Read TAITA BIBLE – Biblia Ilagho Jiboie Kwa Wandu Wose WUFUNUO 20 Bible Online

WUFUNUO 20 - TAITA BIBLE – Biblia Ilagho Jiboie Kwa Wandu Wose bible

WUFUNUO 20

¹Niko ngawona malaika ukisea mlungunyi, uwadie mfunguo ghwa kina cha abuso, na mnyororo m'baa mkonunyi kwake.

²Nao ukaiwada ija choka, iyo choka ya kala, nao ni uo Ibilisi na Shetani, ukamfunga miaka elfu,

³na kumkumba kinenyi; ukachirugha na kukaba muhuri aighu yake, eri usepate kuwikalia wandu wa iro mbari sena, hata miaka elfu yasia. Konyuma suti ufungulo kwa ngelo ndini.

⁴Niko ngawona vifumbi va nguma, na awo wereviserieghe, ni awo werenekeloghe nguma retanya. Na wokoni nerewonieghe roho ra wandu weredumbuloghe vongo kwa wundu ghwa kumshuhudia Jesu, na kwa wundu ghwa ilagho ja Mlungu, awo wisereitasireghe iyo nyamandu hata mlimu ghwake; hata ndewerebonyeroghe alama ingi yake chamunyi kwawo, angu mikonunyi kwawo anduangi. Wikakaia moyo, na kubonya nguma andwamweri na Kristo miaka elfu.

⁵Awo wafu wazima ndewerekaieghe moyo hata kutua kwa iyo miaka elfu. Uko niko kuruka kwa imbiri.

⁶Mrasimilwa na mweli ni uo uko andenyi ya uko kuruka kwa imbiri. Kwa wandu awo, icho kifwa cha kawi ndechiwadie ndighi ringi anduangi; ela wichakaia wakohani wa Mlungu na wa Kristo, nawo wichabonya nguma andwamweri nao, miaka elfu.

⁷Nyuma ya miaka elfu kusia, Shetani uchafungulwa ufume kifungonyi,

⁸nao uchaghenda ukiwikalia wandu wa mbari rose ndoenyi, awo Gogu na Magogu, upate kuwikwanya kwa wundu ghwa wuda; wandu wengi nandighi sa msangagha ghwa baharinyi.

⁹Nawo wikaghenda ndoenyi kose; wikaimara kambi ya waeli na ugho muzi ghukundo. Ela modo ghukasea kufuma mlungunyi na kuwitotesha.

¹⁰Na uo Ibilisi orewikalieghe, orekumbiloghe andenyi ya ndiwa ya modo ghwa kibiriti andu ija nyamandu na uo mlodi wa tee werekoghe; nawo wichatirirwa kio na dime kwa kala na kala.

¹¹Niko ngawona kifumbi cha nguma kibaa cha chokwa, na uo orechiserieghe. Nao ndoenyi na mlungunyi kukamkimbia, na andu kwaro ndekorewonekieghe anduangi.

¹²Nani nerewiwonieghe wafu wabaa na watini, wiko kimusi imbiri ya icho kifumbi cha nguma; na vuo vikakuchulwa. Na chuo chimu chikakuchulwa, nacho ni icho chuo cha irangi. Na awo wafu weretanyiroghe kunughana na maza wereribonyereghe, iro rereandikiloghe andenyi ya ivo vuo.

¹³Na bahari ikawifunya awo wafu werekoghe andenyi yaro; kifwa na Andu kwa Wafu kukawifunya wafu werekoghe andenyi yaro. Kula umu wawo ukatanywa kunughana na mabonyo ghake.

¹⁴Niko kifwa na Andu kwa Wafu wikakumbwa andenyi ya ndiwa ya modo. Icho nicho kifwa cha kawi, iyo ndiwa ya modo;

¹⁵na ikakaia mndungi userewonekieghe uandikilo irina jake andenyi ya icho chuo cha irangi, orekumbiloghe andenyi ya iyo ndiwa ya modo.