawo.

²⁰Niko na ghaja mafungu awi wikakaba tarumbeta na kubara ija mitungi yawo, wikiwadia vilele na mkonu ghwa kiwaka na tarumbeta na mkonu ghwa kiwomi, nawo wikaghora kwa chwaka mbaa, “Lufu kwa wundu ghwa BWANA na kwa wundu ghwa Gideoni!”

²¹Kula mundu ukakaia kimusi aeni orekoghe kuimara kambi, na majeshi ghose gha wamaiza ghikakimbia ghikikema.

²²Hata iji wandu wa Gideoni werekabieghe iro tarumbeta maghana adadu, BWANA ukabonya majeshi gha wamaiza widemane weni na weni. Agho majeshi ghikakimbia hata Beth-shita kulangaya cha Serera hata mpaka ghwa Abel-mehola kaavui na Tabathi.

²³Wandu wa Israeli wikawangwa kufuma Naftali, Asheri na Manase yose, wikawinugha Wamidiani.

²⁴Nao Gideoni ukaduma wandu cha isanga jose ja mighondi ya Efraimu ukighamba, “Seenyi mulo na Wamidiani, mpate kuwada Moda ghwa Jordani na iyo meda mitini hata Beth-bara, diwighirie Wamidiani wisepate kuruwuka.” Niko huwo wandu wose wa Efraimu wikawangwa, nawo wikawada Moda ghwa Jordani na iyo meda mitini hata Bath-bara.

²⁵Wikawiwada wabaa wawi wa Midiani, Orebu na Zeebu; wikam'bwaghia Orebu aja lwalenyi lwa Orebu na Zeebu wikam'baghia aja kidunyi chekamia zabibu cha Zebu wikiwinga Wamidiani; wikamredia Gideoni vongo va Orebu na Zeebu, kimonu cha Jordani.