Read TAITA BIBLE – Biblia Ilagho Jiboie Kwa Wandu Wose WUFUNUO 13 Bible Online

WUFUNUO 13 - TAITA BIBLE – Biblia Ilagho Jiboie Kwa Wandu Wose bible

WUFUNUO 13

¹Nao ngawona nyamandu ikijoka kufuma baharinyi, iko na mbembe ikumi na vongo mfungade; iro mbembe rake rerekoghe na virumbu ikumi, na irina ja masholio aighu ya vongo vake.

²Iyo nyamandu nereiwonieghe, erekoghe sa inge, maghu ghake gherekoghe sa gha kibarabara, na momu ghwake ghorekoghe sa ghwa shimba; iyo choka ikaineka iyo nyamandu ndighi rake, kifumbi chake cha nguma, na nguma mbaa.

³Chongo chimu cha iyo nyamandu cherekoghe chikiwoneka seji cheebarwa lughuma, ela chonda chake chikaona; na wandu wose wa ndoenyi wikainugha iyo nyamandu wikishinika.

⁴Wandu wikaitasa iyo choka, angu ereinekieghe nguma iyo nyamandu; nawo wikaitasa iyo nyamandu wikighamba, “Nani ufwanane na iyo nyamandu, na nani udimagha kulwa nayo?”

⁵Na iyo nyamandu erenekeloghe kughora malagho gha masholio kwa lung'eto, ikanekwa meri mirongo ina na iwi ebonya nguma.

⁶Ikazoya kudeda malagho ghemsholia Mlungu, ikijisholia irina jake, na andu ukaiagha, na awo wikaiagha mlungunyi.

⁷Wokoni ikarumirilwa kubonya wuda na waeli, na kuwisima; ikanekwa nguma aighu ya kula kichuku, na wandu, na kiteto na mbari.

⁸Na wandu wose wikaiagha ndoenyi wichaitasa; awo, imbiri wurumwengu ghuseumbilo, marina ghawo ghisereandikiloghe andenyi ya chuo cha irangi cha Mwana wa Ng'ondi uo orebwaghiloghe.

⁹Mndungi ukakaia na kudu ndesikirie:

¹⁰Ikakaia mndungi wawikilo udwalo wunyika, uchadwalwa wunyika ngera mndungi wabwagha kwa lufu, uchabwaghwa kwa lufu. Aha niko jikundikie irumaghio na irumirio ja waeli.

¹¹Niko ngawona nyamandu zima sena ikijoka kufuma ndoenyi; nayo erekoghe na mbembe iwi sa mwana wa ng'ondi, na kudeda sa choka.

¹²Nayo ikatumia nguma rose ra iyo nyamandu ya imbiri mesonyi kwake; na kuwibonya wandu wose wikaiagha ndoenyi wiitase iyo nyamandu ya imbiri erekoghe seji eebarwa lughuma na chonda chake chikaona.

¹³Na iyo nyamandu ya kawi yabonya weke mwakilimbiti wabaa, hata kubonya modo ghusee andoenyi kufuma mlungunyi imbiri ya wandu.

¹⁴Nayo yawikalia wandu wose wikaiagha ndoenyi kwa awo weke mwakilimbiti ererumiriloghe kuwibonya imbiri ya iyo nyamandu; ikiwilaghira angu wibonye fwana etaswa, kwa ishima ja iyo nyamandu ya imbiri ereshoghonologhe kwa lufu, na kukaia moyo sena.

¹⁵Ikarumirilwa iifurie miruke iyo fwana etaswa ya iyo nyamandu, eri idime kudeda, na kuwibonya awo wandu wileghagha kuitasa iyo fwana wibwagho.

¹⁶Wokoni yawibonya wandu wose, watini na wabaa, wiwadie mali na wakiwa, wakitina na wazumba, wibonyo alama mkonunyi ghwa kiwomi angu chamunyi;

¹⁷eri mndungi useghuo hata kuuza usewadie iyo alama; na alama iyo ni irina jake iyo nyamandu, angu mtalo ghwa irina jake.

¹⁸Aha yakundikie hikima: uo udimagha kutambukilwa, ndebonye mtalo ghwa iyo nyamandu, angu ni mtalo ghwa mundu; na mtalo ghwaro ni maghana arandadu mirongo irandadu na irandadu.