Read TAITA BIBLE – Biblia Ilagho Jiboie Kwa Wandu Wose WUFUNUO 4 Bible Online

WUFUNUO 4 - TAITA BIBLE – Biblia Ilagho Jiboie Kwa Wandu Wose bible

WUFUNUO 4

¹Nyuma ya agho, nerezighanireghe, nao ola, ngawona mnyango ghwarughulwa mlungunyi! Na ulo lwaka nerezoeghe kulusikira lukighora nani sa tarumbeta lukaghamba, “Joka nokunu, nani nichakuwonyera iro maza riko na suti ekaia nyuma ya agha.”

²Na shwa wori ngakaia andenyi ya Roho; nao ola ngawona kifumbi cha nguma mlungunyi chaserelwa ni mndumu!

³Na uo orechiserieghe, orewonekieghe sa magho gha zoghori mbaa ghiwangwagha jasperi na karneliani, na mbai-mbai ya icho kifumbi, korekoghe na lusenge lwa vua luwonekagha sa igho ja zumaridi.

⁴Mbai-mbai ya icho kifumbi cha nguma, verekoghe vifumbi vimu va nguma mirongo iwi na vina, na waghosi mirongo iwi na bana waseria aighu yaro, wirwae nguwo ra chokwa na virumbu va dhahabu vongonyi kwawo.

⁵Kufuma kwa icho kifumbi cha nguma, rerefumieghe chuhehia, na chwaka na mirurumo ya chukuwa; na imbiri ya icho kifumbi cha nguma, korekoghe na taa mfungade rikiaka, naro ni roho mfungade ra Mlungu;

⁶na ahoeni imbiri ya icho kifumbi cha nguma, korekoghe sa bahari ya kilole, mfwano ghwa krustali. Na mbai mbai ya icho kifumbi cha nguma chia rose, korekoghe na nyamandu riko moyo inya, richue meso na imbiri na nanyuma.

⁷Nyamandu ya imbiri erekoghe sa shimba, nyamandu ya kawi, erekoghe sa ng'ombe, nyamandu ya kadadu, erekoghe na wushu sa ghwa mdamu, na nyamandu ya kana, erekoghe sa indu iburukagha.

⁸Iro nyamandu riko moyo inya, riko na mawawa arandadu kula imu, rachue meso chia rose, hata na nandenyi; naro radabora kari kose kio na dime rikighamba, “Mweli, Mweli, Mweli, ni uo Bwana Mlungu Uwadie-Ndighi-Rose; uo orekoghe, uo uko, nao nuo uchagha.”

⁹Hata iro nyamandu riko moyo rikameria kumneka wubaa na ishima na chawucha, uo uko kidombo kifumbinyi cha nguma, uo uduagha moyo kwa kala na kala,

¹⁰awo waghosi mirongo iwi na bana wadaghwa kijimijimi imbiri yake uo uko kidombo kifumbinyi cha nguma, na kumtasa uo uduagha moyo kwa kala na kala. Nawo wakumba virumbu vawo imbiri ya icho kifumbi cha nguma wikibora:

¹¹“Kwafwana oho Bwana odu na Mlungu odu, kughuwusa wubaa, na ishima na kudima; angu oho koreumbieghe vilambo vose, na kwa kukunda kwako oho, vereumbiloghe, vikakaia.”