Read TAITA BIBLE – Biblia Ilagho Jiboie Kwa Wandu Wose WUFUNUO 10 Bible Online

WUFUNUO 10 - TAITA BIBLE – Biblia Ilagho Jiboie Kwa Wandu Wose bible

WUFUNUO 10

¹Niko nerewonieghe malaika mzima uwadie ndighi ukisea kufuma mlungunyi, urwae iwingu, na lusenge lwa vua chongonyi kwake; wushu ghwake ghorekoghe sa iruwa, na maghu ghake gherekoghe sa nguro ra modo.

²Nao orekoghe na chuo kitini chikuchulo mkonunyi kwake. Kughu kwake kwa kiwomi, korewadirieghe bahari, na uko kwa kiwaka korewadirieghe ndoe iomie;

³ukawanga kwa lwaka lubaa sa shimba irurumagha. Nao iji wawanga, iro chukuwa mfungade rikadeda,

⁴hata iji iro chukuwa mfungade rerededieghe, ngakunda kuandika; ela neresikireghe lwaka kufuma mlungunyi lukighamna, “Agho malagho gha chukuwa radeda, ni ngasu; kusakeghiandika.”

⁵Na uo malaika neremmbonieghe uko kimusi baharinyi na ndoe iomie, ukawusira mkonu ghwake ghwa kiwomi cha mlungunyi;

⁶ukaghema kwa Mlungu ukaiagha moyo kwa kala na kala, uo oreumbieghe mlungunyi na vose viko andenyi yaro, ndoenyi na vose viko andenyi yaro, na bahari na vose viko andenyi yaro; kukaia, ndekuwuyakaia kuchelewa kungi sena.

⁷Ela iji malaika wa mfungade uchaaikaba tarumbeta yake, iyo ngasu ya Mlungu oreighorieghe ukitumia wadumiki wake, awo walodi, ichakatishwa.

⁸Niko ulo lwaka nerelusikireghe lukideda kufuma mlungunyi, lukadeda nani lukinizera sena, “Ghenda kuchiwade chija chuo kitini chiko mkonunyi kwa malaika, uo wawuyakaia kimusi baharinyi na ndoe iomie.”

⁹Nao ngaghenda kwa uo malaika, na kumzera unineke icho chuo kitini. Nao ukanizera, “Chiwade kuchije; nacho chichakuwawia kifunyi kwako, ela momunyi kwako chichasinga sa wuki.”

¹⁰Ngachiwada chija chuo kitini kufuma mkonunyi kwa uo malaika, ngachija, nacho cherekoghe chisingie sa wuki momunyi kwapo, ela niendameria kuchija chikawawa kifunyi kwapo.

¹¹Nani ngazerwa, “Yakufwana kuchile ilagho ja Mlungu sena aighu ya wandu wengi, na mbari, na viteto, na wazuri.”