Read TAITA BIBLE – Biblia Ilagho Jiboie Kwa Wandu Wose WUFUNUO 17 Bible Online

WUFUNUO 17 - TAITA BIBLE – Biblia Ilagho Jiboie Kwa Wandu Wose bible

WUFUNUO 17

¹Nao umu wa waja weke malaika werekoghe na bakuli mfungade ukanichea na kunizera, “Choo nikuwonyere seji jija ilaya ibaa jitanywagha, ijo jiseagha kidombo aighu ya machi mengi;

²ijo wazuri wa ndoenyi wibonyere wulaki najo, na wandu wa ndoenyi wiwongerie kwa divei ya wulaki ghwake.”

³Niko ukanidwa noko cha kireti, niko andenyi ya Roho; nani ngawona muka uko kidombo aighu ya nyamandu itinikie, ichue marina gha masholio, nayo erekoghe na vongo mfungade, na mbembe ikumi.

⁴Uo muka orekoghe na marwao gha zambarau, na ghamu ghitinikie na kufinikirwa na mapambo gha dhahabu, almasi, na lulu. Orekoghe na kikombe cha dhahabu mkonunyi kwake chichue maza rizamie, na ugho wuchafu ghwa wulaki ghwake.

⁵Na chamunyi kwake, koreandikiloghe irina ja ngasu huwu: “BABULONI M'BAA, MAE WA MALAYA, NA MAZA RIZAMIE RA NDOENYI.”

⁶Nani neremmbonieghe uo muka uwongerelo ni bagha ya waeli, na ya wandu werebwaghiloghe kwa wundu ghwa kumshuhudia Jesu. Hata iji neremmbonieghe, ngashinika na ndighi.

⁷Ela uo malaika ukanizera, “Kushinikiaki? Nichakughoria kutambua kwaro iyo ngasu ya uo muka, na ya iyo nyamandu yawuyamduka iko na vongo mfungade na mbembe ikumi.

⁸Iyo nyamandu kuiwonie erekoghe, ela ndeiduagha; yalighisa kujoka kufuma kinenyi cha abuso, na kughenda kutotenyi. Na awo wandu wiko ndoenyi awa marina ghawo ghiseandikilo andenyi ya chuo cha irangi, kufuma kuzoya kwa wurumwengu, wikashinika kwa kuiwona iyo nyamandu; angu erekoghe, ikasoweka; nayo ikawuya ikawoneka moyo sena.

⁹Aha akili na hikima rakundikie. Ivo vongo mfungade, ni mighondi mfungade yawuyaserelwa kidombo ni uo muka,

¹⁰sena wokoni ni wazuri mfungade. Wazuri wasanu wamerie kughwa, umu waduagha ukibonya nguma, na umu waduagha usechee; iji wacha, uchakaia kwa ngelo ndini eri.

¹¹Na iyo nyamandu erekoghe, nayo ndeiko, ni mzuri wa wunyanya; elaima ni umu wa awo mfungade, nayo iaghenda kutotenyi.

¹²Na iro mbembe ikumi kuriwonie, ni wazuri ikumi wisepatire ndighi rebonya nguma, ela wicharumirilwa kubonya nguma sa wazuri chiaimweri na iyo nyamandu kwa saa imweri.

¹³Awa wazuri wose ikumi, nia yawo ni imweri, nawo waineka iyo nyamandu nguma rawo nandighi rawo.

¹⁴Nawo wichalwa na uo Mwana wa Ng'ondi chiaimweri na awo wikwanye, werewangiloghe wikasaghulwa, nawo ni waloli; na uo Mwana wa Ng'ondi uchawisima, angu uo ni Bwana wa weke bwana na Mzuri wa wazuri.”

¹⁵Uo malaika ukanizera sena, “Agho machi kughiwonie, andu ijo ilaya jiseagha kidombo, ni mazungu gha wandu, na mbari, na viteto.

¹⁶Na iro mbembe ikumi kuriwonie, chiaimweri na iyo nyamandu wichazamilwa ni ijo ilaya, nawo wichajisoka kula kindo, na kujisigha duu; wichaja nyama yake, na kujikora na modo;

¹⁷angu Mlungu oojingira ijo ilagho ja kukaia na nia imweri ngolonyi kwawo, hata wikaineka iyo nyamandu ndighi rawo ra kiwuzuri, eri wipate kughukatisha mpango ghwa Mlungu, hata malagho ghake ghameria kukatishwa.

¹⁸Na uo muka kummbonie, ni ugho muzi m'baa ghuko na nguma ya wazuri wose wa ndoenyi.”