Read TAITA BIBLE – Biblia Ilagho Jiboie Kwa Wandu Wose WUFUNUO 2 Bible Online

WUFUNUO 2 - TAITA BIBLE – Biblia Ilagho Jiboie Kwa Wandu Wose bible

WUFUNUO 2

¹“Uo malaika wa ikanisa ja Efeso kumuandikie huwu: ‘Agha ni malagho gha uo uwadiagha nyerinyeri mfungade kwa mkonu ghwake ghwa kiwomi, uselagha aghadi ya vinara va taa va dhahabu mfungade.

²Narimanya kazi rako, na kufunga ndighi kwako, na kurumaghia luma kwako, na seji kusedimagha kurumaghianya na wandu wawiwi; ela kwawitimie awo wandu wikuwangagha weni wadumi, nawo wiseko huwo, kukawiwona kukaia watee.

³Namanya angu kwawuyarumaghia luma kwa wundu ghwapo hata ndekusilwagha ni ndighi.

⁴Ela neko na ilagho na kumoni, kukaia kwamerie kulusigha luja lukundo korekoghe nalo imbiri.

⁵Idana kummbuka ni hao kughue kuhee kupate kubonya iro kazi ra imbiri. Si huwo, kusaahea, nichacha kwako na kuchiinja kinara chako cha taa andu kwaro.

⁶Ela koko na ilagho jimweri, oho kwawuyazamilwa ni kazi ra Wanikolai; iro nani moni rawuyanizamia wori.

⁷Uo uko na kudu, ndesikire agho malagho Roho ughighoriagha agho makanisa. Uo usimagha nichamneka kuja matunda gha mudi ghwa irangi, ugho ghuko andenyi ya mbuwa ya Mlungu.’

⁸“Na malaika wa ikanisa ja Simurna kumuandikie huwu: ‘Agha ni malagho gha uo wa imbiri na wa kutua, uo orefueghe na kukaia moyo sena.

⁹Naghumanya wasi ghwako, na wukiwa ghwako, (ela ko mzuri wa mali) na seji kughorelo kwa wuwiwi ni wandu awo wikuwangagha weni Wayahudi, nawo wiseko Wayahudi wangi; ela ni wandu wa sunagogi ya Shetani.

¹⁰Kusakeobua agho matiriro ghichaakuchea. Olenyi wamu wenyu mwalighisa kungirwa kifungonyi ni Ibilisi, upate kumtima; nenyo mchatirirwa matuku ikumi. Kukaie mloli hata kufwa, nani nichakuneka kirumbu cha irangi.

¹¹Uo uko na kudu, ndesikire agho malagho Roho ughighoriagha agho makanisa. Uo usimagha, ndechaabonywa ilagho jingi ni icho kifwa cha kawi anduangi.’”

¹²“Na malaika wa ikanisa ja Pergamo kumuandikie huwu: ‘Agha ni malagho gha uo uko na lufu lukalie chia rose.

¹³Namanya andu kukaiagha; ni andu kifumbi cha nguma cha Shetani chiko. Oho kwamaziriane nani, hata ndekorejikanieghe irumirio japo hata kwa agho matuku gha Antipa mshahidi wapo na mloli wapo; uo orebwaghiloghe aghadi konyu, andu Shetani ukaiagha.

¹⁴Ela neko na malagho matini aighu yako: kokwanye na wandu wamu aho wawuyanugha mafundisho gha Balaamu uo oremfundishireghe Balaki kuwikuwara wandu wa Israeli, eri wipate kuja vindo vifunyiro kizongona kwa milimu, na kukuzaisira kulaka.

¹⁵Huwo koni kokwanye na wandu wamu winughagha mafundisho gha Wanikolai.

¹⁶Idana kuhee. Si huwo, nichacha kulwa nawo kwa lufu lwa momunyi kwapo.

¹⁷Uo uko na kudu, ndesikire agho malagho Roho ughighoriagha agho makanisa. Uo usimagha, nichamneka imu ya mana ivisiro, na kumneka igho ja chokwa jiandikilo irina iwishi aighu yaro, ijo mndungi usejiichi, ela uo mundu moni ujiwusagha.’

¹⁸“‘Na malaika wa ikanisa ja Thuatira kumuandikie huwu:’ ‘Agha ni malagho gha Mwana wa Mlungu, uo uko na meso sa lumu lwa modo, na maghu ghake ghiko sa shaba izughulo na ndighi.

¹⁹Narimanya kazi rako; lukundo lwako, irumirio jako, wudumiki ghwako, kurumaghia luma kwako, na seji kazi rako ra nyuma richumbie iro ra imbiri.

²⁰Ela neko na ilagho na kumoni; kwaduanyagha na uo muka Jezebeli, uo ukuwangagha moni mlodi, nao waawuyafundisha na kuwikalia wadumiki wapo wikuzaisire kulaka, na kuja vindo vifunyiro kizongona kwa milimu.

²¹Neremnekieghe ngelo upate kuhea, ela waawuyalegha kuhea wulaki ghwake.

²²Ola ini nichamkumba aighu ya wuli, na awo wilakagha andwamweri nao, nichawikumba andenyi ya matiriro mabaa, wisaahea agho mabonyo ghake;

²³sena nichawibwagha wanughi wake. Na makanisa ghose ghichamanya angu ni ini nirizighanagha ngolo na maghesho gha wandu; nani nichamlipa kula umu onyu karakara na kazi rake.

²⁴Ela inyo msigharikie andenyi ya Thuatira, msewuenugha agho mafundisho, hata msekufundishire iro maza wamu wawuyariwanga maza riko ndenyi ra Shetani, namzera huwu: simdukishiragha msigo ghungi mzima anduangi,

²⁵ela ugho ghoni ghwa inyo kumazira icho muko nacho hata nacha.

²⁶Uo usimagha na kuribonya kazi rapo hata kutua, nichamneka kubonya nguma aighu ya iro mbari,

²⁷nao ucharibonyera nguma kwa mzata ghwa chuma, na kuribara seji kuwonagha nyungu ra wongo rikibarwa; nichamneka ndighi iro seji koni ini moni nerepatireghe kufuma kwa Aba,

²⁸nani nichamneka ija nyerinyeri ya luma lwa nakesho.

²⁹Uo uko na kudu, ndesikire agho malagho uo Roho ughighoriagha agho makanisa.’