Read TAITA BIBLE – Biblia Ilagho Jiboie Kwa Wandu Wose JUDA 1 Bible Online

JUDA 1 - TAITA BIBLE – Biblia Ilagho Jiboie Kwa Wandu Wose bible

JUDA 1

¹Ini Juda mdumiki wa Jesu Kristo mruna Jakobo, nawiandikia awo wandu wiwangilo, wikundo ni Mlungu uja Aba, na kulindilwa kwa wundu ghwa Jesu Kristo.

²Wughoma, na sere, na lukundo, ndevichurikie konyu.

³Wakundwa, ngikaia na bea mbaa emuandikia malagho aighu ya kukia kodu isi diwose, nerewonieghe ni suti niandike, ngimlomba angu mujidederie ijo irumirio werenekeloghe awo waeli indo jimweri tua.

⁴Angu weko wandu wamu wikungirie kwa kiviso, nawo ni wandu werewikiloghe kokala kwa wundu ghwa kutanywa uku; wandu wisene kuobua kwa Mlungu, awo wighughaluagha ugho mvono ghwa Mlungu odu kukaia wuwiwi, na kumkana uo uko Mzuri ueka, na Bwana odu Jesu Kristo.

⁵Idana nakunde nimkumbuse, hata ngera mwamerie kughorelwa malagho ghose kufuma imbiri; kukaia, Mlungu uendawikira wandu isanga ja Misri, konyuma orewitoteshereghe awo wereleghieghe kurumiria.

⁶Na awo weke malaika wisererilindirieghe nguma rawo, ela werefumieghe andu werekoghe wikikaia, Mlungu orewifungieghe na minyororo ya kala na kala na kuwiwika andu kwa kira hata Ituku ibaa ja kutanywa.

⁷Ni seji koni Sodoma na Gomora, na mizi erekoghe mbai mbai yaro, iyo wandu waro werekoghe wikibonya mawiwi kwa kulaka na bea riseko ra asili, yakaia mfwano kwa kupata adhabu ya modo ghwa kala na kala.

⁸Kwa chia iyo cheni, wandu awa kwa kunugha ndodo rawo waghulusha mumbi, nawo walegha kubonyerwa nguma, na kughidukana mawubaa.

⁹Ela uo malaika m'baa Mikaeli, iji orekoghe ukisimana na Ibilisi, kwa kubonya nganyi aighu ya mumbi ghwa Musa, nderedimieghe kumtanya kwa madedo ghangi gha kudukana anduangi; ela ukaghamba, “Bwana ndekukemie.”

¹⁰Ela awa wandu wadashola kwa ijo jose jisewitambukiagha, nawo kwa maza ireni wiriichi kwa tabia ya asili, sa nyamandu risewadie akili, wakunona weni.

¹¹Ni bugha kwawo! Angu wadanugha iyo chia Kaini oreinughieghe, na kwa wundu ghwa fwaida, wakulekera weni winughe ikosa ja Balaamu, na kutota seji Kora oreleghieghe, ukatota.

¹²Wandu awa weeka sa maboli gha wuchafu andenyi ya karamu renyu ra lukundo, wikijanya nenyo wisene waya, na kukukunda weni. Weeka sa mawingu ghisewadie machi, ghidukwaa-dukwa ni mbeo; ni sa midi isewadie matunda ngelo ya kimu cha matunda, iko seji eekulwa na kufwa putu.

¹³Wafwanana na mivo-mivo ya bahari iwadie ndighi, na mabonyo ghawo gha waya ghawoneka sa ifuo jaro jidikagha; wakaia sa nyerinyeri rimaraa-mara, nawo wawikilo kira kibaa cha kala na kala.

¹⁴Na Enoko, mundu wa kivalwa cha mfungade nyuma ya Adamu, orefunyireghe wulodi aighu ya wandu awa ukighamba, “Olenyi Bwana waawuyacha andwamweri na maelfu gha waeli wake,

¹⁵kuwitanya wandu wose, na kuwiwonyera mabonyo ghawo ghose ghiseko na kuobua kwa Mlungu, agho wibonyere kwa iyo chia iseko na kuobua kwa Mlungu; na kwa wundu ghwa maza rose rizamie awo wakaung'a wisewadie kuobua kwa Mlungu wiridedie aighu ya Mlungu.”

¹⁶Wandu awa ni wezughunuka, ndewikatwagha, winughagha bea rawo reni, widedagha malagho mabaa gha kukukasa, na kusesea-sesea wandu, wikupatire weni fwaida.

¹⁷Ela wakundwa, yamfwana mkumbuke malagho ghereghoreloghe kiimbiri ni wadumi wa Bwana odu Jesu Kristo.

¹⁸Weremghorieghe huwu, “Ngelo ya kutua mbai, kuchakaia na wandu wisekagha, winughagha bea rawo reni risewadie kuobua kwa Mlungu.”

¹⁹Awo niwo wandu wiredagha mwawaghanyiko, wandu wa wurumwengu wisemmbwadie uo Roho.

²⁰Ela inyo wakundwa, mkuaghe mmbeni aighu ya irumirio jenyu jielie kuchumba, mlombe kwa Roho Mweli;

²¹mkuwike mmbeni andenyi ya ulo lukundo lwa Mlungu; mmbeserie wughoma ghwa Bwana odu Jesu Kristo, upate kumneka irangi ja kala na kala.

²²Awo wiko na ngera muwiwonie wughoma,

²³na wamu muwikire kwa kuwikuna kufuma modonyi; na wamu muwiwonie wughoma mkiobua; mkizamilwa hata ni nguwo ilushiro ni mumbi.

²⁴Idana kwa uo udimagha kumlindia inyo msegho, na kumreda inyo imbiri ya ugho wubaa ghwake, msewadie ikosa jingi kwa kuboilwa;

²⁵kwa uo Mlungu uekeri, Mkiri odu kwa chia ya Jesu Kristo Bwana odu, ndeghukaie wubaa, na wuzuri, na kubonya nguma, na kudima, imbiri ya ngelo rose, idana, hata kwa kala na kala. Amen.