Read TAITA BIBLE – Biblia Ilagho Jiboie Kwa Wandu Wose WUFUNUO 19 Bible Online

WUFUNUO 19 - TAITA BIBLE – Biblia Ilagho Jiboie Kwa Wandu Wose bible

WUFUNUO 19

¹Nyuma ya agha, neresikireghe seji ni izungu ibaa ja wandu widedagha kwa lwaka lubaa mlungunyi jikighamba, “Haleluya! Kukia, na wubaa, na kudima, ni kwa Mlungu odu;

²angu kutanya kwake ni kwa loli na hachi; nao wamerie kujitanya ijo ilaya ibaa jerenonieghe ndoenyi kwa wulaki ghwake, ukalipa ngenga kwa wundu ghwa iyo bagha ya wadumiki wake.”

³Nao wikaghamba sena, “Mlungu ndekaso! Mosi ghwa modo ghukorie ijo ilaya ghwawuyafukia nokoighu kwa kala na kala.”

⁴Na waja waghosi mirongo iwi na bana, na rija nyamandu riko moyo inya rikaghwa kijimijimi na kumtasa Mlungu, uo uko kidombo aighu ya kifumbi cha nguma wikighamba, “Amen, Mlungu ndekaso.”

⁵Lukacha lwaka kufuma kifumbinyi cha nguma lukighamba, “Mkasenyi Mlungu odu inyo wadumiki wake, inyo mmbose mumuobuagha watini na wabaa.”

⁶Niko ngasikira lwaka sa lwa izungu ibaa ja wandu, sa lwa machi mengi, na sa mrurumo m'baa ghwa lukuwa rikighamba kwa lwaka lubaa, “Haleluya! Angu Bwana Mlungu odu Uo Uwadie Ndighi Rose, wabonya nguma.

⁷Ndediboilo na kuzuma, dimneke ugho wubaa, angu harusi ya uo Mwana wa Ng'ondi yameria kuvika, na mkake wakuwika nicha.

⁸Na uo muka orenekeloghe nguwo iboie ya kitani ndicha, ielie, ing'alaa-ng'ala;” (na iyo kitani ndicha ni mabonyo gha hachi gha awo waeli.)

⁹Nao malaika ukanizera, “Andika huwu: Warasimilwa awo wiwangilo karamunyi ya harusi ya Mwana wa Ng'ondi.” Ukachuria kunizera, “Agha ni malagho gha loli gha Mlungu.”

¹⁰Niko ngaghwa kijimijimi maghunyi kwa uo malaika nipate kumtasa; ela uo ukanizera, “Kusakebonya huwo! Ini ne mdumiki sa kumoni, na sa awo wanyinyu wiwadie wushuhuda ghwa Jesu. Mtase Mlungu.” Angu ugho wushuhuda ghwa Jesu, niyo roho ya wulodi.

¹¹Niko nerewonieghe mlungunyi kwarughulwa, ngawona farasi ya chokwa, na uo orejokieghe wawangwa Mloli, na Mhachi, nao wadatanya kwa hachi, na kubonya wuda.

¹²Meso ghake gherekoghe sa lumu lwa modo, urwae virumbu vingi chongonyi kwake; nao oko na irina ijo mndungi usedimagha kujimanya, ela uo moni uekeri.

¹³Orerwaeghe ijoho jikumbilo baghenyi, nao wawangwa Ilagho ja Mlungu.

¹⁴Majeshi gha mlungunyi, ghirwae kitani ndicha ya chokwa choo ghijokagha farasi, ghikamnugha.

¹⁵Momunyi kwake korekoghe kukifuma lufu lukalie, ulo uchaakaba nalo wandu wa iro mbari; uchawibonyera nguma kwa mzata ghwa chuma, nao uchakama andenyi ya chombo chekamia divei ya kubia kwa machu gha Mlungu, Uo Uwadie Ndighi Rose.

¹⁶Oko na irina jiandikilo ijohonyi kwake na barenyi kwake, MZURI WA WAZURI, na BWANA WA WEKE BWANA.

¹⁷Niko ngawona malaika uko kimusi iruwenyi, nao ukawanga nyonyi rose riburukagha mbeonyi kwa lwaka lubaa, “Choonyi mkwanyike chia imweri, muje karamu mbaa ya Mlungu;

¹⁸muje nyama ra wazuri, na ra vilongozi, na ra wandu wiwadie ndighi, na nyama ra farasi, na ra awo wirijokagha, na ra wandu wose wiko huru, na ra wazumba wose, watini na wabaa.”

¹⁹Nani ngawona iyo nyamandu na wazuri wa ndoenyi, chiaimweri na majeshi ghawo, ghakwanyika kubonya wuda na uo ujokagha farasi na majeshi ghake.

²⁰Iyo nyamandu ikawadwa chiaimweri na uja mlodi wa tee, uo orebonyereghe weke mwakilimbiti imbiri ya iyo nyamandu; kwa awo, orewikalieghe awo wandu werepatireghe ija alama ya iyo nyamandu, na awo wereghutasireghe ugho mlimu ghwake. Awa wawi, werekumbiloghe wimoo andenyi ya ndiwa ya modo ghuakagha kwa kibiriti.

²¹Na awo wazima, werebwaghiloghe kwa lufu lwa uo ujokagha farasi, ulo lufu lufumagha momunyi kwake; na iro nyonyi rikaja iro nyama rawo rikaghuda.